Kopa ABC&S 2026 ku partisipashon di isla Saba
WILLEMSTAD - Saba, e isla mas chikitu ku apénas 2000 habitante, lo partisipá den Kopa ABC&S 2026 ku lo tuma lugá na Aruba. Nos a risibí e notisia aki for di Sergio Leon, kende ta un di e dirigentenan di Kopa ABC&S. Na aña 2026, Kopa ABC&S lo kumpli 40 aña di eksistensia, desde ku e kopa a keda fundá pa entre otro Chai Curie. Aña 2025 tabata e di 39 kampionato ABC&S den historia di e torneo. E kompetensia a start na 1984 i solamente den e añanan 2020, 2021 i 2022 no tabatin torneo debí na e pandemia di Covid-19.
E torneo a kuminsá originalmente komo Kopa Antiano di Bush League entre e ekiponan Terremoto di Kòrsou i Astros di Aruba. Despues ela bira Kopa ABC na momentu ku Boneiru a djòin e torneo. Ku tempu, Sint Maarten tambe a uni i den último añanan ekipo di Sint Eustatius tambe a drenta e kompetensia. Awor, ta turno pa e ekipo di Saba djòin e famia deportivo aki. Keda pendiente pa mas detaye di Kopa ABC&S.
Direktiva di BEVEKO buskando miembro pa tuma over
WILLEMSTAD – E direktiva saliente di BEVEKO, enkabesá pa Ruisandro Cijntje, a hasi un yamada dramátiko na e timnan pa, por fabor, manda miembronan pa por dirigí Beisbòl Veterano pa e temporada 2026.
Ruisandro Cijntje i su ekipo di trabou a hasi un tremendo labor durante aña 2025 i a baha lagando un saldo positivo den e asosiashon. Sinembargo, parse ku no tin masha interes entre e miembronan pa karga e direktiva nobo. Djasabra último, Ruisandro a manda un karta den e grupo di WhatsApp pa pidi e ekiponan pa manda kandidatonan pa tuma e mando over. E direktiva aktual ta dispuesto pa organisá un elekshon, pero mester tin interès real di e miembronan. Na aña 2020, Ruisandro Cijntje tabata den direktiva kaba i a skohe pa bini bèk na 2025 na momentu ku e direktiva anterior a entregá nan retiro.
Elmer ‘Bill’ De Wind gran picher di Sòftbòl Slowpitch a bai laga nos
WILLEMSTAD – Un gran picher i tremendo persona, Elmer ‘Bill’ De Wind, a bai sosegá djabièrnè último, 9 di yanüari. Bill, kende tabatin 70 aña di edat, a hala un poko tras di deporte últimamente, pero semper bo por a mir’é trankil pafó di su kas na Ronde Klipweg.
Bill tabata un tremendo picher den e tempu di oro di Slowpitch, pichando hopi aña pa e ekipo Swift. Ela traha hopi tempu na SKS i despues a pasa pa Kuerpo Polisial Kòrsou. Un gran kabayero ku tabata bini di un famia deportivo ku a hunga tantu Sòftbòl komo Beisbòl.
Nos a papia ku Wim Felicia, kende tabata un gran amigu di Bill. Wim a konta nos ku Bill tabatin un tremendo rekta i un bon "knuckleball" ku tabata kita bai afó i dominá e batiadónan. Bill De Wind a hunga tambe den Sharks den Liga 50 na komienso di añanan 2010. Despues ku vários hungadó a move pa e ekipo Ban Serio, Bill a stòp di picha Slowpitch mas o ménos na aña 2015. Nos ta kòrda Bill De Wind tambe den ekipo Monarch Bols, Nos Ku Nos i un ratu den 50+ ku ekipo Los Amigos huntu ku Wim Felicia. Ku su fayesimentu, deporte ta pèrdè un gran baluarte. Nos kondolensia i forsa na famia i amigunan di Bill De Wind.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia. Nos tei atrobe ku informashon di Beisbòl i Sòftbòl. BEVEKO ta buskando kandidatonan pa direktiva nobo di Beisbòl Veterano. Tin vershon ku lo buska kontakto ku Armin Konket pa wak si e tin interes pa drenta e direktiva. Manera nos a skibi anteriormente ekiponan mester move sino ta bira imposibel pa start e kampionato 2026. Probablemente ekiponan ta kere ku e tim di Ruisandro Cijntje i Wimbert Hato lo keda pa un temporada mas. Miéntras tantu nada nobo tokante e moveshon di ekipo Yesterday. Vários hungadó ta bayendo otro ekipo, dos hungadó a anunsiá ku nan lo move sigur ta Andrelton Simmons i Zhurendel ‘Chong’ Ilaria.
