Kòrsou kontra di Canada djasabra 7’or den Gold Cup
HOSUTON – Kòrsou lo topa ku Canada djasabra 7'or pm na Shell Energy Stadium, Houston. Kòrsou den nan promé wega e empatá ku Salvador, na 0 gol. Wega ku Kòrsou mester a gana mirando e oportunidatnan di gol ku nan a krea. Canada a manda un fuerte mensahe ku un 6-0 viktoria kontra Honduras. Canada ke gana nan promé Gold Cup despues di 25 aña.
KOMENTARIO PEPI SULVARAN DI E PROMÉ WEGA
‘PANTERA NEGRA’ TABATA BOU DI NIVEL, PERO NADA NO TA PÈRDI AHINDA
Falta di deseo pa gana
Nos no a pèrdè kontra El Salvador i Canada a humia Honduras 6-0. Ke mèn, nos ta den tapara ahinda pa un di e dos puestonan pa pasa pa e buèlta di dal saka. Ku esei tur kos ta bisá, paso nos promé wega den ‘Kopa di Oro’ no tabata un éksito. E wega téknikamente di tur dos banda tabata hopi bou di nivel, a pesar ku nos a hunga un mihó di dos mitar. El
Salvador a saka un punto riba lucha i gara, paso nan si a hunga ku kurason. Esei no tabata e kaso serka nos. Den tur línea nos tabata generalmente bou di nos nivel. Promé mitar tabata erátiko, sin inspirashon i ku falta di konsentrashon.
Room
Eloy no a haña kasi nada pa hasi, paso ‘La Selecta’ no tabatin forsa ofensivo pa yega nos arko ku regularidat. E poko ku ela hasi ela hasie bon. Un 6.
Defensa
E defensa a hunga regular. Ta bisto ku Cuco tin hopi tempu sin entrená òf hunga riba nivel. Dos be nan a bañé riba velosidat. Un be posishon adelanta e skapa nos i e otro be, nèt ela logra hinka su pia chip e bala pa Eloy. Generalmente e no a hunga malu. Si Brenet bin bèk e tin ku bai banki. E ousensia di Brenet ta ineksplikabel si e no ta leshoná. Gaari, van Eijma, Cuco i Floranus no tin e kapasidat ofensivo i e kreatividat ku Brenet ta trese, nan ta puro defensa. Aki no selekshonamentu di Carolina ta wòrdu sintí, e úniko defensa pia robes ku nos tin. Si Brenet no por hunga, e lo por hunga linksbèk, Floranus riba rèks i Gaari ku van Eijma den sentro di defensa. Cuco un 6, van Eijma un 8, Gaari un 6 i Floranus un 6.
Medio kampo
E linia medio tabata desaster. E úniko ku a presta bon tabata Leo Bacuna. Juninho Bacuna atrobe a hunga un wega super egoísta i a okupá su mes mas ku pleita ku e arbitro ku hunga bala, lokual ta afektá konsentrashon di hinter e ekipo. Hasta komentaristanan de ESPN a baha pisá riba dje, indikando ku e no ta pasa e bala i ku e ta bai puramente pa su ‘eigen glory’ so. No ta promé be. Konstantemente den selekshon e ta permití su mes e lugo di boikotia e wega di konhunto. Den promé mitar e ta enfrentando dos lastu hungadó kontrali, Margaritha ku tin velosidat ta kore su so riba ala direkshon di gol, loga di e pasa e bala, e ta purba pasa mei mei di e hungadónan i pèrdè e bala atrobe pa di tantísimo be. Komo su puesto ta esensial pa e konekshon entre defensa i atake, nos wega no ta sali. Mester a saké na half time. Ta tempu pa spliké ku si e no ta pasa bala e no por ta den wega, sigur no na e posishon ku e ta hunga. Un 3 pa Juninho. Leo su ruman manera kustumber a hasi su trabou, un 7. Comenencia no ta kla ahinda pa e trabou grandi, pero e ta un junior i tabata su promé wega internashonal grandi. Ela lusi poko nervioso ku pèrdida di bala pa pase malu, un 5. Margaritha a hunga un bon di dos mitar i a krea poko peliger, un 6. Kenji tampoko a lusi pero a mustra esfuerso, defendiendo tambe, un 6.
Atake
E skogensia di Kastaneer riba Locadia no por wòrdu spliká. Pa esnan ku no sa, Locadia su balor riba merkado promé ku ela leshoná na un sierto momento tabata 15 mion Euro, si 30 mion florin. Ela hunga entre otro den PSV i Brighton den Liga Premier. Kastaneer a lusi kontra St. Lucia i tabatin un bon gol kontra Haiti, pero no ta di kompará. E diferensia por a wòrdu notá mes ora. Locadia tin mas téknika, ta posishoná mihó, ta tene a bala mihó i sigur ta un goliadó superior. Kastaneer ta stèns riba su fisika, pero no ta partisipá den e wega. E ta mas un hungadٕó pa hinka den delantero ora e defensa ta kansá pa forsa bara. Kastaneer un 4. Locadia a hunga muchu kòrtiku pa un puntuashon, pero a resaltá positivamente.
