Kon ta pará ku selekshon di Futbol FFK rumbo pa Qatar 2021
Skibi pa Pepi Sulvaran
WILLEMSTAD.- Nos a kaba di pasa e promé ronda dje promé buèlta klasifikatorio pa Mundial. E balansa ta positivo te ainda, pasobra nos a gana tur dos wega i ta liderá grupo C di CONCACAF. Den tòpspòrt gana ta e meta primordial i esei nos a hasi. Pero si ta Mundial nos ke yega, tin hopi espasio pa mehorashon.
Un di e áreanan ta e nesesidat di mas hungadó di nivel. Dia a kontratá Hiddink, un i tur a spera ku awor si nos lo haña mas futbolista di nivel haltu. Hiddink no a kumpli den e aspekto importante ei. Esei tin su motibu. E kambio di Bicentini pa Hiddink a produsí hopi remarke i komentarionan negativo den medionan di futbòl renombrá na Hulanda, entre otro den Voetbal International i Voetbalzone. Aki tantu Hiddink, FFK komo Remko a faya. Hiddink pasobra e la bai propagandá su mes komo e remplasante di Remko sin ku kosnan tabata reglá, Remko pasobra e la akudí na medio di prensa ulandes hungando víktima i kritikando tantu FFK komo Hiddink, papiando di “su” selekshon, sabiendo ku un kambio pa e manera ku kosnan tabata bai tabata inevitabel den tòpspòrt i ‘last but not least’ FFK mes, ku no a atendé e asuntu aki bon ni ku Hiddink ni ku Bicentini.
Konsekuensia tabata ku den medionan ulandes, nos selekshon i FFK a wòrdu presentá komo un novela bruá i Hiddink komo un figura sin eskrúpulo ku a pasa tras di lomba di Bicenti. Tur e propaganda negativo aki nèt den e pais kaminda tin ku rekrutá kasi tur potensial kandidato pa selekshon.
Te ainda Hiddink meresé e benefisio di duda, pero esaki ta tòpspòrt. Si e no trese mas hungadó di nivel, nos no ta bai yega Qatar. Si Kuwas i Lachman bin aserka, nos ta poko mas fuerte i kisas por pasa riba Guatemala i porta asta Panamá, ku no ta pasando den su mihó momentu, awor ku su generashon di oro ku e la bai e lastu Mundial kuné a pasa nan mihó tempu i mayoria a bira veterano.
Si nos bin kai den e lastu ocho sin refuerso, lo bira difísil pa no bisa imposibel. Den CONCACAF, México i Merka ta e dos gigantenan i tantu Canada komo Jamaica ta bin ku hungadónan ku ta hunga den liganan grandi. Ademas tin Costa Rica, ku semper ta den pelea pa sea e 3 puestonan ku paso direkto òf esun di kuater di repechahe. Si Hiddink no logra refuerso pa yüni awor, mester kuminsá pensa serio pa agregá òf buska un entrenadó hóben manera, entre otro, Aaron Winter, Clarence Seedorf, Hedwiges Maduro pa pone banda di Hiddink ku tin su edat i eventualmente remplas’é. E realidat ta ku e eks hungadónan ku nòmber kendenan awor ta entrenadó, ta apelá mas na e hungadó aktivo, pasobra no tin e buraku di edat. Pa bo yega Mundial komo pais chikitu, bo mester hasi mas i tur kos rondó di selekshon mester ta perfektamente reglá.
Ademas, selekshon ta algu di nos tur, di pueblo. P’esei mester enbolbí e fanatikada ku mas informashon i embolbimentu di prensa lokal. Esei tambe ta un área ku mester drecha. Nos pais ta hóben den e trayekto aki i mester siña hopi ainda, pero boluntat mester tei si. Ke men ban enbolbí e fanatikada i prensa lokal mas ku nos selekshon. Mester splika Hiddink esei tambe. E promé dos weganan a bai bon, pero nos ta leu for di yega. Huntu nos mester sostené e selekshon, pasobra ta algu ku por trese hopi alegria pa nos, spesialmente den e tempunan difísil aki.
Di otro banda mester keda kritiko i ophetivo pa por drecha lokual mester pa yega nos meta Qatar 2022. Awor aki pa lokual ta trata hungadó mester di un òf preferibel dos defensa sentral, Cuco i Suently Alberto a presta bon, pero realidat ta ku ámbos tin hopi tempu sin ekipo i e dos promé kontrinkantenan no ta pertenesé na esnan mas fuerte di nos region. Defensa sentral huntu ku kiper, bolante armadó di wega i delantero goliadó ta esensial di tur ekipo di futbòl.
Den bolante nos nivel ta tòp ku e yunan di John Bacuna, tambe Anita i Bonevacia, ku ohalá por haña un ekipo lihé. Un sentro delantero òf spits goliadó manera nan ta bisa, tambe lo ta hopi bon biní. Mentalidat luchadó nos tin kaba ku guerieronan manera entre otro Bacunanan, Anita, Cuco i Benschop riba tereno. Esei nos a demostrá kontra Cuba, ku no tabata nos mihó wega, pero ku nos a gana riba mentalidat i eksperensia.
Yüni ta un luna importante pa nos, ora nos topa tras di otro Guatemala i eventualmente Panamá. Weganan di bida i morto kaminda nos lo tin di duna tur kos riba tereno di wega. Ke men ainda tin ‘Pantera Negra’ pa ratu i den nos kueba na Brievengat, nos no ta pèrdè fásil. Asina ta, fasiná pa nos yena e lugá ‘rant-rant’.'
