Jandoret Raiders ta klasifiká pa final i seri entre Bulldogs i Quality ta empatá
WILLEMSTAD - Jandoret Raiders a swip e seri semi-final kontra Isla Crackers i klasifiká pa final di Beisbòl Veterano. Jandoret Raiders a gana Isla Crackers den dos wega pèrtá. Djasabra e wega a terminá 2 a 1 pa Jandoret i djadumingu Jandoret a bolbe gana, e bia aki ku skor di 4-3. E otro seri entre Quality Stars i Bulldogs a keda empatá. Quality Stars a gana e wega di djasabra 9 - 0 i djadumingu Bulldogs a laga Quality Stars den tereno den di 7 inning ganando ku skor di 3 pa 2. Wega number 3 entre Quality Stars i Bulldogs lo tuma lugá wikènt benidero. Den kurso di siman nos tin mas detaye.
Djasabra 14 di novèmber
Quality Stars 9, Bulldogs 0
Quality Stars a gana Bulldogs 9-0. E defensa di Bulldogs no tabata skèrpi. Rydell Isabella tabata e picher ganadó pa Quality Stars tumando solamente 1 hit. Dayron Puriel a dal homerun pa Bulldogs. Lester Victoria tabata e picher pèrdèdó pa Bulldogs.
Jandoret Raiders 2, Isla Crackers 1
Jandoret Raiders a gana Isla Crackers den un tremendo partido ku skor di 2-1 ku tremendo picheo di Orsendo Clemencia. Michelangelo Cijntje a bati di 3-2. Victor Caldera i Renato Anasagasti a empuhá e karedanan pa Jandoret Raiders. Fisel Pereira tabata e picher pèrdèdó. Ela tira un tremendo partido bayendo henter e ruta. Julius Veeris a bati di 2-1 ku un kareda empuhá. Stanford Landburg tambe a konekta hit den e partido.
Djadumingu 15 di novèmber
Marchena 5 Stars, Vosama 0
Marchena Stars tabatin 4 hit i nan a hunga sin eror. Jair Josepha a gana. Chendel Leito a bai di 1-1. Pa Vosama 1 hit ku 4 eror. Xaviero Avastia a pèrdè. Jesus Gonzalez a bai di 1-1.
Jandoret Raiders 4, Isla Crackers 3
Jandoret a dal 10 hit i nan a kometé 1 eror. Deron Clara tabata picher ganadó. Renato Anasagasti a bai di 3-2. Isla Crackers tabatn 5 hit ku 1 eror. Roderick Eustatius a resultá pèrdèdó. Dennis D’Arnault a bai di 3-2. Quincy Kook a konektá 1 homerun.
Bulldogs 3, Quality Stars 2
Bulldogs tabatin 6 hit ku 1 eror. Lester Victoria a bai ku e viktoria. Djuric Pieters a bai di 2-2. Pa Quality Stars 6 hit ku 1 eror Rodney Michel a karga ku e derota. Senny Petronella bai di 1-1.
