Kòrsou kontra Meksiko awe djaweps 1 di febrüari 4.30 pm den Seri Del Caribe
WILLEMSTAD - Kòrsou lo hunga nan promé wega den Serie Del Caribe awe 1 di febrüari 4.30 pm kontra Meksiko. Cody Mincey picher Merikano ku a picha pa Kòrsou den Seri del Caribe di 2023 lo habri e promé wega atrobe pa nos selekshon. Djabièrnè pa 10.30 am nos lo hunga kontra di Panama. Kòrsou lo hunga 6 wega di 7 dia pa despues e promé kuaternan klasifika pa play-off. Nos tin skema i mas detaye. Weganan ta kai un ora despues di ora di Miami segun skema. Ke men e promé wega ta start aya na Miami 3.30 pm i serka nos 4.30 pm .
Manager i coachnan di Liga Pabou ta konosí
WILEMSTAD- Direktiva di Liga Pabou a publiká nòmber di manager- i coachan di e respektivo selekshonnan ku lo kompetí den play-off di Little League den luna di aprel. E kampionato di Intermediate lo tuma lugá den luna di mart kaminda Pariba, Pabou i Willemstad lo kompeti. E kategorianan ta Minor, Little, Intermediate, Junior i Senior. Nòmber di manager i coachnan ta lo sigiente.
Den Minor manager ta Dimitri Eugenia asistí pa su coachnan Ariyen Mogen i Richard Lopez. Zaino Everett ta manager di Little huntu ku su coachnan Ringemar Raap i Ildion Martina. Den Intermediate, Sherrintley Da Costa Gomez ta manager ku asistensia di coachnan Sorick Liberia i Argenis Martina. Johannes Gregorius ta manager di Junior League ku asistensia di Ludson Roberto i Sharlon Nanoy.
Den Senior ta Quincy Viriginie ta manager ku coachnan Charlton Merite i Erwin Benita.Teksto pa potrèt Kuerpo tékniko di Little League tei bèk enkabesá pa Zaino Everett.Quincy Virginie i su coachnan di Senior League a bini bèk, potret durante apertura di Kampionato di Karibe di Senior 2023.Direktiva di Liga Pabou a anunsiá manager i coachnan pa selekshon.
Liga Pariba a skohe nan téknikonan pa selekshon
WILLEMSTAD- Direktiva di Liga Pariba a publiká e manager i coachnan skohé pa playoff di Little League pa 2024. Play-off ta start den luna di aprel 2024. Kampionato di Intermediate League lo tuma lugá den luna di mart.
E manager i coachnan ta lo sigiente. Manager di Minor ta Elmer Koeiman asistí pa coachnan Randy Lo-A- Tjon i Faisel Zimmerman. Den Little League manager ta Jeremy Lucas ku asistensia di Swindley Lint i Rochardo Davelaar. Den Intermediate Qui-Jaeir Martina ta manager i su coachnan ta Ericson Irausquin i Merieldo Trinidad. Manager di kategoría Junior ta Ludwin Obispo i coachnan Rolando Chirino i Christian Vilchez. Pa loke ta Senior League, manager ta Stanley Rimon asisti pa Marc Hennep i Cliffort Petrona.
Sòftbòl Liga 50 ku direktiva nobo enkabesá pa Gilbert Keller
WILLEMSTAD- Gilbert Keller di ekipo Flamboyan/Tigers ta presidente nobo di Sòftbòl Liga 50. Dia 10 di yanüari 2024 tabata tin elekshon di presidente i direktiva nobo pa e liga. Tabatin un reunion bon bishitá i ku partisipashon aktivo di tur ekipo miembro a skohe sr. Gilbert Keller (Flamboyan) komo presidente nobo di e liga pa e periodo 2024 i 2025.Huntu ku Keller e direktiva ta konsistí di Srs. Klooster (Sluggers), Loth (Lions), Mackaay (Baranka), Davelaar (Pitufos), De Palm (Jaws) i Yanez (Ban Serio).
Internamente e direktiva a repartí e puesto i tareanan i lo publiká esaki durante e promé siman di febrüari 2024.
Traspaso ofishal di direktiva di Liga 50 Softball lo tuma lugá durante Reunion General dia 26 di febrüari 2024.
Nonnie de Roon i Julien Ignacio pa ekipo Marlins den 50+
WILLEMSTAD- Nos tin algun informashon kayente di 50+ Sòftbòl i ta lòs algun. E picher Norman ‘Nonnie’ de Roon i Julien Ignacio kècher di Ban Serio lo move pa ekipo Marlins den 2024. Parse ku Marlins tin mas hungadó kandela na kaminda, entre otro Roque Zimmerman, Ramiro Balentina, Raylan Capella, Dwight Alexander i hopi mas rumbo pa Marlins ku a terminá number 4 i kai vensí kontra Baranka den semi-final di 2023.
Tin mas hungadó na kaminda pa ekipo Marlins ku tin plan serio den 2024. Ekipo Marlins lo ta na Kopa ABC&S 50+ na Aruba den luna di mei benidero i lo ta fuerte. Ban Serio kampion di Kopa ABC 50+ di 2023 i 2019 tambe lo ta presente na Aruba.
