Lesadónan di Deporte Korsou bontardi. E siman aki nos a start ku e resumen di tur aña den Sòftbòl Slowpitch i Beisbòl Veterano. Aña 2020, un aña inkreíbel kaminda hopi di e liganan i torneonan a kai afó. Práktikamente ménos ku mitar (¼ parti) di e liganan a drei den 2020 tantu na Kòrsou komo na Aruba. Na Kòrsou tin Liga Amstel, Liga van Engelen, Liga 40, Liga 50, Liga Streanan di Ayera, Liga Di Nos Tur, Liga 60 i Beisbòl Veterano. Solamente Liga 60 a terminá. Beisbòl Veterano a hera di terminá i e resultado ya ta konosí ku a para wega final aki pa e kontinuá te otro aña. Liganan 50, Liga Amstel i Liga di Nos Tur a start sin por a terminá.
* * * * *
Liga Van Engelen, Liga 40 i Liga Streanan di Ayera no a start. Liga Streanan di Ayera a respetá Covid 19 i no a pensa na start mes, miéntras pa loke ta trata Liga 40 i Liga van Engelen e interes tabata manera straño for di komienso. Ban wak kiko ta bai pasa ku e liganan aki den 2021 i den e añanan benidero. Mayoría liga a start den luna di yüli, entre otro Liga 50 i Liga Amstel, pero no a logra terminá. No ta konosí tampoko ku e liganan aki lo sigi den 2021 òf lo start ku un kampionato nobo. Extra Slowpitch ta bai den e torneonan ku a start na komienso di aña. Nos tabatin solamente dos torneo, Torneo Survivors ku a bira un éksito kompletu, kaminda ekipo Pitufos a nòkout Baranka pa bira kampion. Den e di dos torneo, Torneo Amstel Bright, ekipo Ban Serio a bira kampion ganando Jandoret Raiders den un gran final.
* * * * *
Beisbòl Dòbel A tabata tremendo e aña aki i nan tambe a haña sla naturalmente di e Covid. Un kampionato stail kompletamente nobo, kaminda a hunga seri entre ekiponan i ekiponan tabata hunga dos wega sigí kontra di otro. Hungadónan di liganan profeshonal tantu na USA komo na Europa tambe a partisipá na e kampionato aki. Un kampionato ku a hala masha hopi fanátiko te na momentu ku no por a yena stadion kompletu i despues no por a tuma fanátiko mes, pero solamente miembronan di direktiva i esnan yegá na ekiponan di Beisbòl Dòbel A manera masahista, kargadó di material ets. Manera nos a skibi djabièrnè ultimo, tur serinan di play-off a bai e máksimo kantidat di weganan i lástimamente ku no por a yena stadion manera a spera.
* * * * *
Tantu Hubenil komo Klase A i Dòbel A a terminá pa loke ta trata e kampionato di FEBEKO. Den Klase A e ekipo The Champs a subi pa Dòbel A despues di a hunga seri di promoshon kontra di Royal Magic di Suffisant. The Champs despues di algún siman a reklamá ku nan no ta bai subi ku mas ku mitar di hungadó ku ta den Dòbel A kaba. FEBEKO ta para riba ku e regla ta poné pretu riba blanku i The Champs mester reforsá ku por lo ménos 15 hungado di Dòbel A den kampionato di FEBEKO 2021.
* * * * *
E aña aki no tabatin niun Kopa ABC. Ultimo añanan tin Kopa ABC den liga di e hóbennan, Liga 40 mihó konosí komo Classico 40, Liga 50 i Liga 60. Liga 60 ta den mart i e otro alrededor di Dia di Asension ku ta aprel/mei/yüni. 2019 tabata den gran forma mes mes ku kampionatonan na Kòrsou i Aruba. Nos ta kòrda ku na 2019 e kampionato di ABC 50+ no a sigi. Problemanan a kuminsá ku Insel Air i biahenan a bira masha karu. Pa añanan 2021 i 2022 tursimo lo bai krese formal na tur e islanan i dimes lo tin mas moveshon aereo entre islanan. Kòrsou, Aruba i Boneiru lo bini duru bèk den turismo, kaminda lo tin moveshon formal atrobe riba tereno deportivo.
* * * * *
Moveshonnan ta slow naturalmente den desèmber aki, pero nos lo tin resumen i moveshonnan ku tin pa e añanan benidero. Santa Maria PIrates lo reforsá formal den Beisbòl Veterano. Quaity Stars lo tin maneho nobo segun rumornan ku nos tin. Jandoret lo keda práktikamente meskos, Santa Rosa tabata pendiente di un otro manager, pero parse ku e manager lo keda kaminda e ta mes. Marchena Stars tin un shortstop i un tremendo outfielder. E shortstop ta hóben i e outfielder tin mas edat, pero den gran forma. Hopi ekipo ta tirando bara di hak riba e Venesolanonan di Vosama. Nos ta keda te aki.