* * * * *
Nos a topa e primera base picher di Yesterday, Myson Cathalina siman pasá djabièrnè i ela bisa nos ku e no sa kiko ta bai pasa. Ekipo Quality Stars lo keda fuertísimo ku atkisishon di e hungadó Andley Simmons i no ta konosí den kua ekipo hungadónan manera Dave i Randy Kirindongo lo bai hunga. Mester bisa ku Beisbòl Veterano a kai bastante di 13 ekipo pa 8 ekipo. Liganan 40 tambe ta kayendo i esun di Sòftbòl a pasa pa historia apesar ku ta masha hopi hungadó ta riba 40 òf ta yegando 40 aña. Liga 50 a krese formal den Sòftbòl miéntras den Liga 50 Beisbòl si a keda wantá. Na 2025 tabatin 5 ekipo i na 2026 lo tin 4 ekipo debí ku Jandoret Raiders a stòp di hunga Beisbòl.
* * * * *
Djaweps 15 di yanüari Jandoret Raiders lo rekordá e echo ku 30 aña pasá e ekipo a keda fundá. Vários hungadó di Jandoret Raiders ku tabata forma parti di Heartbreakers a bai huntu den Jandoret Raiders i algun a keda ku Heartbreakers. E ekiponan tabata topa otro den weganan kandela na Trai Seru, kaminda den komienso mayoria tabata Heartbreakers ku tabata gana. Despues e kosnan a bòltu i Jandoret Raiders a kuminsá gana. Jandoret Raiders a keda fundá i mesun aña nan a titulá kampion di Liga Trai Seru, esei ta aña 1996. Despues di vários supkampion i kampion di torneonan Jandoret Raiders a pasa pa Liga Un i Tur na aña 2005 i bira kampion di e liga aki na vários okashon. Na 2012 Jandoret Raiders a pasa pa Beisbòl Veterano i einan a logra 5 título di 40 i 6 título di 50. Un dinastia total tempu di Jandoret Raiders su tempu den Beisbòl Veterano. Ekipo Quality tin 4 kampionato sigí i e aña aki lo bai trata na empatá e rèkòrt di 5 aña kampion sigí di Jandoret Raiders.
* * * * *
Pa loke ta Liga 60 nos tin informashon kayente pa loke ta trata hungadónan ku lo kambia di ekipo i hungadó ku lo bai start den Liga 60 den 2026. Sedeney ‘Spin’ Lourens lo drenta Nos Tambe Por den luna di sèptèmber, tambe Herbert Balentina i mas despues Stanley Palm tambe lo djòin. Un grandi lo bandoná Pitufos i bai Nos Power den Liga 60. Baranka ta tirando bara di hak den awa di vários tim. Richard Campagnard di ekipo Curacao Super Stars siman pasá a bisa nos ku e no ta bai niun kaminda i e lo keda trankil den ekipo Curacao Super Stars ku no a logra gana niun wega den Liga 60 den 2026. E ekipo a terminá ku rèkòrt di 0-14. Mon Repos Sluggers no tabata muchu leu i nan a terminá 3-11. Mon Repos Sluggers tambe lo move pisá pa bini ku hungadónan nobo den 2026. Grandinan manera Junny Marselia no por a yuda nan ekipo den 2025. Ivan Constancia a anunsiá for durante kampionato ku e lo move di Mon Repos Sluggers i bai hunga serka su famianan di Boca Sami ku ta ekipo Pitufos.
* * * * *
Djaluna tabata último fecha pa inskribí pa Torneo Survivors ku ta start djasabra 24 di yanüari riba dos terneo, Stadion Post 6 i Sam Bunting Ballpark pareu. E sigiente wikèntnan lo hunga solamente na Van Engelen Ballpark. Despues lo sigi Amstel Bright Premier Cup organisá pa ekipo Cicoza. Siman pasá nos a risibí e tremendo notisia di ku isla Saba tambe lo bai hunga den Kopa ABC&S 2026. Un isla chikitu di 2000 hende i ku ta traha un tim pa kompetí den e di kuarenta Kopa ABC&S 2026. Nos ta keda te aki pa awe. Te mayan ku Poder di Dios.
