Jaws ta dal Pitufos i bira kampion Liga 60 di 2023
WILLEMSTAD- Jaws ku picheo tremendísimo di Junny Pieter i bon bate i defensa di Rudsel Poulina, a bira kampion di Liga 60 di aña 2023. Jaws a gana Pitufos ku skor di 6 pa 1 dilanti un públiko grandísimo na Frank Curiel Ballpark djadumingu 17 di desèmber. E wega tabata empatá te den di 5 inning, pero Jaws ku tremendo bate ta habri e wega for di otro den di 5 i di 6 inning. E picher Anthony ‘ Junny’ Pieter ku tabata den gran forma tirando 7 inning kompletu a tuma 6 hit i un kareda limpi ku tabata un homerun di Elston Constancia di Pitufos. Despues di wega tabatin entrega di premio na ekiponan i hungadónan individual. E direktiva aktual por mira atras riba un bon trabou durante ana 2023. Tin hopi kambio di Liga 60 i naturalmente entre ekiponan tambe.
NUMERITONAN
Jaws a nota 6 kareda, bati 7 hit i no a kometé eror. Anthony Pieter tabata e picher ganadó. Desmond Brathwaithe a bati di 3-3, Marlon Romer di 1-1. Pitufos a bati 6 hit i hasi 2 eror. Lesley Martina tabata e picher pèrdèdó. Elston Constancia a bati di 2-1. Luis Coffie, Ruvio Kook i Sidney de Windt tambe a bati di 2-1. Elston Constancia a dal un homerun.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis siman. Nos ta den e último dos simannan promé ku aña 2023 yama ayó. Den kurso di e siman aki nos lo start ku e resumennan di loke a pasa den 2023. Na promé lugá nos lo tin e kampionnan di liga i tambe torneonan i tambe otro momentunan importante. Manera semper aña ta kuminsá ku informashon di Torneo Survivors i otro torneonan di Little League, entre otro torneo FABB. Nos ta kòrda ku varios liga di 2022 mester a terminá den 2023 debí na e palu di awa ku a kai den novèmber i desèmber di 2022. Liganan Amstel 2022, Van Engelen 2022 i Liga 40 a terminá den 2023. Liga 50 i Liga 60 di 2022 si a logra terminá nan kampionato den 2022, pero den luna di desèmber 2022.
Nos ta bini bèk riba resumen. Di fuentenan nos a risibí informashon ku ekipo Baranka lo drenta Liga 60 tambe. Hungadónan manera Sendley Reina i èks komandante di Brandweer ku ta Elvin Regina ta kla pa drenta Baranka huntu ku entre otro Aschwin Macaay ets. Siegfried Lopez ku den 2023 a hunga den Nos Tambe Por tambe su nòmber ta menshoná pa djoin Baranka. Liga 60 lo bira mas interesante ainda debí ku Baranka ta un ekipo ku ta hala fanátiko. Baranka lo ta huntu ku ekipo Curacao Super Stars den e promé añanan. Tin rumor ku Curacao Super Stars lo move pa Liga 70 despues. Curacao Super Stars ta ekipo di Rudy Brunken ku ta èks ekipo Flamboyan. Den 50+ tambe ekipo di Rudy Brunken, den e kaso aki Flamboyan a djoin ku Tigers i poko poko pero sigur e ekipo ta birando Tigers den Liga 50.
Andry Plaate èks hungadó i primu di Reinanan ku a lanta Baranka, ya a mèldu komo coach i lo ta serka di kas debí ku Liga 60 ta hunga na Frank Curiel Ballpark. Curacao Super Stars tin hungadónan manera Nelson Marks, Lionel Li, Frensel Brandao ets. Lionel Li i Frensel Brandao tabata den Dalpega tempu di nan tempu. Inac Jonis ets ta rumbo pa 59/60 aña. Richenel ‘Uchi’ Reina awor si lo subi tereno pa move un tiki rumbo pa 60. Captain Steven tambe lo subi tereno, pendiente di e hungadónan pa despues bira fanátiko bèk. Marlon Paz, un dje grandinan di Baranka tambe ta pendiente pa subi tereno bèk i Michael Regina èks centerfielder estelar. Remy Janga, Gilbert Denisia ets. Urvin Martina e aktual presidente di Liga 60 lo pasa pa Baranka. Saludo pa Joy Alberto fundadó di Baranka ku tin 93 aña i tei ketu bai.
%20copy.jpg)
Gai Lihe a duna un show kompletu djasabra den Klup Dupont na Winston Churhcillweg, un lugá ku basta espasio pa por tuma hopi hende. Gai Lihe a sera aña ku su ekipo Nos Goso den presensia di tur hungadó, dirigente i fanátikonan di e ekipo. Hopi hungadó di Santa Rosa Memories/Baranka 50+ tambe na e evento i hungadónan di Pichingolo. Gai Lihe a premia varios hungadó di Nos Goso ku a destaká den 2023 i pone e gran picher Carlientje Cleopa den lus. Carlientje Cleopa ku a resultá e MVP di Aña di ekipo a risibí un wasmashin masha grandi mes komo regalu. Carlientje a haña mas hopi regalu mas. Carlienjte tin 65 aña i ta pichando den gran forma ketu bai. Bebida tabata kore na òrdu pa despues di e parti ofishal tur presente por a saboriá un tremendo kuminda. Gai Lihe a anunsiá ku ofishalmente su negoshi Gai Lihe Tire Service & Muffler Repair lo spònser e ekipo di 50+ di Nos Goso ku ta ekipo Tur Goso. Durante e dianan benidero nos lo tin mas detaye.
Ekipo Quality Stars a honra nan spònser The Wine Cellar siman pasá. Quality Stars kampion e último dos añanan di Beisbòl Veterano a entregá e dos kopanan na e spònser. Hopi ekipo ta preparando pa sera aña den e dianan benidero i Extra lo publiká naturalmente si tin espasio. Pendiente di informashon di final di Liga 60, nos ta keda te aki pa awe. Te mas den siman ku Poder di Dios.
