Korsou kla kla pa Guatemala awe, wega ta start 8’or en punto
WILLEMSTAD - Awenochi (080621) pa 8or, (un bes aki) ta e gran momentu pa e wega krusial pa selekshon di Futbòl di Kòrsou. Nos selekshon lo topa ku Guatemela i un empate nos lo klasifiká pa e sigiente buelta buskando klasifikashon pa Kopa Mundial 2022. Kòrsou a golia British Virgin Islands 8-0 djasabra último.
Pa loke ta trata dos hungadó ku no a mira akshon djasabra, DT Patrick Kluivert a splika ku Darryl Lachman pa motibunan bálido no por a bin na e okashon aki. Anke tin otro rumornan. Kevin Felida, e hóben prospekto no a hunga djasabra, pero e ta disponibel pa e wega di awe. Ayera tardi i anochi e dos selekshonnan tabatin nan delaster seshon di training ku bista riba e kompromiso di awe nochi.
FANATIKO
Tur fanátiko i bishitante mester ta kompletamente vakuná i e di dos vakuna mester ta hasí promé ku 25 di mei 2021. Pa e bishitante ku no ta vakuná, mester di e tèst di Antigen no mas bieu ku 24 ora promé ku e wega. Esaki ta konta tambe pa tur mucha ku asistí na wega. E fanátiko mester presentá na wega ku su sédula i su karchi di vakunashon òf resultado di e tèst di Antigen i e tapaboka ku ta obligatorio. Porta di Stadion Ergilio Hato ta habri for di mitar di 6.
