Lesadónan di Deporte Kòrsou Slowpitch i Beisbòl, un bon dia i felis wikènt. Un palu di awa a kai djaweps i ayera den oranan di dia na Kòrsou. Hopi ekipo ku tabata pendiente pa train, a kanselá nan trainingnan. Djasabra i djadumingu ta kandela tin na Tio Daou Ballpark, na momentu ku e 6 mihó ekiponan di Beisbòl Veterano lo kaba di midi forsa, pa wak kua ekipo ta bai terminá den e prome 4-nan. Tur ekipo tin chèns ainda pa klasifiká òf keda afó. Jandoret ta hopi bon pará ku rekòrt di 3-1, miéntras Bulldogs ta den peliger ku rekòrt di 1-3. Un ekipo por klasifiká ku 2-3. Rekòrt di tur ekipo promé ku e wikènt aki den Round Robbin ta lo siguiente: Jandoret 3-1, Santa Rosa i Quality 2-1, Santa Maria i Isla 1-2, Bulldogs 1-3. Ekiponan Santa Rosa, Quality, Santa Maria i Isla mester hunga 2 wega e wikènt aki.
* * * * *
Den e artíkulo nos tin e skèdjel atrobe. Jandoret i Bulldogs lo yega 5 wega hunga, kaminda algún ekipo ainda tin 3 wega. Tantu djasabra komo djadumingu lo ta kayente. Laga nos shut e skèdjel den e kolumna aki tambe. Djasabra 7 di novèmber pa 10.30 Jandoret Raiders – Santa Maria Pirates, 13.00 Santa Rosa – Bulldogs, 15.30 Quality Stars – Isla Crackers. Djadumingu 8 di novèmber pa 15.30 Santa Maria – Quality Stars, Isla Crackers – Santa Rosa Memories. Djadumingu ta kandela mes kaminda lo bira konosí kua ta e 4 ekiponan ku lo pasa pa semi-final. Skèdjel pa weganan semi-final ya ta klá. Djasabra 14 di novèmber lo hunga 2 vs 3 pa 12’or i wega number 1 vs 4 ta start 3’or pm. Siguiente dia djadumingu 15 di novèmber 1 vs 4 ta hunga promé i despues 2 vs 3. Djasabra 14 di november tin wega entre Marchena Stars i Vosama promé ku e weganan di play-off semi-final.
* * * * *
Miéntras tantu play-off di Liga 60 lo sigi atrobe djadumingu awor si awaseru permití. E skèdjel lo keda meskos ku siman pasá. Den e último wega di kampionato ekipo Nos Tambe Por a dal Lions 7 pa 1 i sali number 1. Nos Tambe Por a terminá invikto ku rekòrt di 7 ganá i 0 pèrdí. Lions a sali number 2 ku rekòrt di 5-1. Jaws super kampion un tempu a kaba number 3 ku rekòrt di 4-2 i Los Amigos kampion na 2016 i 2017 a kaba ku rekort di 3-3. Amigos a klasifiká di chiripa, nan a gana Nos Power pèrtá 3-2 djadumingu 25 di òktober i klasifiká komo number 4. Emile Haswell a sali kampion bate i lider den kareda empuhá. Awe nos tin e sifranan kompletu den e artíkulo tokante 60+.
* * * * *
Ban un ratu pa Beisbòl Dòbel A. Siman pasá presidente di FEBEKO a splika nos tokante e akuerdo kaminda e ekipo ku subi pa Beisbòl Dòbel A mester usa 15 hungadó di ekiponan aktual (di 2020) di Beisbòl. E ekipo mester subi un kantidat di hungadó pa mantené e nivel di Beisbòl Dòbel A. Esei tabata e akuerdo, sino ekiponan di Klase A no por a subi. Si e ekipo menshoná, den e kaso aki ekipo The Champs, lo a bira kampion di Klase A sin tabatin mester di hunga e seri di promoshon, ekipo The Champs lo por a subi ku nan hungadónan so sin problema. E desishon ku The Champs mester reforsá ku 15 hungadó di Dòbel A debí ku nan a subi via di e seri di promoshon, a keda aprobá durante reunion general di FEBEKO. Bon chèns pa varios hungadó prospekto ku no ta haña chèns. Hungadónan ku a subi Dòbel A na 2020 den Hubenil ku no ta haña muchu chèns, ets.
* * * * *
FEBEKO pa medio di e presidente Jedrek Magdalena i su crew a presentá e kuerpo tékniko. Djadumingu último tabatin un Konferensia di Prensa kaminda Extra tabatin un relato amplio. E kuerpo tékniko mas amplio ku normal den kuadro di e Beisbòl moderno. Meta ta pa sigur subi di ranking Mundial di Beisbòl. Na e momentunan aki Kòrsou ta na di 64 puesto riba e ranking Mundial i intenshon ta subi di ranking. E selekshon bou di direkshon di Hanley Statia lo partisipá na Peru den un trainingscamp. Práktikamente tur coach ta pa promé biaha den kuerpo tékniko di Kòrsou. A konvoká 50 hungadó pa partisipá na e
Pre-selekshon. Nos ta keda te aki pa awe.
