Jaws kampion Liga van Engelen 2023
WILLEMSTAD- Jaws a dal Swift den dos wega stret pa bira kampion Liga van Engelen 2023. Swift tabata invikto promé ku yega e seri final, pero Jaws ku ta selebrando 50 aña di eksistensia a presentá desidido bou di maneho di Achie Bernabela pa bira kampion. Tur dos wega a tuma lugá djadumingu 22 di òktober na Van Engelen Ballpark i skornan tabata 10 pa 7 i 9 pa 4. Despues di wega tabatin entrega di premio.
NUMERITONAN
(WEGA 1)
Jaws 10, Swift 7
Jaws a dal 10 hit i hunga sin eror. Picher ganadó tabata Alexander Rodriguez. Alexander Rodriguez mes a bati di 2-2 komo mihó batiadó ku un homerun konektá. Ruwel Matrona tambe a konektá homerun. Swift a bati 10 hit i hunga sin kometé eror. Emilio Velarde tabata e picher pèrdèdó. Darwin Blanquecit a bati di 3-3. Dicson Acosta a konektá un homerun.
WEGA 2
Jaws 9, Swift 4.
Jaws a dal 10 hit i hunga sin eror. Jermaine Esprit tabata e picher ganadó. Raysheron Michel a bati di 3-2. Raysheron Michel i Ericson Senior a konektá un homerun. Swift a bati 6 hit i kometé 2 eror. Gedion Noor tabata e picher pèrdèdó. Nurison Leonora a bati di 3-2. Luigino Domacasse a bati di 1-1.
ENTREGA DI PREMIO
Teskto pa potret
Jaws den dugout durante wega.
Kampion: Jaws
Sup kampion; Swift,
Di Tres Lugá; Clase Aparte
Di kuater luga; Navegantes
Kampion Bate: Ryan Emers di Clase Aparte
Kampion picher: Emilio Velarde di Swift
Lider di homerun Geriyon Jakob (Clase aparte)
MVP di e play-off final tabata Jermaine Espirt di ekipo Jaws
MAS INFORMASHON DI SÒFTBÒL I BEISBÒL
Lesadonan di e kolumna Deporte Korsou bondia. Djarason nos tabatin mas di entrega di premio di Liga 50 ku a tuma lugá na Van Engelen Ballpark. Ekipo Ban Serio por mira atras riba un gran temporada, kaminda nan a haña hopi hungadó nobo i vários hungadó ku tabata den nan filanan promé, a bolbe bèk manera entre otro e pichernan Norman de Roon i Michelangelo ‘Galbao’ Boekhoudt.
%20copy.jpg)
* * * * *
Michelangelo ‘Galbao’ Boekhoudt tabata tremendo den final i a gana tur dos wega i bai di 5-4 na bate. Michelangelo ‘Galbao’ Boekhout tabata ku ekipo Marlins na 2022 i a bai Ban Serio bèk na 2023. Norman de Roon tabata ku Catpower den 2022. Tur dos hungadó tabata den Ban Serio un tempu kaba. Luigi Yanez a bati 3 homerun den e seri final i empuhá 10 kareda a bira MVP di e seri final. Bon públiko pa mira e weganan di final riba djasabra i djadumingu i tantu Liga Amstel komo Liga van Engelen a haña hopi fanátiko pa mira e weganan.
* * * * *
Ekipo Jaws a bira kampion di Liga van Engelen despues di basta aña. Nos no ta kòrda ta for di kua aña ekipo Jaws a bira kampion di e liga. Despues ku Baranka i Dalpega a bira kampion mas o ménos 7 pa 8 aña pasa, ta ekipo Swift a keda bira kampion ketu bai i na 2022 sigur tabata kampion invikto. Jaws a selebrá engrande djadumingu último despues ku nan a swip ekipo Swift pa bira kampion. Jaws a gana wega number 1 ku skor di 10 pa 7 ku bon relevo di Alexander Rodriguez. Den e wega ei Alexander Rodriguez a relevá e habridó Germaine Esprit.
* * * * *
Wega number 2 tabata mesun kombinashon atrobe pa gana Swift ku skor di 9 pa 4. Un final a la fastpitch kaminda pichernan ku ta picha ku gran velosidat a mira akshon, entre otro Esprit i Rodriguez pa Jaws, pa Swift tabata entre otro Gedion Noor, Emilio Velarde i Dicson Acosta. Tantu Liga van Engelen komo Liga 50 tin kampion nobo ku ta hasi e situashon mas interesante naturalmente. Liga Amstel lo start ku play-off djasabra awor na Van Engelen Ballpark.
* * * * *
E dianan aki kasi tur fanatiko di Beisbòl i Sòftbòl ta focus riba MLB su play-off ku ta tumando lugá aya na USA. Ekipo Texas a kita Houston for di kaminda ganando wega 7 relativamente fásil ku skor di 11-4. Texas Rangers a gana 4 wega i tur 4 wega ku Texas Rangers a gana tabata na Minute Maid Park, e parke di Houston Astros. Historia di 2019 a ripití kaminda ekipo Washington Nationals a gana World Series i tur e 4 weganan a keda gana den Minute Maid Park na Houston. Adolis Garcia tabata grandi den wega number 7 bayendo di 5-4 ku 2 homerun i 5 kareda empuhá.
* * * * *
E seri di Texas/Houston tabata bai bon bon te na momentu ku e picher Bryan Abreu di Houston a disidí di manda bala (hit by pitch) riba Adolis Garcia i brua tur kos. Weganan tabata bai deportivamente i den wega number 5 ku ekipo di Rangers ganá ku skor di 4-2 den di 8 inning i Abreu ta dal Garcia ku bala na su man robes ku un rekta di 97 mia. Pa nos tabata un bala intenshonal i korektamente umpire a saka Abreu for di wega. E hit by pitch a hasi Adolis loko i tabata buska bringamentu mas bien ku e kècher Maldondado. A saka Adolis Garcia tambe for di wega i e manager di Houston, Dusty Baker.
* * * * *
Finalmente e hit by pitch a pone ku Adolis a bini bèk duru i dal grandslam pa habri e wega for di otro. Den wega number 6 ku e skor 5-2 den di 9 inning Adolis ta dal grandslam pa hasi e wega 9-2. E sigiente dia, esta djaluna 23 di òktober den wega number 7 Adolis tabata bárbaro i ta konektá 2 homerun i 5 kareda empuhá. Asina ei Adolis a kibra e rèkòrt di 15 kareda empuhá den un seri di play-off den historia di MLB. Djamars ekipo Arizona a saka Philadelphia afó. Philadelphia di un manera òf otro a kuminsá broma un tiki dimas, stail di keda wak hungadó kontrali den kara, keda wak den dugout kontrali ets. Mester warda ora seri terminá òf ora World Series terminá pa broma. En todo kaso World Series ta Arizona Diamondbacks kontra Texas Rangers i ta start djabièrnè na Global Life Field na Texas. Nos ta keda te aki pa awe, te den próksimo dianan ku Poder di Dios.
.
