Kampionato di Liga 50 lo start na Van Engelen Ballpark dia 4 di mei
WILLEMSTAD – Kampionato di Liga 50 Sóftból lo start 4 di mei na Van Engelen Ballpark i no na Sam Bunting. Hopi ta di opinion ku tin Torneo Hope i e promé weganan di Liga 50 lo bai otro parke.
Weganan ta tuma lugá na Van Engelen Ballpark i weganan di Torneo Hope lo bai Vèlt B òf probablemente Hope lo mester a terminá kaba. Weganan di djasabra 4 di mei ta 10.00 Artemisia – Ban Serio, 12.00 Sluggers – Catpower, 14.00 Marlins – Pitufos, 16.00 Lions – Baranka. Jaws tin barwacht i Flamboyan ta liber.
Despues ekiponan Ban Serio i Marlins lo sali pa Aruba pa kompetí den Kopa ABC&S. Djasabra 11 di mei lo no tin wega di Liga 50 en konekshon ku Kopa ABC&S na Aruba. Kampionato di Liga 50 lo sigi djasabra 18 di mei kaminda lo tin apertura ofishal.
Nos Tambe Por i Jaws lider den nan pul den Torneo Lions
WILLEMSTAD – Ekiponan Nos Tambe Por i Jaws a gana dos wega den wikènt den Torneo Lions 60+ ku a tuma lugá na Frank Curiel Ballpark. Nos Tambe Por a gana di Los Amigos 6-0 djasabra i Curacao Super Stars ku skor 7-0 djadumingu. Jaws a dal Pitufos 8-2 djasabra i ekipo Sluggers 4-0 djadumingu.
Wikènt benidero no tin Torneo Lions 60+ en konekshon ku wikènt di Dia di Rei. E torneo ta sigui dia 4 di mei kaminda tur e 8 ekiponan lo hunga wega number 3. Djadumingu 5 di mei pa 3’or tin final i 11’or i 1’or tin weganan di konsolashon.
RESULTADONAN
Djasabra 20 di aprel.
Lions 9, Sluggers 4;
Jaws 8, Pitufos 2;
Mangusa 4, Curacao Super Stars 0;
Nos Tambe Por 6, Los Amigos 0.
Djadumingu 21 di aprel.
Pitufos 4, Lions 1;
Los Amigos 10, Nos Power 3;
Jaws 4, Sluggers 0;
Nos Tambe Por 7, Curacao Super Stars 0.
MAS INFORMASHON DI SÒFTBÒL I FUTBÒL
Fanátikonan di Deporte Kòrsou, bon dia i felis siman. Nos ta start un siman rumbo pa Dia di Rei i no tin masha aktividat deportivo riba e fecha menshoná. Lo tin aktividat di Dia di Rei den Punda, Sambil i na basta sitio na Kòrsou. Fin di siman nos tabata na Tio Daou Ballpark en konekshon ku play-off di Junior League. Liga Pariba ta mustra fuerte i ta faborito pa gana den e kategoría aki. Pabou tin dos título di kategoría kaba den 2023 den divishon Intermediate i Senior. Aña pasá tabata Pariba ku a gana solamente den divishon Intermediate ku ta netamente mesun hungadónan ku ta den Junior den play-off na e momentunan aki.
* * * * *
Resultadonan ta djaweps Pariba 10, Willemstad 0. Djabièrnè Pariba 3, Pabou 1. Djasabra, Pariba 19, Willemstad 5. Wega number 2 djasabra Pabou 13, Willemstad 0. Djadumingu Pariba 5, Willemstad 0. Pariba 12, Pabou 2. Ekiponan Pabou i Pariba a klasifiká pa e seri final mihó di 5 ku ta start djaweps awor den Tio Daou Ballpark. E ekipo ku gana 3 wega promé, lo klasifiká i lo representá Kòrsou den e kampionato Latino Americano di Junior League, ku lo tuma lugá na Managua (Nicaragua) di 5 pa 14 di yüli. Kòrsou ta kampion aktual di kategoría Junior riba nivel di Latino America. Kòrsou a hunga Mundial den kategoría Little, Junior i Senior temporada 2023.
