Invitashon na Pueblo di Kòrsou pa huntu nos duna honor na nos ekipo kampion Internashonal di Little League
WILLEMSTAD – Gobièrnu pa medio di esaki ta invitá pueblo di Kòrsou pa huntu, nos ban duna honor na nos muchanan mayan djaluna 29 ougùstùs 2022, na Plaza Brion Otrabanda. Nos hóbennan a konkistá e título di kampion Internashonal di Little League 2022, na Williamsport, Pensilvania. Pa e motibu akí nos ta duna honor na nan pa a pone nòmber di nos dushi Kòrsou bria den hinter mundu.
E programa ta kuminsá for di airopuerto Hato ora nan yega pa 15:15 di atardi for di Estados Unidos. Nan ta keda risibí pa Minister di Enseñansa, Siensia, Kultura i Deporte sr. Sithree van Heydoorn huntu ku demas Minister nan di Gabinete Pisas. Despues di esaki Gobièrnu lo sòru pa un almuerso pa nan i pa 17:00 nan ta sali den un trailer direkshon Plaza Brion. E trailer ta pasa e ruta di Karnaval kompletu i na Tesoro Building lo tin un stòp kòrtiku.
E aktividat na Plaza Brion ta programá pa kuminsá 19:00 i ta terminá pa 20.30. Durante di e aktividat lo tin diskurso di representantenan di Gobièrnu, entrega di regalo i animashon musikal di One Flavaz.
Pueblo ta keda kordialmente invitá pa sali kas i saludá nos hóbennan riba ruta i huntu duna honor i apresio na nos hóben peloteronan, pa e echo di a pone nòmber di nos dushi Kòrsou resoná na kanalnan di televishon i radio pa mundu kompleto sa ki grandi nos ta.
Di es manera akí, Gobièrnu di Kòrsou huntu ku pueblo ta gradisí nos muchanan pa nan hazaña impagabel.
Nos ta topa na Plaza Brion djaluna, 29 ougùstùs próksimo.
—
Sr. Sithree van Heydoorn
Minister di Enseñansa, Siensia, Kultura i Deporte