Djasabra 20 di yanüari 2024 ekipo Marlins a habri aña na Playa Boca Simon i vários di e hungadónan nobo tabata presente. Otro ekipo ku ta mustra fuerte den 2024 ta ekipo Flamboyan/Tigers ku tin Stanley Palm komo manager i e ekipo a drei zetá djasabra den Amstel Bright Premier Cup.
Pitufos ta drechando nan ekipo i nan tambe ta tras di Roque Zimmerman ku ta famia di doñonan di Pitufos. Baranka manera semper ta move den silensio i Jaws tambe a presentá sólido den Torneo Amstel djasabra último. E otro ekiponan no tin masha moveshon bisto ainda pa temporada 2024.
MAS INFORMASHON DI BEISBÒL I S0FTBÒL
Fanátikonan di Deporte Kòrsou, bondia. Nos tei atrobe kargá ku informashon di Sòftbòl i Beisbòl. Den siman tabatin e último training di e selekshon di Beisbòl of mihó bisa e ekipo Curacao Suns ku lo representá Kòrsou den e trabukonan di Serie del Caribe. Curacao Suns lo ta den akshon awe pa 3.30 kontra di Meksiko. Djabièrnè ta 10.30 am kontra e ekipo Panama. Nos selekshon no a haña niun wega prime time i dimes e orarionan ei ta reservá pa grandinan manera Venezuela, Puerto Rico, Meksiko, República Dominicana ku tin un kantidat di paisano einan pa yena stadion den oranan di anochi. Nos lo bai sigi e weganan via Nos Pais Television i otro plataformanan.
Awe nos tin algun informashon kandela di Liga 50 kaminda lo bai tin masha hopi kambio. Espeshalmente ekipo Marlins ku ta a la karga den Sòftbòl 50+ den 2024 rumbo pa yega final despues di hopi aña. Na 2016 ekipo Marlins a bira kampion di Liga 50 tempu ku tabata hunga 50+ di Sòftbòl na Cirilio Chirino Ballpark. Na 2020 Liga 50 a move pa Suvek Ballpark ku despues a bira Van Engelen Ballpark. 2020 ta e úniko aña despues ku a lanta Liga 50 ku no tabatin un kampion. Na 2021 i 2022 Baranka a bira kampion i na 2023 Ban Serio a bira kampion. Marlins tin dos picher di nòmber, dos infielder di nòmber i un gran outfielder pa 2024.
Amstel Bright Premier Cup lo sigi ku weganan djasabra awor na Van Engelen Ballpark. Djadumingu ta Marcha Hubenil i pa otro wikènt no tin wega i ta marchanan tras di otro tin. Ta 5 dia lo tin Marcha sigí for di djabièrnè te ku djamars. Nos lo tei kant’i kaya na Rooseveltweg na altura di Napa Auto Parts pa saka e pòtrètnan manera ya a bira un tradishon pa 23 aña kaba. Sakando afó añanan 2021 i 2022 ku no tabatin karnaval na Kòrsou. Nos lo tin e páginanan tradishonal di e karnavalista/deportista.
Ekipo Azucar tin un torneo di Beisbòl Veterano ku lo tuma lugá den e luna di mart na tereno di Bonnam. Ta trata di un torneo ku partisipashon di ekiponan 40+. Pa ta eksakto e torneo ta programá pa start dia 9 di mart i terminá 31 di mart. Pa mas detaye ekiponan di Beisbòl Veterano por tuma kontakto ku Thierry Goeloe ku ta presidente via baseballclubazucar@gmail.com. Inskripshon ta 350 florin ku ta inkluí 5 karchi di benta di sòpi. Azucar, un dje gran ekiponan di Beisbòl di tur tempu ku ta falta algun aña pa kumpli 50 aña di eksistensia. Saludo pa Hubert ‘Ibi’ Soerka, un dje grandinan di tur tempu di ekipo Azucar.
By the way, Liga 50 tin plan serio pa kambia e bala di wega pa temporada 2024. Lo bai purba un otro bala. Gilbert Keller presidente nobo di Liga 50 a bin ku e idea ei i mayoría ekipo ta di akuerdo. Djasabra último tabatin dos wega di Liga 50 den Amstel Bright Premier Cup i ta masha hopi homerun tabata sali manera vuurpeil i balanan fuerte bati kaminda picher a haña bala den pechu. Lo bini ku e bala Weston S300Y/ The S300 pro ku ta move ménos fuerte kompará ku bala 375 ku Liga 50 ta usando. E bala S300 ta normal duru, pero no ta bai duru i fuerte kompará ku e bala 375. For di wikènt aki ekiponan lo hunga ku e bala aki den Amstel Bright Premier Cup.
Djadumingu tabatin wega kandela entre Chonchies i The New Radiator den COED. Ekipo Chonchis a sali di porta grandi ganando e wega ku skor di 8 pa 6. Chonchis a sali dilanti den e wega i keda dilanti. Rupert ‘Kabuya’ Ustasia a bati di 3-2 pa Chonchis. Nos a bai bèk den tempu 21 aña pasá i haña algun detaye di Swift Amstel Tournament (2003). Dalpega a presentá den e torneo ei ku un tremendo tim ku yen di gai yòn di Blue Hawks (tambe un tempu) i Riency Imperator yu di Bencho Imperator, a duna kátedra di fildeo den short, Andley Simmons yu di Elston Simmons a konektá homerun. E tempu ei tur dos tabatin 20 aña. Nos ta keda te aki pa awe. Te mayan ku Poder di Dios.
