Kampionato di AA dediká na un gran baluarte: Alvin “Fichi” Fleming

Despues di apertura, partido kayente entre Santa Rosa Indians – ENNIA/ARCAS i Wild Cats – KJ74

WILLEMSTAD, - Kampionato Liga AA “Amstel Bright” lo ranka sali djasabra awor 7.30 PM den stadion Johnny Vrutaal (Rif). E aña aki e kampionato lo ser dediká na un gran baluarte di nos beisbòl lokal, señor Alvin “Fichi” Fleming. Señor Fleming no mester di masha introdukshon. Su eksitonan durante su añanan komo hungadó, tékniko i mènedjer lokal i di selekshon di Antias, tambe miembro di salon di fama di FDOK ta motibu sufisiente pa direktiva di FEBEKO a konsideré i duna honor na un pionero di nos beisbòl.

‍

Fichi Flemming miembro di Salon di Fama.

‍

‍

Meskos ku añanan anterior, kampionato di AA ta konta ku partisipashon di shete ekipo: Santa Rosa Indians – ENNIA/ARCAS, Wild Cats – KJ74, Santa Maria Pirates – CHIPPIE, Royal Scorpions “Mr. Baseball” – CPS/AGT, Groot Kwartier Stars – Mangusa, Firebirds – Landsloterij i Marchena Braves.

Fichi Flemming na apertura di Beisbol Veterano entre Kòrsou, Aruba i Hulanda.

‍

E aña aki e kampionato di AA lo hunga tres buelta. E promé buelta kada ekipo lo topa otro un biaha. E di dos i di tres buelta lo hunga segun e sistema ku a hunga aña pasa, esta “two-game series”. E fecha di inisio di kampionato AA lo ta djasabra 10 di yüli próksimo i ta programá pa terminá den di dos siman di òktober 2021.

Tur kos ta pinta di bai bira mas mihó ku aña pasá. E aña aki Distribier komo patrosinadó ofisial di e kampionatonan di FEBEKO a pone varios premio fabuloso pa opsekiá na nos fanátikonan ku bin presensia e weganan. Tambe lo bai tin varios “gimmick” durante temporada regular.

Liga AA “Amstel Bright” lo ranka sali djasabra awor for di 7.00 PM ku sake di promé bala di señor Fleming siguí ku e promé partido entre e kampion i sup kampion di temporada 2020 pa asina duna inisio na otro temporada di beisbòl di FEBEKO.

Direktiva kier finalisá invitando tur fanatikada di beisbòl pa bin apoyá bo ekipo faborito kuminsando djasabra awor 7.00 PM na stadion di rif. Pa garantisá bo entrada na e partidonan i disfrutá di diferente benefisionan, kòrda kumpra bo “Season pass” adelantá.

‍

‍