Ban Serio vs Pitufos djasabra 4’or pm den Liga 50 na Van Engelen Ballpark
WILLEMSTAD – Di dos buelta di Liga 50 di Sòftbòl ta sigi kayente djasabra 30 di ougùstùs na Van Engelen Ballpark. Tin 4 wega i e wega kayente di dia lo ta entre Ban Serio i Pitufos [a 4’or pm. Ekipo Ban Serio ta komodo komo number 2 riba standing ku rèkert di 10 ganá i 2 pèrdi mientras Pitufos tin rèkert di 6-4 pero ku 5 wega sigí gana.
Ta for di 21 di yüni Pitufos a pèrdè un wega i tabata netamente kontra di e ekipo Ban Serio ku skor di 17-3. Otro weganan di djasabra 30 di ougùstùs p0a 10.00 Artemisia – Marlins, 12.00 Lions- Catpower/Raiders, 14.00 Sluggers – Baranka/Sharks, 16.00 Ban Serio – Pitufos. Standing up to date ta Jaws 10-1, Ban Serio 8-2, Catpower/Raiders 6-4, Pitufos 6-4, Marlins 6-5, Baranka Sharks 6-5, Lions 5-5, Flamboyan/Gamers 4-7, Sluggers 2-9 i Artemisia 0-11. Artemisia no tin chèns mas pa klasifiká. E lucha lo bai bira tenás entre Flamboyan/Gamers i Lions pa klasifiká komo number 7.
Jaws ta gana Baranka 13 pa 4 i keda na promé lugá den Liga 50
WILLEMSFRAD- Ekipo Jaws, number 1 den Liga 50 ku bon picheo di Fernando ‘Paiza’ Rosario ta gana ekipo Baranka ku skor di 13-4 den kontinuashon di di dos buelta di Liga 50. E wega a tuma lugá na Van Engelen Ballpark dilanti bon públiko i tabata e último wega di e 4 weganan ku a tuma lugá djasabra último. Ku e viktoria aki Jaws ta keda na promé lugá ku rèkert di 10 ganá i 1 pèrdí. Den e otro weganan Ban Serio a gana di e ekipo Artemisia ku skor di 18-2. Ban Serio a keda na di dos lugá ku rèkert di 8-2. Flamboyan/Gamers ku mester di viktoria a gana di Marlins ku skor di 6-4. Den e promé wega di djasabra Lions a gana di Sluggers pèrtá.
RESULTADONAN
Jaws 13, Baranka 4
Jaws a dal 16 hit i hasi 1 eror. Fernando ‘Paiza’ Rosario tabata e picher ganadó. Manuel Valdez i Amador Nita a bati di 3-3. Sigbert Juliana i Cedrix Valies di 2-2. Anthony Leonora a bati un homerun.
Baranka a konektá 7 hit i hasi 1 eror. Anthony ‘Junny’ Pieter tabata e picher pèrdèdó. Fisel Pereira a bati di 2-2.
Lions 5, Sluggers 4
Lions a konektá a dal 8 hit i hasi 2 eror. Gurtney Adriana tabata e picher ganadó. Sandy Marceli i Eugene de Palm a bati di 2-2.
Sluggers a bati 8 hit i hasi 2 eror. Axel Gomez tabata e picher pèrdèdó. Giovanni Martina a bati di 2-2, Raymond Lieuw a bati di 1-1.
Ban Serio 18, Artemisia 2
Ban Serio a dal 20 hit i hasi 1 eror. Miro Daal tabata e picher ganadó. Jair Josepha a bati di 3-3 i Charlton van Thijs tambe a bati di 3-3, Geronimo Daflaar di 1-1.
Artemisa a bati 3 hit i hasi 3 eror. Renato Anasagasti a bati di 1-1. Cedric Antonia i Denley Marten bati e otro hitnan pa Artemisia.
Flamboyan Gamers 6, Marlins 4
Flamboyan a dal 11 hit a hasi 2 eror. Eithel ‘Super Veterano’ Brunken tabata e picher ganadó. Egbert Polonius a bati di 2-2, Gerthon Martona i Rolling Eustatius a bati di 3-2.
