Jaws kontra Nos Tambe Por den gran final 60+
WILLEMSTAD- Jaws ku tin un siman ta warda lo topa ku Nos Tambe Por djadumingu awor 2’or pm den e promé wega di e gran final di Sòftbòl 60+. E seri final mihó di 3 lo tuma lugá den Frank Curiel Ballpark. Sigiente wega lo ta djadumingu 17 di novèmber i si ta nesesario e wega finalísimo djadumingu 24 di novèmber.
E ekiponan menshoná a topa otro na dos okashon durante e temporada regular i den e promé buelta ekipo Jaws a gana ku skor di 2-0 i den di dos buelta ekipo Nos Tambe Por a gana ku skor di 2-0. Durante aña 2024 e ekiponan menshoná a topa otro na vários okashon i e skornan tabata basta pareu. Jaws ta kampion temporadanan 2022 i 2023, miéntras Nos Tambe Por a bira kampion e añanan promé ku ta 2019, 2020 i 2021. Nos Tambe Por ta kampion di Dutch Caribbean Championship Masters 60+ dos aña sigí, 2023 i 2024.
Play-off final Liga 50 entre Ban Serio i Baranka djasabra awor kanselá te otro siman
WILLEMSTAD- Djasabra, 9 di novèmber 2024 pa 2’or pm mester a start ku play-off final di Liga 50 na Van Engelen Ballpark. Debí na entiero di miembro aktivo di Liga 50 Sòftbòl pa ekipo Pitufos, sr. Boy Constancia ku a fayesé djaluna, 4 di novèmber, e wega di djasabra a keda kanselá. Entiero ta tuma lugá Djasabra 9 di novèmber 2024 saliendo for di Misa di Jandoret pa Santana Katóliko na Jandoret. Ta risibí bishita di kondolensia for di 12’or di mèrdia te ku 3’or di atardi, siguí pa un Santo Sakrifisio di Misa pa 3:30’or.
FINAL LIGA 50
Ekiponan Ban Serio ku a terminá number 3 di kampionato regular lo topa ku Baranka ku a terminá number 5 di e kampionato regular (wild card). Ban Serio a swip Jaws pa yega final, miéntras Baranka a yega via wild card ganando di Flamboyan /Gamers i despues Sluggers pa klasifiká number 4, pa segidamente swip e ekipo Marlins den semi-final. Den temporada regular e ekiponan menshoná a topa otro na dos okashon. Ban Serio a gana Baranka na dos okashon, dia 6 di yüni nan a kibra e invikto di Baranka ganando 14-8. Den di dos buelta Ban Serio a gana Baranka 6-2. Baranka den e último parti di kampionato a buska hungadónan Ramiro Balentina i Ramsey Koeyers i reforsá nan ofensiva formal. E gran final aki ta un seri mihó di 3 i lo hunga djasabra 16 di novèmber, djasabra 23 di novèmber i si ta nesesario djasabra 30 di novèmber.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bonochi. Nos a drenta e hanchi di play-offnan semi-final i final di Sòftbol Slowpitch i pendiente pa play-offnan di Beisbòl Veterano tambe. Play-off Liga Amstel ta start djabièrnè awor na Van Engelen Ballpark kaminda number 1 di e kampionato regular, ekipo Gamers lo topa ku Cicoza. E wega ei ta 8’or i despues pa 9.30 ta sigi e wega entre Thrillers i Terremoto. Standing final ta Gamers 10-2, Cicoza 9-3, Thrillers 8-4, Terremoto 8-4, X-Treme 4-8, Terrepower 3-9 i Sugar 0-12. Segun nos Sugar a pèrdè tur wega (segun regla) despues ku ela pèrdè pa defolt 2 biaha. Play-off di Liga Amstel ta sigi djasabra 9 di novèmber ku 4 wega.
