Jaws vs Baranka djasabra 4’or den Liga 50 na Van Engelen Ballpark
WILLEMSTAD- Liga 50 ta sigi kayente den buelta number 2 na Van Engelen Ballpark i djasabra tin 4 wega. Pa ‘4or (prime time) tin e wega kayente entre Jaws i Baranka. Jaws ta den gran forma, number 1 riba standing ku rèkòrt di 9-1 i Baranka tin 6-4, ta na di 3 lugá empatá ku 3 otro ekipo.
E úniko derota di Jaws di temporada 2025 tabata kontra Baranka dia 24 di mei. Ekipo Jaws tin 7 wega sigí ganá, miéntras Baranka kampion di 2024 no a kue su ritmo ainda. Pa loke ta e otro weganan 10’or ta Sluggers – Lions, 12’or Ban Serio – Artemisia, 2’or Marlins – Flamboyan i 4’or ta Jaws vs Baranka. Catpower Raiders tin barwacht i Pitufos ta liber.
RESULTADONAN
Catpower/Raiders ta gana Baranka i Pitufos ta derotá Marlins den Liga 50
WILLEMSTAD- Di dos buelta di Liga 50 Sòftbòl a start djasabra último na Van Engelen Ballpark ku 4 wega. Den e weganan kandela Catpower/Raiders a gana di Baranka ku skor 8-6 i despues Pitufos a gana Marlins 11-3. Den e promé weganan den oranan di mainta i mèrdia, Flamboyan Gamers a gana Artemisia 15-11 i Jaws a derotá Sluggers 11 pa 7. Djasabra awor ta sigi ku buelta number 2 ku 4 wega.
Flamboyan /Gamers 15, Artemisia11
Flamboyan a bati 22 hit i hasi 3 eror. Eithel Brunken tabata e picher ganadó. Rollin Eustatius a bati di 3-3, Jair Quant di 4-3 ku un homerun. Artemisia a dal 12 hit i hasi 2 eror. Farly Lard tabata e picher pèrdèdó. Ingemar Soerka a bati di 3-3, Ericson Windster tambe a bati di 3-3.
Jaws 11, Sluggers 7
Jaws a dal 12 hit i hasi 2 eror. Fernando Rosario tabata e picher ganadó. Anthony Leonora i Manuel Valdez a bati di 4-3. Fransje Lambertina di 1-1. Sluggers a konektá 8 hit i kometé 1 eror. Axel Gomez tabata e picher pèrdèdó. Miguel Velasquez a bati di 3-3.
Catpower/Raiders 8, Baranka/Sharks 6
Catpower/Raiders a bati 8 hit i hasi 2 eror. Gibi Henrietta tabata e picher ganadó. Earl Virginia a bati di 3-2.
Baranka/Sharks a konektá 8 hit i a hasi 3 eror. Kenny Hellement tabata e picher pèrdèdó i Ramiro Balentina a bati di 2-2 ku un homerun. Fisel Pereira tambe a konektá un homerun.
Pitufos 11, Marlins 3
Pitufos a konektá 13 hit i hunga sin eror. Johan Cicilia tabata picher ganadó i Valies, Janga, Elcock i Rafael a bati di 3-2. Marlins a dal 7 hit i hasi 1 eror. Wilfried Soerka tabata e picher pèrdèdó. Patrick Elisa a bati di 1-1.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia i felis fin di siman. Otro fin di siman kargá ku weganan di Liganan 50, 60 i Beisbòl Veterano. Sòftbòl Liga 50 ta sigi kayente den buelta number 2, un buelta kaminda a repartí e timnan den dos pul pa despues pone e timnan huntu i sigi pa play-off. Di 10 tim, ta 7 tim ta klasifiká loke ta hasi e kompetensia fuerte te den lat. Den Beisbòl Dòbel A tambe ta laga mas ku 4 ekipo klasifiká, Beisbòl Veterano 40+ tambe i naturalmente Liga 50. Na 2024 Liga 50 Sòftbòl a hasi esaki pa promé biaha loke a resultá un eksito rotundo. Den Liga 50 tin 4 wega den wikènt i kandela 4’or pm na momentu ku Jaws topa ku Baranka. Den e artikulo nos tin mas detaye di weganan di Liga 50 di djasabra.
