Kampionato di Liga di Nos Tur dediká na Mayra Regina – Clarissa
WILLEMSTAD- Kampionato di Liga di Nos Tur 2020 ta dediká na Mayra Regina – Clarissa. Mayra Regina-Clarissa lo ta presente pa e apertura ofsihal di Liga di Nos Tur. Nos a risibí CV di Mayra Regina- Clarissa ku a stòp un tempu largu ku Sòftbòl, pa despues djoin bèk den Sòftbòl Femenino Veterano.
Relato di Mayra Regina-Clarissa den Sòftbòl.
Na aña 1972 Mayra Regina-Clarissa a kuminsá hunga Sòftbòl na edat di 14 aña den e tim “Aquilas Fundador” den A klase. E tim a ser fundá pa su sua Arthuro Solomons (q.e.p.d.). Mayoria di e miembronan di e tim tabata di e bario di Brievengat. Baba Quammie tabata entrenadó i manager di e ekipo i tabata ehersé un disiplina hopi stringente durante di trainingnan. E tempu ey su idoló tabata su ruman muhé Diana Solomons (q.e.p.d.) ku tabata hunga shòrtstòp den e ekipo. Mayra su posishon preferí den Sòftbòl tabata primera base. Durante e añanan hungando den Aguilas Fundador, Gurtney Jansen a dune e nòmber di Merikano dor di e forma ku e tabata “stofzuig” e balanan na primera.
Na momentu ku e tim a stòp di eksistí na aña 1980, Mayra tambe a stòp di hunga Sòftbol pa un temporada largu i a bai forma famia i dediká su tempu na su yunan. Semper ela keda un bon fanátiko di Sòftbòl.
Na momentu ku e liga veterano Deseo Streanan di Ayera a ser fundá dor di sra. Marlene Obispo, na aña1996 ku edat di 37 aña Mayra a bolbe haña e interes pa hunga Sòftbòl i a bira hungadó aktivo. Su promé tim den e liga di veterano tabatá Shalomi ku kual ela hunga 3 aña. Despues ku su amiga Ada Muteel a disidí ku e ta lanta su mes tim, ela pasa pa hunga pa e tim nobo Nos Amistat. Por sierto e nòmber “Nos Amistat” a ser kreá pa Mayra, enfatisando e amistat ku tabata reina entre e diferente hungadónan di e tim aki. Despues ku Nos Amistat a stòp di eksistí, Mayra a partisipá 1 aña ku e ekipo Nos Por i varios aña den e ekipo Wariors i aktualmente den e ekipo Shining Stars. Den Wariors Mayra a partisipá varios aña tantu den e liga Deseo di Streanan di Ayera komo den e liga Champs. E ta rekordá e korementu di un fèlt pa otro, kambiando di unifòrm pa kumpli ku tur dos liga.
Na aña 2010 su amiga Grace Girigorie a aserké pa forma parti di un tim nobo Shining Stars. Pues Mayra ta un di e miembronan di e ekipo Shining Stars di promé ora i ta formando parti di e tim ya pa 10 aña. Shining Stars a partisipá 7 aña den liga Deseo di Streanan di Ayera. Despues ku e Liga di Nos Tur a ser fundá Shining Stars a pasa forma parti di e liga nobo aki ya pa 3 aña. Ku Shining Stars Mayra a bira 3 biaha kampeon i 4 sub kampeon. Banda di ta hungadó, Mayra semper a pone su kas desponibel pa organisá tur reunion i otro aktividatnan sosial di e timnan ku e ta forma parti di dje. Pa loke ta e ekipo Shining Stars, Mayra su kas a bira e sede di e ekipo.
Den e liga 50+ di Liga Deseo Streanan di Ayera, Mayra a partisipa 1 aña ku e tim Golden Girls.
Na 15 mei 2016 Mayra huntu ku 5 otro hungadó a ser otorgá ku un plaka di mérito dor di e liga Deseo di Streanan di Ayera pa a kumpli 20 aña konsekutivo partisipando den e liga. Aktualmente e ta bai kumpli 24 aña konsekutivo partisipando den sòftbol veterano.
Ku sòftbòl veterano Mayra a biaha diferente biaha pa Aruba, Boneiru i St. Maarten pa partisipá na torneonan.
Mayra ta mira sòftbòl veterano komo un forma di rekreashon sano i e vehíkulo pa forma i mantené amistat. Finalmente Mayra su mensahe ta lo siguiente: Mientras bo salú ta permití, nunka no sinti bo grandi di edat pa bo hasi algu bon ku bo gusta den bida.
