Kòrsou kontra Sint Lucia djabièrnè 6 di yüni rumbo pa klasifikashon pa Mundial 2026
Willemstad- Awe, djabièrnè 6 di yüni selekshon di futbòl di Kòrsou lo ta den akshon kontra di Sint Lucia. Ku un viktoria of empate selekshon di Kòrsou ta pasa pa e sigiente buelta, den e último 12-nan rumbo pa klasifikashon pa Mundial 2026. Di e 12-nan ei parti den 3 grupo i e number 1 di e grupo ta bai Mundial dirèkt i e dos mihó number 2 nan ta bai un asina yama klasifikashon interkontinental. Ganando e wega aki nos selekshon ta pasa pa e sigiente buelta. Kòrsou na e momentunan aki tin 6 punto for di 3 wega ku 6 gol na fabor i 1 kontra. Manera ariba menshoná ku un empate Kòrsou lo klasifiká pa e sigente buelta mirando ku dos ekipo di kada pul ta klasifiká. Nos selekshon ta kla pa bai gera Dick Advocaat i su crew a konvoka e 23 hungadónan i a train kasi tur dia te ku djarason i lo ta bon prepara pa awenochi. Loke falta ta abo komo fanátiko.
Tin un total di 11.000 karchi den sirkulashon ku ta e kapasidat máksimo pa Stadion Ergillo Hato.
Banda di e puntonan di benta tradishonal, esta; 4th of July snack, Pòmp di gasolin Sta Maria, Mensing’s Caminada i Botika Mampuritu, direktiva di FFK a amplia e puntonan di benta i pone e siguiente establesimentonan aserka:
- Corendon
- Ennia (Sambil)
- Mangusa Hypermarket
- Zanzibar
- Cabana Beach Club
Na e punto di bentanan aki lo bai tin un ‘ticket boot’ rekonosibel ku logo di FFK, un empleado i un mashin di ‘swipe’ pa tur esnan ku ta deseá por kumpra nan karchi. Na e puntonan di benta aki lo no por paga ku sèn kèsh pero solamente ku tarheta di debito òf tarheta di kredito. Por kumpra karchi na e punto di benta aki riba djárason, djaweps, djabièrnè i djasabra riba for di 16, 17, 21, 22, 23 i 24, 28, 29, 30 i 31 di mei i tambe riba dia 4, 5 i 6 di yüni te ku 3’or di atardi.
Tambe lo tin karchi disponibel na ofisina di FFK for di 9’or di mainta te ku 5’or di atardi. Na FFK tambe nos ta hasi un súplika na nos fanátikonan pa hasi uso di nan tarheta di debito òf tarheta di kredito ya ku no por paga ku sèn efektivo.
E biaha aki tambe lo bai tin 6 sekshon, kada ku nan preis i nan entradanan separá pa fasilitá tur nos bishitantenan. Aki ta sigui e diferente sekshonnan i e preisnan korespondiente;
1. Sekshon di Honor
2. Sekshon VIP ta kosta XCG 175,- ku konsumo inkluí
3. Sekshon A (patras di gol direkshon Brievengat): XCG 25,- pa adulto miéntras mucha di 6 te ku 12 aña i 60+ ta kosta XCG 15,-
4. Sekshon B (direkshon di Ronde Klip bou di dak) XCG 50,- pa tur edat
5. Sekshon C (patras di gol direkshon di noordkant) ta kosta XCG 25,- pa adulto miéntras mucha di 6 te ku 12 aña i 60+ ta kosta XCG 15,-
6. Sekshon D (banda di sekshon Honor bou di dak) ta kosta XCG 50,-
Direktiva di FFK ta hasi un yamada na pueblo di Kòrsou kompletu pa bin apoyá nos selekshon masalmente i yena Stadion Ergilio Hato ku 11.000 fanátiko pa di e forma aki nos selekshon sali viktorioso i klasifiká pa e di 3 i último buèlta di e klasifikashon pa Mudial di FIFA!
Nos hungadónan ta konta ku bo!
