Kòrsou kampion Mundial di Little League i eksitoso selebrashon
WILLEMSTAD- Kòrsou a gana Nevada (Mountain) ku skor di 11-12 i bira kampion Mundial di Biesbol Little League. E final a tuma luga djadumingu 30 di ougùstùs 2026 na Williamsport Pensilvania. Un selekshon di historia ku a bira kampion invikto i ku a permití apénas un kareda limpi. Nos tin basta luna ta bisa ku e selekshon aki tin tur kos pa bira kampion di Mundu mirando e picheo ku e selekshon aki tin i kuantu hungadó por picha di e selekshon aki. Ainda mester bisa ku Steven Felix ku tabata práktikamente picher number dos di e selekshon aki a picha apénas dos tersio di inning. Un selekshon di historia ku a bira kampion invikto ku un tremendo picheo i defensa. No papia mes di e bateo ku ora di bèrdat a hasi e trabou. Nos tin un resumen di kiko a pasa despues di a bira kampion.
RESEPSHON
Resepshon na aeropuerto i despues bai Renaissance kaminda e muchanan, henter e delegashon, prensa i dirigentenan di Little League por a kome i bebe algu. Banda di 6’or a start ku e òptog for di Plaza Hariri rumbo pa Brionplein. Bon trabou mes di departamentu di Kultura i Deporte enkabesá pa sra. Lisette Sambo-Velder i su crew. Na Brionplein tur hende a bria, for di speechnan te ku baila i aktuashon di One Flavas. E muchanan a baha for di e trailer i subi stage na Brionplein riba guia di MC Glenn Thomas ku a habri e programa. A sigi orashon di pastor Curtis Meris, sigí pa Himno di Kòrsou interpretá pa Aaliyah Lourens.
BRIONPLEIN/SELEBRASHON
Manager di selekshon di Little League, ku ta Raylson ‘Sontje’ Gijsbertha, a dirigí palabra I tambe manager di selekshon Senior League, supkampion di Mundu, Charlie Merite. Spònser di Little League ya pa 26 aña, RBC Little League, a wòrdu representá pa sra. Darice Thode-Vornis i Sharier Doran. Nan dos a dirigí palabra na e presentenan na nòmber di RBC i despues tabatin aktuashon di grupo di baile Explotion Dancers i presentashon di kantante Jada van Dijk. Presidente di Staten. Fergino Brownbill, ministernan Charetti America-Francisca, Shalton Hato i Charles Cooper a dirigí palabra i despues a sigi antregá di vários regalo, entre otro un van bus nobo pa e manager Sontje Gijsbertha su organisashon. Sontje Gijsbertha durante su añanan tabata move den su propio outo ku basta mucha i mester skirbi ku ta un tremendo gesto di Gobièrnu.
E muchanan di tantu Little komo Senior a risibí un gift check di 1000 florin pa gasta na Tapirama i mas despues 3000 florin riba un kuenta di banko. Mester menshoná tambe e aktuashon tremendo di e grupo Explotion Dancers ku a duna un show kompletu durante anochi.
Finalmente, e organisashon di komersiantenan di Otrobanda den kooperashon ku Corendon a regalá e muchanan i tur miembro di e delegashonnan un daypass. Despues a sigi aktuashon di One Flavas kaminda e selekshonnan a baila riba stage. E selekshon di Little League a pone un show kompletu ku manager Sontje Gijsbertha mei mei di nan. Un públiko grandísimo tabata na Brionplein i tambe kantu di kaya alo largo di e ruta. Un dia hopi eksitoso, bon den otro hinká pa medio di Gobièrnu i su tim di departamento di Deporte i Kultura. Awe nos ta dediká na Little League i nos lo analisá e sifranan ku nos tabatin promé ku e wega final i nos lo analisá e sifranan tantu di Kòrsou komo esun di USA te na final. USA a yega final ku un average di bateo altísimo di .396 i nos picheo fuerte a para nan i gana ku skor fásil di 11-2.
