Lesadónan di Deporte Kòrsou, felis siman. Nos tei awe ku informashon di Sòftbòl Slowpitch i Beisbòl Veterano. Marlins a laga Ban Serio den tereno den e wega klèsh di Liga 50 djasabra mainta na Suvek Ballpark. E wega a terminá 8-7 ku hit di Jeffrey Martina ku base yen. Pitufos a gana Lions fásil. Flamboyan a derotá Jaws. Den Liga Amstel Thrillers a dal Terremaster 18-9, Sugar a gana Gamers 14-13, Bombers a derotá X-Treme 13 pa 4, Cicoza a nòkout Terremaster 17-5. Masha hopi hende mes na Van Engelen Ballpark pa wak hungadónan di e dos liganan den akshon.
Den Beisbòl Veterano Crackers a dal Santa Maria. Bulldogs a derotá Vosama. Deporte Kòrsou ta pendiente pa e resultadonan. Djabièrnè Santa Maria a dal Groot Kwartier durísimo 14-3 den Stadion Johnny Vrutaal. Djasabra tantu Beisbòl Hubenil komo Klase A a start. Hubenil den Stadion Johnny Vrutaal i Klase A na Montab. Den Sòftbòl Femenino Veterano djabièrnè na Frank Curiel Ballpark Shining Stars a derotá Join Me 5-3 i Un Kara a gana Chilling pèrtá, 4-2. Djasabra Un Kara a gana Chilling 12 pa 9 i Join Me a dal Shining Stars 11 pa 1. Standing den Liga di Nos Tur ta Un Kara 7-0, Chilling 2-3, Join Me 2-4, Sin Stress 2-3, Shining Stars 1-4.
Ekipo Chilling ta kargá ku hungadónan di Nos Goso. Entre otro Leonise Avastia, Melisa Rosalina, Miriela Carlo i Sovienny Kleinmoedig. Nos Goso ta ekipo di Liga Deseo di Streanan di Ayera. No ta konosí ku Liga Streanan di Ayera lo sigi e aña aki. Nos lo bai drenta den kontakto ku presidente di e liga ku ta Marlene Obispo. Na 2019 e liga tabata eksitoso ku kampionato di 35+_i e kampionato di 50+. Nos ta siguiendo Liga di Nos Tur djaserka. All Stars League si segun nos a pasa pa historia. Na 2019 no tabatin kampionato i nos no a tende nada mas.
Den Beisbòl Veterano ekipo Quality ta invikto i a dal ekipo Marchena Stars relatívamente fásil ku skor di 7-1. Basta bon públiko pa mira e wega djadumingu último na Vi Jansen Ballpark. Pa otro wikènt weganan lo sigi na Tio Daou Ballpark. Tantu djasabra komo djadumingu lo tin weganan kandela. Djasabra pa 3.30’or Quality Stars lo topa Crackers den un wega kandela ruman. Ta trata di dos ekipo invikto ku ta lusi sólido e kampionato aki. Jandoret Raiders ta e otro ekipo invikto. Jandoret lo topa ku ekipo Marchena djadumingu mainta 10.30’or na e parke menshoná.
Den dianan benidero nos lo tin tur resultado. By the way, tremendo ambiente na Van Engelen awor ku liganan 50 i Amstel a djoin. Liga van Engelen lo no bai tuma lugá den 2020 parse. A yama reunion dos biaha i solamente dos ekipo a presentá. Direktiva a saka su konklushon ku ekiponan di e liga no ta interesá pa hunga bala den 2020. Liga 40 ta pio. Ultimo añanan a drei ku 6 ekipo ku segun e liga ta mínimo. Un ekipo a tuma retiro, e otro ekipo finansieramente no por drei prse. Ké mèn ku 4 ekipo so lubida Liga 40, espeshalmente pa loke ta trata gastunan i tiki interes di fanátiko. Na 2019 debí na e revelashon Tigers, algún fanátiko a bini wega den play-off. Ku otro palabra, Liga 40 a pasa pa historia. Nos ta keda te aki.
