Komentario di Pepi Sulvaran despues di derota di selekshon di Futbòl di Kòrsou kontra Sint Kitts & Nevis
KIKO AWOR? KAMBIO DI KUERPO TEKNIKO OF LEGUMAI E KOS AKI MES?
Di malu pa pio
Lokual a pasa djabièrnè 16 di yüni, ta un berguensa. Kòrsou ku yen di supuesto strea ku a traha nòmber den futbòl na Europa a wòrdu humiyá pa un isla di 47 mil habitante ku un solo hungado profeshonal di nivel. Un St. Kitts ku no tabata por, pero si tabata ke i a hunga ku alma i kurpa kontra nos selekshon ku a hunga sin niun klase di inspirashon den un desorganisashon total. Un selekshon ku no a prepará su mes adekuá i ku skohensianan kompletamente ilógiko. E no por ta un sorpresa si. Tur ku ta sigui e selekshon aki a mira nos bai di mal en peor. Ku un kuerpo tékniko ku no sa kiko e ta hasi i ku no tin kontròl. Nos por suma tur kos ku a bai robes último tempu, pero si nos kwe e wega aki so, e ta típiko pa kon brua kos ta bai.
Defensa
Den defensa tabatin por lo menos dos hungadó di nivel abou, di kual unu hasta hinter un aña kasi no a hunga bala. Shermar Martina, por lo menos for di yüni aña pasa te djasabra a hunga solamente 161 minüt den su ekipo na Zalgiris Lituania. Ta aprel ku a pasa so ela hunga bala, pa ta eksakto día 2, 7 minüt, día 5, 19 minüt, día 9, 51 minüt, día 15, 20 minüt i día 29, 64 minüt. Esei ta ménos ku dos wega den hinter un aña den un kampionato di ménos nivel. Ora Troupée ku a hunga bon a leshoná, Bicentini a disidí di hinka un amateur, Bradley Martis den wega, kaminda e tin dos hungadó di nivel Eredivisie riba banki. Felida ku por i a hunga tur kaminda den bolante i den defensa i Godfried Roemeratoe ku tambe ta di nivel Eredivisie i ku ta un bolante defensivo ankra ku bon físika, ku si por a duna bataya den medio kampo. E kambio lógiko mester tabata manda Leandro sentral kaminda e mester a kuminsá i saka Sherman Martina i hinka Felida rèksbèk kual puesto e ta dominá fásil ku su velosidat i téknika i pone Roemeratoe den bolante. No ta straño ku e gol di empate a kai riba e banda links di Shermar Martina i Martis, despues ku Floranus a move bai na banda drechi. No ku nan tabata esnan di mas malu riba tereno, esei tabata Juninho ku a hunga un futbòl egoista.
Bolante
Juninho a kwe un kustumber den selekshon otro for di den su ekipo Birmingham, di no laga e bala bai ora e hañe, pero di keda skak te ora e pèrdè e bala. Futbòl ta deporte di konhunto. Aparentemente no por a pone sinta i mustre ku e kos ku e ta hasi ei no por. Ta bon kla ku e ta balotá e ekiponan di región i niun hende no por bise nada. Pa kolmo e no ta yuda defendé tampoko, pero komo bolante ta keda para warda dilanti pe haña bala. E bolante tabata debil i esei ta lógiko. St. Kitts ta hunga bala riba puro forsa fisiko i Anita ya tin 34 aña i no tin un físika imponente.
No ku ela hunga malu si, pero defensivamente e tabatine difísil. Leandro den un aña apenas a hunga bala. Mitar aña e la para ketu i for di yanüari apenas a hunga regular na Watford i klaramente falta ritmo di wega. Pesei Leandro den sentral kaminda no tin hopi opshon, na luga di bolante ta unu lógiko. Gaari tabata afo pa karchi. Si nos no tene kuenta, meskos ku otro talentonan hoben, nos lo pèrdè Roemeratoe ku Felida tambe. Nan tampoko no ta bai keda bin pornada pa mira hungadó amateur i di ménos nivel wòrdu alinea promé ku nan. Ku un Roemeratoe un bolante defensivo di bon físika, nos lo por a neutralisá St. Kitts. E trabou tabata muchu pa e veterano Anita i Leandro. Pesei St. Kitts ku un Romaine Sawyers diktando den bolante, a kome nos e último 20 minüt mei mei di tereno. Nos tabata sa di Sawyers pero tòg a lage hunga manera e ke sin niun plan di wega pe.
Delantero
E kambio di Locadia ta inkomprendibel si e no a leshoná. Un hungado ku a hinka gol pabo, kaminda bo mester di e di dos gol pa mata e wega. Na promé lugá e ta un sentro delantero. Pa akomodá Janga a pushe den un sorto di linksbuiten falsu òf mediokampo riba ala. Dikon no hunga ku dos sentro delantero? Pa hasi kos mas pio, ta hinka un delantero hubenil riba nivel 3 na Belgika na su luga. Si Locadia no a leshoná esaki ta un humiyashon.
Mester bin kambio anto pura
Atrobe e wega aki ta prueba ku e kuerpo tékniko aki ta un chumbu na pia di e selekshon, pesei nos lo sigui bai abou. Den tòpsport ta resultado so ta konta i midi na esei, nan sifra ta 0. E ora ey ta un solushon so a sobra. Retiro inmediato pa hinter e kuerpo tékniko, paso e soño di mundial aki ta bayendo mas den direkshon di pesadiya. Un beki Liga di Nashon i pre-mundial ta kuminsá i un kos ta sigur, riba e ruta aki no por sigui. Of kisas mester legumai hinter e asuntu aki ku ta kosta nos hopi sèn sin resultado. Un desishon mester kai si, anto for di masha día.
