Lesadónan di Deporte Kòrsou bondia. Nos tei atrobe ku informashon di Sòftbòl Slowpitch i Beisbòl Veterano. Den Sòftbòl Slowpitch pa loke ta trata Liga 60, play-off page system ta start djadumingu awor na Frank Curiel Ballpark. Djadumingu último ekipo Nos Tambe Por a dal Lions fásil 7 pa 1 i sali number 1 den Liga 60 pa loke ta e temporada regular. Nos Tambe Por a terminá invikto ku rekòrt di 7 ganá i 0 pèrdí. Lions naturalmente a sali number 2 ku rekòrt di 5-1. Jaws ta number 3 ku 4-2 i Amigos 3-3. Amigos a gana Nos Power pèrtá 3-2 djadumingu último i klasifiká komo number 4. Emile Haswell a sali kampion bate i lider den kareda empuhá. Emile Haswell a bati pa averahe di .688 i empuhá 10 kareda.Nos a mira Song Sofia dal un homerun dia 19 di yüli kontra di Jaws. No tin masha homerun den 60+.
* * * * *
Richenel Raphaela a terminá ku un ERA di 0.00 i Riley Toppenberg di Jaws tabata lider den ponche tirá ku 5 ponche. Richenel Raphaela, Emile Haswell i Son Sofia ta di e ekipo Nos Tambe Por. Ekipo kampion di Sòftbòl 60+ di 2019 i ta rumbo pa otro titulo den 60+. Ekipo Nos Tambe Por ku a keda fundá na 2018 pa Chan Schoop i amigunan, a sali na di 4 lugá den 2018. Na 2019 nan a bira kampion den luna di novèmber dilanti un públiko rekòrt den Frank Curiel Ballpark. Weganan pa djadumingu awor pa 1’or ta Nos Tambe Por kontra di Lions i pa 3’or Los Amigos kontra di Jaws. E serinan di play-off ta un wega so, ké mèn tur seri ta hunga un wega so. Final tambe lo ta un wega so. Ganadó entre Nos Tambe Por i Lions ta pasa pa final i pèrdèdó lo bai topa ku e ganadó di Los Amigos i Jaws.
* * * * *
Den Beisbòl Veterano e situashon ta hopi pèrtá mes ku tres ekipo ku rekòrt di 2-1 i e otro tresnan tin rekòrt di 1-2. Jandoret Raiders, Santa Rosa i Quality Stars tin rekòrt di 2-1, Bulldogs, Santa Maria i Isla tin rekòrt di 1-2. Tur ekipo tin chèns di klasifiká i tur ekipo por kai afó tambe. E mihó 4-nan lo bai play-off semi-final ku ta start dia 8 di novèmber. Beisbòl Veterano a move pa Tio Daou Ballpark den e wikèntnan benidero. Djadumingu awor ta kandela tin na momentu ku Bulldogs topa ku Jandoret pa 10.30, sigi pa 1’or pm Santa Maria vs Quality Stars i finalmente 3.3.0 pm Isla Crackers kontra Santa Rosa Memories.
* * * * *
Ekipo Dream Team a bira kampion di Sòftbol Maskulio Faspitch. Suffisant Eagles tabata faborito pa bira kampion i e ekipo lo kumpli 20 aña di eksistensia djasabra awor. E ekipo ta fundá pa Yambo i su yu Shai Ustasia. Dream Team tambe tin aña ta move bon den Fastpitch ku varios hóben prometedór. Di un manera òf otro mester trata di drenta kompetensia regional di Fastpitch bèk pa hisa e nivel. Te asina leu ku nos sa Aruba si a keda move den Fastpitch Maskulino ku kompetensianan regional.
* * * * *
Nos tin pichernan ku por yega leu manera Alexander Rodriguez, Frensel Meyers, Wendley Serberie, Gedeon Noor, Selvinson Angelista huntu ku veteranonan manera Julius Veeris i e Venesolano Emilio Velarde. Veeris a hunga den varios selekshon di Hulanda, miéntras Velarde a picha den selekshon di Venezuela. Velarde ku ta hunga den Swift i den Beisbòl Veterano tambe tin basta aña na Kòrsou i no ta probabel ku e por tira pa selekshon di Kòrsou. Den wikènt nos lo tei bèk ku mas informashon di Sòftbòl Maskulino Fastpitch i tambe di Beisbòl Veterano ku play-off Liga 60+.
