Jandoret kontra Quality i Isla vs Santa Rosa den semi-final Beisbòl Veterano e wikènt aki despues ku Jandoret a gana Santa Maria 9 pa 1 wikènt pasá
WILLEMSTAD – Play-off semi-final di Beisbòl Veterano ta start djasabra 18 di Novèmber na Vi Jansen Ballpark. Ekiponan Quality Stars, Santa Rosa Memories, Isla Crackers i Jandoret Raiders a klasifiká pa play-off di Beisbòl Veterano. E promé tres ekiponan a klasifiká, komo number 1,2 i 3 i tabata pendiente pa e number 4 konforme e regla di klasifikashon di Beisbòl Veterano. Jandoret Raiders number 5 a gana di Yesterday number 6 ku skor di 8-1 djasabra último. Djadumingu Jandoret a gana di Santa Maria 9-1 i keda komo number 4.
SKEMA
Djasabra 18 Novèmber 2023
11.00 Quality Stars vs Jandoret Raiders;
14.30 Sta. Rosa Memories vs Isla Crackers.
Djadumingu 19 Novèmber 2023
11.00 Isla Cracker vs Sta. Rosa Memories;
14. 30 Jandoret Raiders vs Quality Stars.
Jandoret ta dal Santa Maria 9 pa 1 i klasifiká pa semi-final di Beisbòl Veterano
WILLEMSTAD- Jandoret Raiders a dal Santa Maria duru dilanti un públiko grandísimo na Vi Jansen Ballpark djadumingu 11 di novèmber 2023. E wega a terminá ku skor di 9 pa 1. Raylan ‘Tutu’ Capella tabata e picher ganadó i Myron Wijman tabata tremendo den defensa pa Jandoret Raiders. Jandoret lo topa ku Quality Stars djasabra awor i Isla Crackers lo hunga kontra Santa Rosa Memories. Djasabra Jandoret a gana di ekipo Yesterday 8-1 pa bai topa ku Santa Maria djadumingu mèrdia. Jandoret a gana 3 wega den wikènt. Djasabra apesar ku mester a hunga wega ‘do or die’ kontra di Yesterday a tuma wega amistoso kontra Legends di Hulanda i gana ku skor di 5-1 promé ku e wega kontra Yesterday.
NUMERITO
Jandoret a nota 9 kareda, dal 9 hit i hasi 1 eror. Picher ganadó tabata Raylon ‘Tutu’ Capella ku relevo di Deron Clara. Rigobert Cijntje i Mayron Martinus a bati di 3-2. Santa Maria a nota 1 kareda, bati 9 hit i hasi 2 eror. Amador Nita a resultá e picher pèrdèdó i Bertrand Peters a bati di 3-3.
Sluggers ta gana Nos Power 6 pa 4 den Liga 60
WILLEMSTAD- Ekipo Sluggers a sorprendé Nos Power ganando ku skor di 6 pa 4 den Liga 60 na Frank Curiel Ballpark. Djadumignu awor tin dos wega mas pa despues start ku play-off sistema page djadumingu 26 di Novèmber. Ekiponan ku a klasifiká ta Nos Tambe Por, Jaws, Pitufos i Nos Power. Djadumingu awor ta Pitufos kontra Lions pa 1’or i despues pa 3’or Curacao Super Stars vs Sluggers. Si Lions gana nan lo empatá ku Nos Power, pero Nos Power lo sigi pa play-off debí ku nan a gana Lions dos biaha durante kampionato.
Sluggers 6, Nos power 4
Sluggers a dal 12 hit i hasi 1 eror. Eldred Bakker tabata e picher ganadó. Abelino Julia a bati di 2-2.
Nos Power a bati 4 hit i kometé 3 eror. Michelangelo ‘Galbao’ Boekhoudt tabata e picher pèrdèdó. Oswald Daalnoot i Earl Virginia a bati di 1-1.
Teksto pa pòtrèt:
Sluggers ku viktoria riba Nos Power.
Nos Power apesar di e derota a klasifiká komo number 4.
MAS INFORMASHON DI SÒFTBÒL I BEISBÒL
Lesadónan di Deporte Kòrsou bondia i felis wikènt. Nos tabatin un blackout feros djamars anochi i e wega number 2 di e seri final entre Baranka i Swift a keda kanselá te djaweps. Baranka a bira kampion ganando di Swift ku skro di 12-8. Den dianan benidero nos tin mas detaye i entrega di premio. Propaganda tabata kore formal durante dia i tabata papia di rivalnan di tur tempu di Liga van Engelen, esta Swift i Baranka. Ta bon pa sa kuantu título e dos ekiponan aki tin den e Liga van Engelen di 1995 bin ariba. Un tempu Baranka a bira kampion 4 aña sigí, di 2000 te ku 2003. Nos ta kòrda un tempu Baranka/Swift kargá ku fanátiko den Liga van Engelen. Tur e pòtrètnan ei nos tin wardá, espeshalmente komienso di añanan 2000. Lástimamente grandinan manera Baranka, Dalpega i Buena Vista Power no tei mas den Liga van Engelen.
