Kòrsou Pabou kampion Latino Americano di Beisbòl Junior League

WILLEMSTAD- Selekshon di Pabou a gana Pariba ku skor di 12- pa 2 i bira kampion Latino Americano di Beisbol Junior League 2023. E wega a tuma lugá dilanti un públiko grandisimo den Tio Daou Ballpark djasabra 22 di yüli.  Ku e viktoria Selekshon di Kòrsou Pabou lo representá Latino Americano di 13 pa 20 di ougùstùs na Taylor Michigan.  Despues di wega tabatin entrega di premio kaminda tabatin spich di Minister di Enseñansa Siensia Kultura i Deporte sr. Sithree van Heydoorn. Selekshon di Pariba naturalmente a terminá number 2, Panama number 3. Venezuela a resultá ekipo mas disipliná.

Pabou kampion.

NUMERITONAN
Pabou a skor 12 kareda, bati 8 hit i hasi 1 eror.  Davey-Jay Rijke tabata e picher ganadó i e mes a bati di 2-2. Jaydiar Kopa a bati di 3-2. Victor Nieves 1-1. Shackleyson Margarita a relevá Davey Jay Rijke i saka un out den di 5 inning.
Pariba a nota 2 kareda, bati 3 hit i kometé 2 eror.  Picher pèrdèdó tabata e habridó di Pariba Invitz Nogahus. Franjean Haseth a bati di 1-1, Lodymar Cathalina i Raynor Martis a bati di 2-1.

Pariba sup kampion.

‍
Hopi a verwagt un wega mas pèrtá, pero ya Pabou a bini ta krese formal for di semi-final ku un viktoria pa nòkout riba e fuerte ekipo di Venezuela. Pabou a start no bon pèrdiendo e promé wega ku skor di 11 pa 5 kontra di Panama. Wega number dos Pabou a bòns bèk i gana di Meksiko ku skor di 8 pa 2. Tabata e wega di djamars ei ku e manager di Liga Pabou Ludson Roberto a opta bai ku Dave-Jay Rijke i lagé tira nèt e kantidat di lansamentu pa e por ta kla pa final, dado kaso ku e selekshon di Kòrsou yega final.

Panama di 3 lugá.

Bon planiá ku a resultá bon pa e selekshon di Kòrsou i Dave-Jay Rijke tabatin un tremendo aktuashon den e gran final. Skornan ku Pabou a gana durante henter e torneo ta 11-5, pèrdè vs Panama i despues 8-2, gana kontra Meksiko i 14-13 a gana Aruba. Esakinan ta weganan di e buelta regular. Kòrsou Pabou a gana di Venezuela ku skor di 13-3 i Pariba 12-2 den e gran final. Panama a gana di Venezuela 5 pa 3 i sali number 3 di e torneo. E ekiponan Panama i Venezuela ku tabata fuertísimo den e buelta preleminar a logra bai final i a pèrdè pa nòkout den semi-final. Venezuela a resultá ekipo mas disipliná, pero no tabata presente pa risibí e premio.

Un hungadó di Pabou i un hungadó di Pariba huntu ku Minister Cijntje.
Selekshon kompletu di Liga Pabou.
Kuerpo tékniko Liga Pabou.
Akelaah Rojer, úniko mucha muhé den historia di selekshon Junior.
Cleatan Sillie, segunda base.
D'Shawn Martina - Casmiri tremendo na tersera base.
Davey Jay Rijke, tremendo picher. PIcher ganadó di final di di 2-2 den e wega final.
Derickson Doran, picher outfielder.
Gilventon 'Grandi' Josephina, kecher/outfielder i gran poder na bate.
Isaac Acosta leftfielder.
Jaydiar Kopra a gana wega di semi-final i hinka e selekshon den final.
Kaelin Daal, outfielder.
Reagan Randt Kirindongo ku a bati den clutch i averahe hopi haltu, riba .750 promé ku e wega final
Rigadon Raap, tremendo outfielder i bon batiadó.
Shakelyson Margarita a relevá den e wega final.
Victor Nieves Mack, bon den short durante e torneo.
Zazil Schoop, tremendo tras di plato, bon batiadó i tremendo spit. Ela kecha kasi tur e weganan pa selekshon Pabou i a yega final ku un average di .500.

‍

‍

‍

‍

‍