Marlins konektá 12 hit i hunga sin eror. Norman de Roon tabata e picher pèrdèdó. Ian Leito a bati di 3-3.Giovertino Isebia di 3-2.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia i felis wikènt. Na promé lugá pabien na nos selekshon di vòli, selekshon di Kòrsou di vòlibòl ku a bira kampion di Karibe di vòlibòl (CAZOVA). Nos a reforsá stail di FFK ku vários hungadó ku ta hunga na Hulanda i bira kampion. Tremendisimo! Loke a resaltá segun nos ta e manera ku e selekshon aki a prepará. Un preparashon hopi serio kaminda boluntarionan ku nos konosé djaserka den Sòftbòl manera Remey Janga i Rigo Thode, ku a duna nan aporte. Janga i Thode no a forma parti di e delegashon i no a biaha ku e selekshon pero a train i duna nan aporte gratis na e selekshon. Remey Janga ta eks super estrea di vòli i ku a drenta salon di fama di FDOK i Rigo Thode ta eks hungadó, tremendo entrenadó i rèfri di vòli. Pabien na tur hungadó, federashon di vòlibol di Kòrsou i fanátikonan.
• * * * * *
Nos tabata gran fanátiko di vòli den añanan 70 i komienso di 80. Añanan 70 tabatin hopi gloria den vòli ku hungadónan manera Errol Rooi, Dito Ravenstein, Henky D’Arnault, Remo Martha, Edwin Walle, Toy Leend, Chris Bouwland i otronan. Dimes nos a menshoná algun den purá i hopi nòmber a keda afó. Nos ta sigi mesora pa Sòftbòl i Beisbòl. Liga 50 a sigi djasabra na Van Engelen Ballpark ku 4 wega. Den e wega di dia, ekipo Jaws ku ta number 1 riba standing a pasa relativamente fásil riba Baranka ganando ku skor di 13 pa 4. Ku e viktoria aki e Jaws ta keda na promé lugá ku rèkòrt di 10-1. Den otro wega Ban Serio a pasa fásil riba Artemisia pa medio di nòkout 18-2. Den un wega bon bringa Flamboyan a gana Marlins 6 pa 4. Flamboyan ta luchando pa drenta na di 6 òf 7 lugá. Lions na di 7 lugá a lucha formal pa gana di Sluggers 5-4. Dos wega emoshonante i dos wega ku a bai relativamente fásil djasabra último na Van Engelen Ballpark.
• * * * * *
Ban pa Beisbòl Little League. Aruba a kai vensí kontra di Chines Tapei (antes Taiwan) ku skor di 1-0. Un kareda shushi ku Chinese Taipei a hinka riba un hugada den kuadro den di 3 inning. Aruba a bati mas hit ku Taipei (4 kontra 3), pero Aruba a keda kòrtiku ku un tremendo presentashon. Tremendo selekshon ku lo sigi gana i yega Mundial den e kategorianan ku ta sigi manera Intermediate, Junior i Senior. Ta di dos biaha sigi ku Aruba ta bai Williamsport ku chèns di bai 3 biaha sigi debí ku Aruba lo ta sede di e sigiente serie del Caribe di Little League ku lo tuma lugá na nan pais na 2026. Ya un ke otro a keda firma na Williamsport pa Aruba ta e sede. Mientras tantu tabatin un ekipo di Kòrsou na Republica Domincana ku ta kompitiendo den U-12 ku ta Little League. Nos a pèrdè un wega krusial kontra di Republica Dominicana i kai afó ku rèkert di 3-2. Nos a gana un wega amistoso tambe i terminá ku rèkert di 4-2. Ganando e último dos weganan pa nòkout. Nos a gana 4 wega tur pa nòkout i pèrdè dos wega kontra dos grandi ku ta Republica Dominicana i Venezuela.
• * * * * *
Kòrsou a kai den grupo A huntu ku Aruba, Republica Domincana, El Salvador, Guatemala i Venzuela. Den e otro grupo tin Colombia, Haiti, USA, Meksiko, Panama i Puerto Rico. Ta trata di un kompetensia fueritsimo riba nivel di Panamericano mirando ku USA tambe ta partisipando. Nos Pais Television a transmití e weganan di Kòrsou e kampionato aki ku ta di 8 kampionato Panamericano. Djasabra Kòrsou a gana e ekipo di Guatemala ku skor di 11-0. E selekshon ta trata di un kombinashon di hungadónan di Liga Pariba i Liga Pabou ku a hunga di e kampionato di Karibe ku a tuma lugá den luna di yüli den Stadion Post 6. Djadumingu nos a keda den tereno kontra Republica Dominicana.
• * * * * * *
Pa loke ta trata Beisbòl Veterano , ekipo Santa Rosa ku tin algun refuerso hopi serio a gana di Yesterday ku skor di 13-7 djasabra. Roderick Eustatius a tira su promé wega komo picher pa Santa Rosa i bira e picher ganadó. Myson Cathalina tabata e picher pèrdèdó pero e mihó batiadó pa Yesterday bayendo di 3-3. Den e otro wega Broncos a dal Marlins 10-4. Nos ta keda te aki pa awe, te mayan ku Poder di Dios.
