Djamars tabatin Konferensia di Prensa
Kampionato di Karibe di Senior League di 22 pa 29 di yüni den Tio Daou Ballpark
WILLEMSTAD – Djamars, 17 di yüni na RBC Rooi Catootji tabatin Konferensia di Prensa en konekshon ku kampionato di Karibe di Senior League 2025. E kampionato di Karibe lo tuma lugá di djadumingu 22 di yüni pa djadumingu 29 di yüni den Tio Daou Ballpark ku partisipashon di 6 ekipo.
Dos selekshon di Kòrsou i selekshonnan di vários país den region. Paisnan ku ta partisipá ta Aruba, Boneiru, Kòrsou Pabou, Kòrsou Pariba, República Dominicana i Puerto Rico. Na e Konferensia di Prensa tabata presente District Administrator sr. Floran, representante di spònser RBC Royal Bank, managing director sr. Pierrot Hurtado i branch manager sr. Sharier Dorand. Tambe tabatin miembronan di e komishon organisadó Norval Faneyte, Bryan Goilo i Eugene Sambo. Miembronan di direktiva di Liga Pariba (Eduard van Heyningen) Liga Pabou (Eugene Sambo) tabata presente.
Sr. Floran a hiba palabra i duna hopi detaye di e Konferensia di Prensa. Ela splika tur detaye en general pa después pasa palabra pa Norval Faneyte, Bryan Goilo i Neldrick Lourens di e komishon organisadó. Ku e kampionato aki na Kòrsou lo ta bon chèns pa nos por gana i regresá e kampionato Mundial na Easley South Carolina. Mayoria presente ta mira un final entre Pariba i Pabou di Kòrsou. Managing Director di RBC Royal Bank, spònser di Little League ya pa 25 aña i un dje spònsernan grandi di e kampionato, a splika atrobe dikon e patrosinio di RBC ku Beisbòl Little League i e kampionato di Karibe. Ela hasi un súplika na e fanátikonan pa kòrda bai weganan i yega tempran pa animá e ekiponan di Kórsou i tur hóben ku ta partisipá.
SPICH DI HURTADO
“RBC kier a hasi uso di e oportunidat aki pa un bes mas reafirmá nos kompromiso kontinuo ku desaroyo di deporte i proyekto komunitario na Kòrsou. Ku e organisashon di e kampionato di Senior League “Caribbean Tournament” aki na Kòrsou, nos ta kreando un bez mas “OPORTUNIDAT” pa nos hóbennan pa por demonstrá nan potensial. RBC ta sostené pa organisá e torneonan aki na Kòrsou, paso e ta duna nos hóbennan mas oportunidat den nan formashon di karakter, liderasgo i disiplina i krea amistat. RBC kier a invitá henter pueblo di Kòrsou pa bin apoyá nos hóbennan i tur e partisipantenan na e torneo.”
Sr. Floran a pone hopi énfasis riba e parti di seguridat i komportashon den Stadion di fanátikonan. Despues a sigui e sekshon di pregunta di Prensa.