• * * * * * *
Djarason nos tabatin detaye di weganan di Aruba aya den e kampionato na Williamsport. Aruba a haña sede di Karibe di Beisbòl Little Legaue di 2026. Kòrsou lo mester partisipá ku solamente un ekipo na Aruba. Kòrsou tabatin dos chèns ku 2 ekipo na 2024 i 2025 i no a logra yega Williamsport. Na 2023 na Republica Dominicana (Punta Cana) a invitá dos ekipo di Kòrsou i segun nos tabata promé biaha ku na momentu ku tin un kompetensia di Little League un ekipo ku no ta sede tabata presente ku dos ekipo. Pa kolmo nos a bira kampion einan tambe. Kòrsou ta sede di Senior League na 2026 i 2027, ke men 3 aña sigí nos lo organisá Senior League aki na Kòrsou. Nos lo tin vários hungadó ku a bai Williamsport na 2022 i 2023 den e selekshon di Senior aki.
• * * * * * *
E siman aki den un grupo (whattsap group) tabata menshoná kuantu ekipo tabatin antes ku nos ta eksistí mas. Den Beisbòl a menshoná Blue Hawks, Amstel, Chicago, Seiberling, Cas Corá, Cienfuegos, Armendaris, Super Shell, Noord Janthiel Giantis, Dominguito Sugar Kings, Altamira Braves, Ponce Lions, Curacao Yankees, Cherokezen Stars, Santa Maria Kings, Sorpresa, Santa Helena Sluggers, Mundo Nobo i masha hopi mas. Den Sòftbòl Maskulino a menshoná Asiento, Rising Trotters, Twins, Nabco, Tiburones, Pichingolo, Haarlem Power ets. Tigres, St. Joris, Habitat 2000. Grapette Atletics, Old Spice Dimi ets. Bon einan niun no tei mas debí ku Sòftbòl Maskulino Fastpitch a wanta pa basta ratu.
• * * * * * *
Mas di Sòftbòl di Damas ta, Blue Angels, Blue Bells, St. Joris, Buena Vista Tigers, Apache, Sport Ambassadors, Hell Angels Piri Piri, Red Sox, Paradise Tropical Transport, Chesterfield, Atlanta Havenwerken, Multi Print Lakers. Mas di Beisbòl aki, Mahuma Tigers, Bison, Santa Rosa Cubans, Boca Stars, Jandoret Athletics, Lagun Stars. Kenneth Gijsbertha ta un maestro den historia di Beisbòl di Kòrsou i ela menshoná masha hopi ekipo di pasado ku no tei mas. Nos tin algun di futbòl i despues nos ta wanta. Futbòl; Estudiantes, Stormvogels, Riverside, Unidos, Rio Magdalena, Porta Blanco, Vasco da Gama, Veendam, Sta. Cruz, Wacker, Willibrordus, Wacawa boys, Deportivo Westpunt, Streanan Uni, Deportivo Portugues, Bello Horizonte, Charo Stars. Den e otro deportenan tmbe a menshoná masha hopi tim mes ku a keda menshoná den e group app.
• * * * * * *
Weganan di Beisbòl Veterano pa e wikènt aki ta, djasabra 23 di ougùstùs 13.00 Broncos -Marlins, 15.30 Santa Rosa vs Yesterday. Wega kandela ruman den e promé buelta Yesterday a gana di Santa Rosa pèrtá ku skor di 2-1 dia 28 di yüni. Djadumingu 24 di ougùstùs ta Santa Maria Pirates kontra di Azucar i Quality kontra di Otrabanda. Otrabanda a gana Quality fásil 7 pa 2 den buelta number 1. Ta úniko derota di Quality Stars e kampionato aki. Quality Stars ta kampion di Beisbòl Veterano 2022, 2023 i 2024. Den Liga 50 wikènt benidero ta 09.30 Jandoret Raiders – Volcano i pa 11.15 Santa Rosa Royal vs Wak e Kos. Weganan di Beisbòl Veterano 50+ ta djadumingu mainta na Vi Jansen Ballpark.
• * * * * * *
Manera ta konosi Beisbòl Veterano tin un direktiva nobo enkabesá pa Ruisandro Cijntje ku asistensia di Wimbert Hato i señoranan Laker i Sambo. E ùltimo simanan aki ta trabou tin. Liga 60 ta sigi kayente djadumingu na Frank Curiel Ballpark. E weganan ta 11.00 Nos Power- Sluggers, 13.00 Los Amigos – Curacao Super Stars, i 15.00 Jaws vs Nos Tambe Por. (kandela). Barwacht ta den man di Lions i Pitufos ta liber. Nos ta keda te aki pa awe, te mayan ku Poder di Dios.