* * * * *
Nos tabata presente tambe tantu riba djasabra komo djadumingu na Frank Curiel Ballpark den Torneo Lions di Liga 60+. Ekiponan Jaws i Nos Tambe Por tabata den gran forma den wikènt, ganando tantu riba djasabra komo djadumingu. Tin dos pul di 4 ekipo i ta solamente e ekiponan ku sali number 1 den nan pul ta klasifiká. Final lo ta dirèkt entre ekiponan number 1 di Pul A i Pul B. Ekipo Nos Tambe Por ta 2-0 den pul A i Pul B ta ekipo Jaws ku ta komandá ku dos viktoria. Den e artíkulo nos tin resultado di e weganan ku a tuma lugá djasabra i djadumingu. Tabatin dominó tambe kaminda Cliff den Hartog i Elaina Walter a dal Lucho de Wind i Danilo ‘Turbo’ Hanson un sapatu di 10-3. Weganan krusial, ke mèn e fecha ku tur ekipo lo hunga wega number 3 lo ta djasaba 4 di mei i finalnan lo ta djadumingu 5 di mei.
%20copy.jpg)
* * * * *
Pitufos ta pendiente pa anunsiá detayenan di e gran torneo ‘Golden Athlete Caribbean Championship’. Torneo kaminda tin partisipashon di ekiponan di Aruba, Kòrsou, Puerto Rico, Santo Domingo i Colombia. E torneo ta di 8 te ku 12 di mei den Stadion Post 6. Entrada ta gratis naturalmente. Jaws 50+ a bira kampion di e Golden Athlete Caribbean Championship Series ku a tuma lugá na Punta Cana (República Dominicana). Tabata aña pasá den luna di mei. Baranka tambe a kompetí den e torneo pa loke ta trata kategoría 50+. Pitufos a partisipá den e kategoría 60+ aña pasٔá. E aña aki ekiponan ku lo representá Kòrsou ta Pitufos, Sluggers i Jaws den 50+ i Pitufos, Nos Power i Lions lo tei den 60+. Baranka ta pendiente pa representá Kòrsou den 40+ na Boneiru riba e fechanan ariba menshoná.
* * * * *
Swift, Cicoza i Terremoto ta preparando fuerte pa Kopa ABC&S 2024 ku lo tuma lugá na Sint Maarten.
Swift a gana Cicoza den final pa a bira kampion Torneo Kopa ABC&S. Cicoza lo tei fuerte atrobe na Sint Maarten i ta pendiente pa nan picher refuerso ku ta Frensel Meyers. Den Kopa ABC&S ta stail di Fastpitch ta tira i práktikamente pichernan ku ta tira modified slowpitch manera normal no ta dominando mas. Ta pichernan manera Emilio Velarde, Alexander Rodriguez, Stanley Girigorie. Sint Maarten i Aruba tambe tin pichernan ku ta tira modified den gran forma.
* * * * *
Den Beisbòl Veterano ekipo Santa Maria Pirates tin un dream team pa kompetí. Nan tin hungadónan konosí i fuerte manera entre otro e picher Evenon ‘Nene’ Martis ku tabata un estrea for di Little League i tambe un deskonosí den Beisbòl ku semper tabata un tremendo hungadó ku ta Soranley Tomsjansen ku ta un gran futbolista, pero tremendo hungadó di Beisbòl tambe ku a stòp ku Beisbòl foi tempran i keda aktivo ku su ekipo di trabou den Torneo Hope. Santa Maria tin tambe Jason Naaldijk i Ringemar Raap. Ekipo Santa Rosa Memories tin un tremendo picher pa yuda estelar Ramses Jamanika. Nos ta keda te aki pa awe i te mayan ku Poder di Dios.
