Lesadónan di Deporte Korsou, bon dia i felis siman. Kon a bai ku Pasku, dianan di fiesta i kambio di aña.  Kasi nos tur a keda kas i selebrá den seno di famía. Informashonnan a sigi den Slowpitch. Kòrda ku ekipo Flamboyan Tigers no a bira Tigers, pero lo keda Flamboyan Tigers. Dirigentenan a yama nos bisa i e ekipo a terminá number 2 den Liga 50 i lo a klasifiká pa play-off di Liga 50 si direktiva lo a disidí ku ta start play-off dirèkt. E aña ku a terminá no tabatin kasi niun seramentu di aña. Algun hungadó, nèt 4 tabata bini huntu i sera aña aki/aya. Covid-19 a kambia tur kos rumannan.

* * * * *

Promé ku Pasku nos a skibi di Liga Amstel, ké mèn mas o menos un resumen den kolumna. Awe nos tin Beisbòl Veterano den nos kolumna. Ekiponan Jandoret Raiders i Quality Stars a bai final di Beisbòl Veterano. E historia ya ta konosí kaminda e seri a empatá na unu i den wega number 3 ku e wega empatá na 6 den kabes di e di 7 inning Polis a para wega, debí na aglomerashon di hende na Vi Jansen Ballpark.  Jandoret Raiders a terminá number 2 durante kampionato regular i Quality Stars a terminá number 3. Tabata e ekipo Isla Crackers ku a terminá number 1. Ekiponan 1 te ku 6 a topa otro den un Round Robbin. Pa saka e mihó kuaternan ku tabata Quality Stars (4-1), Jandoret (3-2), Isla (2-3) i Bulldogs (2-3).

* * * * *

Standing despues di temporada regular: Isla 10-1, Jandoret 10-2, Quality Stars 9-2, Santa Maria 9-3, Bulldogs 8-4, Santa Rosa 7-5, Marchena 5-6, Azucar 5-7, The Brothers 5-7, Vosama 4-7, Yesterday 2-10, Marlins 1-11 i Otrabanda 1-11. Manera ariba menshoná, e 6 promé nan a bai Round Robbin. Pa promé biaha den historia, te asina leu ku nos ta kòrda, e último 25 añanan den kualke kompetensia 4 ekipo a terminá na di 3 lugá.  Ekiponan Isla, Bulldogs, Santa Rosa i Santa Maria a empatá ku rekòrt di 2-3 i den e seri partikular entre e 4 ekiponan tabata Bulldogs i Isla ku a gana e dos weganan den e seri partikular entre e 4 ekiponan ei i ekiponan Santa Rosa i Santa Maria den e kaso aki a gana solamente un wega den e seri i nan a keda afó.

* * * * *

Asina play-off a sigi ku e resultado menshoná. Jandoret Raiders a gana Isla Crackers den un wikènt dos wega pèrtá 2-1 i 4-3. Quality Stars tabata mester di 3 wega pa klasifiká pa final. Quality a gana Bulldogs 9-0 den e promé wega. Despues a pèrdè 3-2 pa finalmente gana e último wega 8-1 i klasifiká pa final. BEVEKO a saka tambe ganadónan individual kaminda Michelangelo ‘Lo’ Celestina di Crackers a sali kampion bate, Ramiro Balentina di Santa Maria, lider di homerun i Orsendo Clemencia di Jandoret kampion picher. Final di Beisbòl Veterano ta programá pa sigi den di 7 inning den 2021. Fecha i orario no ta konosí ainda. Dependé kon e asuntu di Covid-19 sigi den 2021, lo pone fecha.

* * * * *

Pa loke ta trata torneonan tradishonal pa habri aña, dirigentenan di The Greatest/Survivors ta pendiente pa anunsiá ofishalmente ku nan ta kanselá e torneo despues di basta aña. Despues ku Torneo Kopa Joy Alberto a stòp di eksistí, dirigentenan di e kuerpo di umpire i skorer The Greatest, huntu ku ekipo di Sòftbòl Survivors ta organisando torneo tur aña. E torneo ta pa ekiponan di 50+, ekiponan Soshal/Komersial.. Na un okashon a hinka ekiponan Modified tambe adén, pero despues a wanta ku e kategoría aki.

* * * * *

Organisadónan di Torneo Amstel Bright ta pendiente pa desaroyonan di Covid-19, pa anunsiá detayenan di e torneo. Den 2020 a torneo a terminá dia 15 di mart, nèt un dia promé ku Gobièrnu a kuminsá anunsiá medida den kuadro di Covid-19. Torneo Hope a keda kanselá, debá na Covid-19. Organisashon Ennia ta pendiente pa organisá Hope 2020 i tin algún organisashon potensial ku ta pendiente pa tur Hope aki 3 aña òf dependé kon asuntunan move, por tuma e organisashon promé si tin mester. Torneonan ABC i otro torneo grandi tambe ta pendiente kiko ta bai pasa.

‍