Komunikado Biyar i Centro Barber ta yama danki
WILLEMSTGAD - Otro tremendo evento di Federashon Biyar Korsou a tuma lugar wikènt último. Kampionato nashonal 14.1 kontinuo ,mihó konosí komo straight pool a konta ku partisipashon di 19 biyardista. Manera kustumber e evento tabata patrosiná pa Montana Bierhuis y House of Billiard Play . Den buelta di ganadó e number un di Kòrsou , Jeffrey Nieuwenhuijzen ta kai vensí na man di Hugo Limon ku skor di 75 pa 36 . Den e otro partido Fauzi Halaby ta gana Fyrich Benschop 75 pa 62. Den e promé wega di semifinal Halaby ta gana ku skor konvinsente di Limon , 100 pa 60 i ta pasa pa final .
Den buelta di pèrdèdó e bataya tabata fuerte pa mira ken ta yega final. Michael Arvelo ta gana Fyrich Benschop 75 pa 47 y Nieuwenhuijzen ta gana Sybren Boekhoudt 75 pa 61. Aki Nieuwenhuijzen ta inisiá su ruta pa final ganando despues Arvelo y Limon pa e okupá su puesto den final. Un tremendo partido a keda presentá pa e públiko ku a biba ku e bon wega i tirunan ehekutá pa ambos finalista . Tantu Halaby i Nieuwenhuijzen no a baha kabes pa otro , pero mester tin un ganadá. I esaki a resulta Jeffrey Nieuwenhuijzen ku ta gana ku skor di 125 pa 112 y asina bai ku e título . E resultadonan final : Empatá na puesto 5 , Fyrich Benschop y Sybren Boekhoudt , no 4 Michael Arvelo , no 3 Hugo Limon , supkampion nashonal Fauzi Halaby y Kampion Nashonal Jeffrey Nieuwenhuijzen. E sigiente evento pa luna di april lo ta e disiplina di bola 8 . Federashon Biyar Kòrsou ta ekstende un palabra di felisitashon na e kampion i sobra finalistanan.
Centro Barber ta yama danki
WILLEMSTAD.- Direktiva di Centro Barber ta yama danki na tur ku a duna un man pa limpia e roinan situá na vèlt di Barber i tambe dilanti Parke Himno i Bandera na Barber. Pa basta tempu kaba Centro Social Deportivo Barber tabata sklama pa hasi algu na e yerba i palunan ku a krese den e roinan den serkania di e tereno riba kua e ekipo ta práktika. Ta konstantemente nan tabata pèrdè bala durante entrenamentu anochi i esaki tabata kosta e ekipo hopi sèn.
Pero resientemente algun abitante a reuní i huntu a hasi e limpiesa nesesario na entre otro e roi situá pega ku e vèlt i tambe esun situá pega ku e Parke Himno i Bandera. Sigur un tremendo gesto di parti e esnan ku a disidí na uni pa tuma akshon i no warda riba instansianan di gobièrnu pa hasi esaki.
Centro Social Deportivo Barber no ke menshoná nòmber mirando ku ta diferente persona a duna un man, pero si ke probechá pa gradisí tur ku sa ku nan a koperá i traha duru pa yuda tene e bario limpi i duna Centro Social Deportivo Barber un man den esaki.
Centro Social Deportivo Barber ta gradisí tur ku e koperá ku e ekipo i e bario di Barber kompletu i ta boga pa ban sigui ta uní pa adelanto di e ekipo i di e bario di Barber kompletu.