%20copy.jpg)
* * * * *
Fecha i orarionan di semi-final di Beisbòl Veterano ta konosí. Despues ku Jandoret Raiders a dal Santa Maria duru djadumingu e skema di semi-final a sali djaluna. Jandoret Raiders a gana dos wega den wikènt pa loke ta trata Liga 40, djasabra 8 pa 1 kontra di Yesterday di e seri entre 5 i 6. Despues Jandoret Raiders a gana di Santa Maria ku skor di 9-1 pa loke ta number 5 kontra di 4. Un públiko grandi tabata na Vi Jansen Ballpark djasabra i djadumingu. Djasabra Jandoret Raiders a hunga 11’or tambe promé ku e wega kontra Yesterday i a logra gana ku skor di 5 pa 2 den un tremendo wega amistoso kontra di Legends di Hulanda. Papito Stewart a tira kompletu pa Hulanda miéntras Edmar Cornelia i Clifton Ijziek a lansa pa Jandoret Raiders.
* * * * *
Hungadónan di Jandoret ku no ta aktivo den 40+ manera entre otro Archie Zimmerman, Elmus Poulo, Edmar Cornelia, Gregory Zimmerman huntu ku veteranísimonan di 40+ manera Jeffrey Martina, Mayron Martinus, Fayselic Nocento, Angelo Martina, huntu ku Shendy Cras, Clifton Ijziek i Curby Brunken a partisipá na e wega kontra di Legends di Hulanda. Shendy Cras tin basta aña den Jandoret 50+, miéntras Curby Brunken ta na kaminda pa 50+ di Jandoret. Después di wega tabatin dalmentu di beter (brindis) na bar den kompania di e Minister di Ekomonia i Turismo, Ruisandro Cijntje. Ruisandro Cijntje tabata presente djadumingu tambe i Jandoret Raiders a entregá plakat na dirigente i hungadónan di Legends. Varios dirigente i hungadó di Legends a move bèk pa Hulanda djaluna último.
* * * * *
Pa loke ta e weganan di wikènt awor. Djasabra 18 di novèmber pa 11’or Jandoret ku a terminá number 4 lo topa ku Quality Stars ku a terminá kampionato regular invikto ku rèkòrt di 22 ganá i 0 pèrdí. Despues pa 2’or ta sigi Santa Rosa ku a terminá number 2 kontra di Isla Crackers ku a terminá number 3. Pa djadumingu Isla Crackers kontra Santa Rosa ku lo hunga pa 11’or i despues Jandoret Raiders kontra di ekipo Quality Stars atrobe. Ta spera un públiko grandísimo mirando ekiponan ku ta den play-off final, espeshalmente Jandoret Raiders ku ta konosí ku ta hala masha hopi fanátiko na momentu di play-off i weganan grandi.
* * * * *
Liga 60 ta sigi djadumingu awor ku dos wega na Frank Curiel Ballpark. Liga 60 lo hunga final den desèmber i den dianan benidero lo bai tin reunion pa mira kiko ta bai pasa. Probablemente riba 10 i 17 di desèmber ainda lo tin weganan di play-off final di Liga 60 ku ta kabando muchu lat atrobe. Aña pasá e último wega tabata dia 4 di desèmber, kaminda ekipo Jaws a bira kampion despues ku ekipo Nos Tambe Por tabata kampion pa 3 aña sigí.
* * * * *
Petro Amigos a realisá un biaha eksitoso pa Medellin ku un kombinashon di ekiponan Los Amigos, Nos Tambe Por, Jaws i Pitufos. Nan a gana promé wega 10-9 i pèrdè despues 7 pa 3, 12 pa 5 i 7 pa 3. Un total di 16 ekipo a partisipá na e torneo. Den dianan benidero nos lo tin mas detaye i pòtrèt. Otrabanda Veterano ta na kaminda pa Kórsou despues ku tabata na República Dominicana. Javier de Castro, un di e fundadónan di Gamers a lesa e artikulo i pòtrètnan di Gamers di añanan 2000 den Extra. Ela yama danki i manda un flyer di un torneo formal di hóbennan i di Veterano 55+ ku a tuma lugá na Miami dos siman pasá. Nos lo bini bèk riba e torneo ei. Nos ta keda te aki pa awe i te mayan ku Poder di Dios.
