Inseguridat rondó di Kopa ABC 40+ na Boneiru pa aprel 2026
WILLEMSTAD – E partisipashon di vários ekipo den e próksimo Kopa ABC 40+ ta na peliger debí na e skarsedat di buelo pa Boneiru aprel 2026.
E komishon organisadó na Boneiru a plania e torneo rònt di e fechanan di Dia di Rincon, sperando ku lo tabatin sufisiente kupo pa e ekiponan di Kòrsou i Aruba. Sinembargo, e realidat ta diferente: sinku ekipo di Aruba i un ekipo di Kòrsou ta den insertidumbre, sperando konfirmashon pa nan por biaha i kuminsá ku nan preparashonnan final. Aktualmente, e ekipo The Greatest di Kòrsou (ku vários hungadó di Baranka) ta e kampion di Kopa ABC 2025. Amstel Bright Premier Cup lo organisá un seshon di Liga 40, kual aparentemente lo bira bálido pa e kampionato di Liga 40 di 2026.
Torneo Nos ku Nos
Kontrario na e situashon di e Kopa ABC, e torneo Internashonal di Nos ku Nos sí ta parse di ta riba bon kaminda. E evento aki lo konta ku partisipashon di ekiponan for di Aruba, Kòrsou, Hulanda, Merka i e anfitrion, Boneiru. E torneo ta dirigí riba kategoria maskulino 50+ i femenino 35+. E partidonan lo tuma lugá for di djarason 29 di aprel te ku 3 di mei 2026, riba 30 di aprel pa selebrashon di Dia di Rincon. Mayoria ekipo ya a konfirmá nan presensia i tin nan pasashi i estadia pagá kaba. Asosashon Nos ku Nos, fundá dia 1 di ougustùs 2014 na Boneiru, ta esun enkargá ku e organisashon di e torneo aki ku ta presedé esun di ABC 40+. E weganan lo tuma lugá na Jossy Boekhoudt Ballpark.
Golden Athlete Caribbean Championship
E tradishonal Golden Athlete Caribbean Championship ku mester tuma lugá na Aruba, tambe ta den problema. E fechanan ku e weganan di Golden Athlete lo tuma lugá ta pareu ku ABC&S di e hobennan ku ta alrededor di 15 di mei (entre e seis islanan di Reino) na Aruba, loke a kousa ku no tin buelo disponibel mas. E úniko solushon pa salba e torneo (Golden Athlete) na Aruba ta e posibilidat di pone buelonan èxtra òf charter. Loke mester tabata un fiesta deportivo na aprel pa Boneiru i na mei pa Aruba, aworakí ta birando un doló di kabes pa e organisadónan, esta esun di ABC 40 i Golden Athlete Caribbean Championship. Keda pendiente pa mas informashon riba e desaroyo di e dos torneonan aki.
Tyron de Palm bèk pa ekipo Jaws den 60+
WILLEMSTAD – Tyron de Palm despues ku a hunga un aña den Los Amigos lo move bèk pa Jaws serka su amigunan Victor Caldera, Caballo Wilson i otronan. Na komienso di 2025 ekipo Jaws a pèrdè vários hungadó, entre otro Tyron de Palm, Raimy Pastor i Fransje Lambertina ku ta 3 pila di e ekipo Jaws. Raimy Pastor i Tyron de Palm a bai Los Amigos i Fransje Lambertina a bai Lions ku a yega final den 2025. Vários moveshon den Liga 60 den 2026 i ku binimentu di Baranka e kompetensia lo bira mas interesante.
Den e dianan benidero Liga 60 lo ta na notario pa asina ofishalmente Liga 60 bira un asashon despues di basta aña di eksistensia. Dirigentenan di ekipo Koala Bears 60+ di Hulanda ta na Kòrsou pa plania pa organisá e Kopa ABC na Kòrsou mes enbes di Hulanda i esei lo tuma lugá den luna di òktober na Frank Curiel Ballpark.
Lesadónan di Deporte Kòrsou, bonnochi. Tremendo notisia djamars kaminda a keda konfirmá ku Kòrsou su selekshon di Little League lo bai Williamsport dirèkt sin tin mester di hunga kampionato di Karibe. Un logro grandi danki na petishon i intervenshon di District Administrator, Urny Floran. Durante e konferensia di prensa a anunsiá tambe fechanan ku e playoffnan lo tuma lugá i a presentá e kuerponan tékniko. Segun dia e lunanan ta bai nos lo tin mas detaye di e tremendísimo notisia aki. Nos a bai Williamsport 14 biaha for di dia e parti di Latino America ku Karibe a bira America i Karibe. Un tempu nos a bai 9 biaha sigí di 2001 te ku 2009, despues na 2012, 2016, 2019, 2022 i 2023. Kòrsou ta realmente grandi den Little League. Kòrsou Pabien. Andruw Jones a drenta Salon di Fama. Den dianan benidero nos lo tin mas detaye.
