Jaws a selebrá 50 aña di eksistensia en grande djasabra i mas informashon di Sòftbòl i Beisbòl
WILLEMSTAD- Organisashon Jaws di Sòftbòl Slowpitch a selebrá 50 aña en grande djasabra na Pro Bista na Corrieweg. Hungadó i dirigentenan di Liga van Engelen, Liga 40, Liga 50 i Liga 60 tabata presente na sala di resepshon na Pro Bista na Corrieweg pa selebrá e gran dia aki.
Despues di yegada di miembronan entre 6.45 pa 7.15 pm a start ku palabra di bon biní di hungadó/dirigente di Jaws, Wimbert Hato ku tabata maestro di seremonia. A sigí un sirbishi di misa i despues tabatin palabra di miembronan di direktiva i representante di famia di Ivan Schoobaar, alias Kid Boca Chica ku ta fundadó di e ekipo Jaws 50 aña pasá.
Benigno ‘Bencho’ Imperator’, un dje pilanan di tur tempu di e ekipo a hiba palabra huntu ku Johannes ‘ Broertje’ Curie. Tur hungadó, dirigente i fanátiko a brinda huntu ku MC Wimbert Hato, sigí pa slide show di masha hopi pòtrèt di tur tempu di Jaws. Representante di e ekipo di e hóbennan di Liga van Engelen Archie Bernabela i representante di Jaws 50+ Irving Evertsz tambe a dirigí palabra. Despues presentenan por a bebe, kome i selebrá 50 aña Jaws en grande.
MAS INFORMASHON DI SÒFTB0L I BEISBOL
Lesadónan di Deporte Kòrsou, bon dia i felis siman. Organisashon Jaws di Sòftbòl Slowpitch a selebrá 50 aña en grande djasabra na Pro Bista na Corrieweg. Un seremonia impreshonante ku sala yen kargá ku hungadónan di Liga van Engelen, Liga 40, Liga 50 i Liga 60 aya na Corrieweg. Masha hopi hungadó di Jaws ku a kaba di bira kampion di Liga van Engelen tabata presente. A start ku palabra di bon biní di Wimbert Hato sigí pa un sirbishi di misa i despues tabatin palabra di miembronan di direktiva i representante di famia di Ivan Schoobaar, alias Kid Boca Chica ku ta fundadó di e ekipo Jaws 50 aña pasá. Bar i kushina tabata den gran forma i nos a mira varios veteranísimo èks Jaws tambe presente na e resepshon. Den e artíkulo nos tin mas detaye i pòrtrèt.
* * * * *
Miéntras tantu Liga Amstel a start ku play-off djasabra na Van Engelen Ballpark. E aña aki a skohe pa hunga play-off 1 kontra 4 i 2 kontra 3, kontrali na e play-off tradishonal ku ta sistema page. Ekiponan Thrillers i Gamers a swip e serinan i lo pasa pa final djasabra awor na Van Engelen Ballpark. Weganan a terminá Thrillers 7 - Terrepower 6, den wega number 1 i den wega number 2, Thrillers 21 – Terrepower 5. Den e otro seri Gamers 8 – Xtreme 4, den wega number 1. Den wega number 2 Gamers a gana 14-3. Den dianan benidero nos tin e numeritonan. Skema di final ya ta konosí, weganan di final lo ta djasabra awor 12’or i 4’or mientras weganan balido pa di 3 i di 4 luga lo ta 2’or.
%20copy.jpg)
* * * * *
Play-off di Liga 40 mester a sigi djamars na Van Engelen Ballpark kaminda ekipo Swift lo topa ku Cicoza. E ekipo Cicoza ta promé aña den Liga 40 i ta biniendo duru pa ekiponan ku ya tin varios aña di eksistensia den e liga. Cicoza a kita ekipo Gamers for di man i lo bai topa ku Swift ku a pèrdè e seri di 1 kontra 2 kontra di Baranka. Ekipo Baranka ya ta den final i ta nan ta kampion di temporada 2022. Cicoza tin hungadónan manera entre otro Yurendell de Caster, Andley Simmons, Julius Veeris, Dayron Puriel, Rodney Michel i Dave Janga. Den e último wega di e seri entre 3 i 4 nan a dal Gamers ku skor di 18-1. Cicoza no a bai den Liga Amstel e aña aki i a preferá di bai Liga 40.
* * * * *
Pa loke ta Beisbòl Veterano, ekipo Yesterday a laga The Brothers den tereno i ta hopi bon pará pa drecha klasifikashon. E wega a terminá ku skor di 4 pa 3 pa Yesterday. Den e último inning ku The Brothers dilanti 3-2, Alexander Martina di Yesterday a bati un flai ku base yen sin out, ku e leftfielder no por a dominá i e bala a kai di hit. Dos kareda a drenta riba e hugada ei i einan Yesterday a laga The Brothers den tereno. Si e leftfielder Burnet lo a kue e bala, e koredó di tersera lo a nota fásil i Yesterday lo tabatin koredó na segunda i primera ku un out, komo ekipo di kas. Despues di e wega di djadumingu 29 di òktober 2023, Yesterday su rèkòrt a bira 9-11 i The Brothers 10-12. Yesterday mester hunga dos wega mas i mester gana tur dos pa keda komo number 6.
* * * * *
No ta konosí ku play-off entre 5 i 6 lo start wikènt benidero debí ku Yesterday falta dos wega pa hunga di kampionato regular pa sigurá puesto number 6. Nos ta pendiente di BEVEKO pa sa ki dia e weganan di Yesterday lo tuma lugá e wikènt benidero. Den e otro weganan di wikènt, Santa Maria a gana Marchena Stars pa defolt. Ta di dos biaha ku Marchena Stars ta pèrdè pa defolt den kampionato 2023 i nan ta for di kampionato i for di Beisbòl Veterano segun regla. Direktiva i ekiponan lo bai tuma un desishon kiko lo bai pasa ku Marchena den 2024. Nos a risibi skema di e weganan di wikent benidero di Beisbol Veterano, djasabra 4 di novèmber 10.30 Yesterday vs Vosama. Djadumingu 5 di novèmber 10.30 Jandoret Radiers vs Otrabanda (50+), 1’or Yesterday – Marlins.
* * * * *
Jandoret Raiders a gana di Azucar ku skor di 9-1 i Jandoret a sigurá puesto number 5. Quality a dal Marlins i terminá kampionato regular invikto 20-0. Djadumingu mainta Yesterday a gana The Brothers 4-3, Isla 5-2 riba Otrabanda i Santa Rosa a dal Vosama 8-0. Den wega di Liga 50 Jandoret a gana Sigi Hunga 6-1. Nos ta keda te aki pa awe i te mayan ku Poder di Dios.
