Kòrsou Pabou kontra di Puerto Rico awe, djabièrnè 4’or den semi-final kampionato di Karibe
YABUCOA – Awe djabièrnè 14 di yüli 2023, Kòrsou vs Puerto Rico den semi-final seri del Caribe aya na Yabucoa. Nos selekshon di Little League ta moviendo den gran forma aya na Puerto Rico ku 4 wega sigi gana. 3 tim a kompetí den dos pul i Kòrsou a topa ku Aruba i Puerto Rico na dos okashon i gana tur 4 wega relativamente fásil. Tabata wega number 3 di e kampionato kontra di Aruba ku nos mester a lucha un tiki pa finalmente gana di Aruba ku skor di 6-3. Weganan a terminá Kòrsou 11, Aruba 0 i despues Kòrsou 10, Puerto Rico (Yabucoa) 0. E skornan ei tabata di djamars, e promé dia ku nos ekipo tabata den akshon. Djarason nos a gana Aruba 6-3 i dal Yabucoa duru atrobe, e biaha aki ku skor di 11-1. Kòrsou lo hunga djabièrnè 14 di yüli pa 4’or kontra di e number 2 di Pul B ku ta Puerto Rico. Djasabra 15 di yüli tin e gran final pa 1.30 segun e skedjel ofishal.
DESTAKA
Vários hungadó di e selekshon di Little League ta destakando formal entre otro Joshua Acosta Fernandez, Juan Ramon Cleto Ferreras, Nasir El-Ossais, Javery Felicia, Helmir Helmijr, Yaedon Lourens Martie, Nathan Nahr, Alexander Provacia, Roach, Sean Serverie, Shemar Sophia Jacobus, Jay-Dlynn Wiel i D’Shawn Winklaar. Nos a menshoná tur nòmber di debí ku kasi tur hungadó ta hasiendo e trabou. E selekshon ta bou di direkshon di manager di Zaino Everret i su coachnan ta Ringemar Raap i Ildion Martina. Baka Sambo i Kurley Kuwas ta kompañá e selekshon komo hefe di delegashon i un dje grandinan di Little League di tur tempu, Michelangelo ‘Lo’ Celestina ta den background aya na Yabucoa.
BATEO I PICHEO
Jay-Dlynn Wiel i D’Shawin Winklaar ta konektá a bataso grandinan, mientras e picheo ta den gran forma i den man di Juan Ramon Ferreras, Helmir Helmijr, Jay-Dlyn Wiel Alexander Provacia-Roach ets. Wiel, Winklaar, Provacia, Acosta i Shemar Jacobus tabata den e selekshon aña pasá i a gana na Punta Cana i yega final na Williamsport. Kòrsou pabou ta gran faborito pa bira kampion atrobe pero dimes ta riba tereno e weganan ta keda hunga.
RBC presente
Selekshon Little League na Puerto Rico pa kampionato di Karibe
WILLEMSTAD- Djadumingu 9 di yüli 2023 den oranan tempran di mainta, e selekshon di Little League Liga Pabou a biaha pa Puerto Rico (Yabucoa), pa partisipá na e kampionato di Karibe di Beisbòl Little League. E kampionato di hóbennan di 11 i 12 aña lo start dia 9 di yüli i lo terminá 16 di yüli 2023.
%20copy.jpg)
RBC Royal Bank, representá pa sr. Sharier Dorand manera ta e kaso ku tur selekshon, tabata presente pa duna e selekshon sosten i deseá e delegashon éksito. Manager di e selekshon ta Zaino Everret asistí pa coachnan Ringemar Raap i Ildion Martina. Hefenan di delegashon di Kursley Kuwas i Eugene Sambo. E sigente hungadónan a biaha ku e selekshon; Joshua Acosta Fernandez, Juan Ramon Cleto Ferreras, Nasir El-Ossais, Javery Felicia, Helmir Helmijr, Yaedon Lourens Martie, Nathan Nahr, Alexander Provacia Roach, Sean Serverie, Shemar Sophia Jacobus, Jay-Dlynn Wiel i D’Shawn Winklaar.