* * * * *
Nos ta mira ku hóbennan ta firma un tras di otro despues ku nan terminá Senior League. E firmamentu di Sherrintley Da Costa Gomez a bai kompañá ku hopi informashon entre otro MC durante evento, hopi hende mes na e akto di firmamentu. Hopi great mes, ta tur hungadó ku a hunga den selekshon ku Sherrintley Da Costa Gomez tabata presente, vários hungadó di Pabou i algun di Pariba tambe ku a hunga tur e añanan kontra Sherrintley. Sherrintley su tata Sherrintley Da Costa Gomez Sr. tempu di su tempu tabata un dje gran hungadónan di Liga Pabou ku despues a bira coach i manager di selekshonnan di Liga Pabou.
* * * * *
Ban pa Slowpitch, manera nos a anunsiá Torneo Survivors/The Greatest ta start djasabra awor i awe djarason lo tin un reunion ku lo tuma lugá na sede di SSK pa pasa den e reglanan. Ekipo Baranka a habri aña djadumingu 18 di yanüari ku un evento na playa Mari Pompoen. Tabatin un Santu Sakrifisio di Misa na misa di Steenrijk pa después bai na Mari Pampoen. Baranka ta hopi kontentu ku awor nan tin tim den Liga 40, 50 i 60. Dimes masha ten den Liga Van Engelen. E hungadónan a bira grandi i ta move den 40, 50 i 60. Pa loke ta trata kampionato di 40+ tin tur indikashon ku e torneo Amstel Bright Premier Cup lo konta komo kampionato di Liga 40. Bon idea pa asina e Liga 40 keda bibu rumbo pa Kopa ABC&S ku lo tuma na Boneiru den aprel di 2026. Lo tin un Torneo ABC&S i tambe torneo 50+ den kuadro di selebrashon di Dia di Rincon.
* * * * *
Nos ta bin bèk riba Little League i e playoffnan lo ta mas tempran e aña aki. Little League ta koperando ku tur e otro liganan pa asina e muchanan haña mas wega. Playoffnan ta mas tempran e aña aki for di nivel Minor te ku Senior League. Te den 5 divishon ta hunga playoff Minor, Little, Intermediate, Junior i Senior. Manera ta konosí Little League ta bai dirèkt debí na e nòmber ku Curacao Little League tin aya na Wiliamsport. Bon organisá i koperá ku kampionatonan regional na momentu ku niun pais no ke tuma e kampionato, disiplina i hopi mas. Nos mester stòp di bringa otro nos ku nos mes i uni. Little League tei for di 1969 i laga nos respetá Little League ku a traha e nòmber ku nos tin awe. Sinta na mesa i respetá otro i ban pa diálogo pa yega na un desishon ku ta kumbiní tur esnan envolví den e beisbòl di mucha.
* * * * *
Parse ku Kopa ABC&S di Liga 40 ku lo tuma lugá na Aruba ta den peliger. Timnan di Aruba i Kòrsou no ta haña buelo i estadía pa por hunga e kampionato ku ta pareu ku e Dia di Rincon. Tin un torneo di Liga 50 tambe ei riba ku partisipashon di Jandoret Raiders i e ekipo di Edison Sambo ku yama Jolly Friends. Pa loke ta trata luna di mei lo tin ABC di e hóbennan ku partisipashon di Saba na Aruba. Na Kòrsou tin Liga 50 ku partisipashon di ekiponan Marlins, Ban Serio i Jandoret Raiders di Kòrsou. E tradishonal ekiponan di Aruba, Boneiru i Sint Maarten lo tei. Master mes e manera ku e grandinan di ABC i Isla Riba a keda mantené e kontakto i amistad. Liganan 40, 50 i 60 den gran forma, ánke 40 a kuminsá kai un poko debí ku no tin kampionato, pero Amstel Bright Premier Cup lo reskatá e Liga 40 e aña aki. Nos ta keda te aki pa awe i te djabièrnè ku Poder di Dios.
