Kòrsou a pèrdè djaluna kontra Puerto Rico i lo topa Venezuela awenochi 7.30
CARACAS – Kòrsou a pèrdè ku skor di 3-1 kontra Puerto Rico djaluna 6 di febrüari i lo topa doñonan di tereno, pais sede Venezuela, djamars 7 di februari, pa 7.30 di anochi. Ekipo Korsou a hasi vários kambio den alineashon djaluna kontra di Puerto Rico, pero atrobe e bateo oportuno no a presenta i nos a kai vensí pa di dos wega sigi. Nos rekòrt a bira 2 ganá i 3 pèrdí i lo bai topa dos grandi, Venezuela djamars i Republica Dominciana djarason. Djaweps lo tin play-off semi-final entre ekiponan ku terminá 1,2,3 i 4. Djabièrnè 10 di febrüari lo tin e gran final.
DJALUNA
Puerto Rico a sali nota 2 kareda den bòm di promé inning kontra di e picher habridó Jordan Lucas. Den di dos inning Nelmerson Angela a drenta i tuma solamente un kareda den 5 inning tirá. Kòrsou a nota un kareda empugá pa Sharlon ‘Wecho’ Schoop. Hungadónan estelar Johathan Schoop, Coco Balentien i Roger Berandina no a mira akshon pa Kòrsou. Juremi Profar a drenta na lugá di Aldrich de Jongh den di 3 inning. Jonathan Schoop i Coco Balentien tabatin un dia pa sosegá I Roger Bernadina ta leshoná.
Puerto Rico a nota 3 kareda bati 7 hit i hunga sin kometé eror. E picher relevista Wirchansky a gana i Castro a bati di 3-2.
Kòrsou a skor na un okashon, bati 4 hit i kometé 1 eror. Jordan Lucas tabata e picher pèrdèdó. Ray Patrick Didder, Sharlon Schoop i Dashenko Ricardo a bati di 3-1. Dudley Leonora a bati e otro hit pa Kòrsou. Pichernan ku a tira pa Kòrsou, Jordan Lucas (1.0), Nelmerson Angela (5.0), Ryan Huttington (1.0), Kevin Kelly (1.0).