* * * * *
Deporte Kòrsou a risibí e tristu notisia ku Raymond ‘Boy’ Constancia di ekipo Pitufos i Isla Crackers a bai sosegá. Un gran amigu di nos for di tempu di skol i ku despues nos a militá huntu den Pitufos i Jandoret Raiders. Djaluna den oranan di mèrdia nos a risibí e notisia di parti di ruman di Boy Constancia ku ta Elston ‘Tonchi’ Constancia. Boy tabata di estatura grandi, bon pelotero for di tempu di Boca Stars, despues Pitufos, su ekipo Forsa/Chez Susenne huntu ku Shòti Balentina (QEPD), hopi aña gran lider i manager di ekiponan di Refineria Isla den Sòftbòl.
* * * * *
Boy Constancia ta tremendísimo kabayero, vòlibolista i futbòlista tambe tempu e tabata hóben. Un lider sin duda i hòmber di palabra. Manager i dirgente di algun ekipo den Sòftbòl Femenino Veterano, entre otro Unidos, Sin Stres ets. Diripiente Boy Constancia a bira malu na febrüari 2024 i sorprendé tur hende. Un kos inkreíbel mes mes. Boy tabata kuida su mama ku fayesé na novèmber aña pasá, na mei e aña aki su ruman hòmber grandi a fayesé repentinamente. Hopi forsa mes mes na nos amigu Elston ‘Tonchi’ Constancia, su primunan Edgar i Harvey Zimmerman di Pitufos. Forsa mes na ruman i famianan di Boy i Mundu di Slowpitch i Deporte kompletu. Ta nos hendenan di hopi aña. Djasabra ta entiero di Boy Constancia manera ariba menshoná.
* * * * *
Ban pa Liga 50. Kenny Hellement, picher estelar di Baranka tabata den gran forma den wikènt, pa asina Baranka klasifiká pa final ku dos viktoria impreshonante riba Marlins den play-off. Djasabra Baranka a gana Marlins 12-2 i djadumingu 10-0. Kenny a gana tur dos wega, permití 4 hit djasabra i solamente un hit djadumingu. Djadumingu Kenny a tira blankeo, one hitter i terminá e wega ku un walk off grandslam. Kenny a tira mas ku 50 ponche e aña aki den Liga 50, ku sigur ta un rèkòrt den e liga pa pichernan ku ta tira modified normal i no slingshot. Final entre Ban Serio i Baranka den Liga 50 djasabra 16 di novèmber lo bira kandela. Den kurso di dianan nos tin mas komentario i detayenan di e wega aki i kon a bai ku e dos ekiponan aki durante kampionato regular.
* * * * *
Djadumingu último e wega entre Jandoret Raiders i Broncos a keda empatá i lo tuma lugá djasabra awor pa 1’or na Vi Jansen Ballpark. Ta di 3 biaha ku e wega aki ta hunga. E wega aki a tuma lugá pa promé biaha djasabra 19 di òktober, pero a keda empatá na 7 kareda. Djadumingu 3 di novèmber e wega aki a keda empatá den e promé tie break i den e di dos tie break tambe. Den e promé tie break e wega a keda empatá na 9 kareda i despues empatá na 13 kareda. Segun reglanan di Beisbòl Veterano e wega aki mester keda hunga kompletamente di nobo i lo tuma lugá djasabra awor pa 1’or pm. Lo tin wega 10.30 am entre Isla Crackers i Marlins.
* * * * *
Play-off di Liga 50 di Beisbòl ta start djadumingu awor na Vi Jansen Ballpark. Pa 11’or lo hunga ekipo number 2 ku ta Jandoret Raiders kontra di Otrabanda ku a terminá number 3. Despues pa 2’or ta Santa Rosa Memories kontra di Volcano Energy ku a kaba number 4. Ta trata aki di play-off di un wega i e ganadónan lo pasa pa final. Weganan di play-off ta bai 7 inning. Djadumingu awor pa 2’or pm ta e promé wega di e gran final di Liga 60 entre Jaws i Nos Tambe Por na Frank Curiel Ballpark. Nos ta keda te aki pa awe. Ta djabièrnè ku Poder di Dios.
.
