Kòrsou ta gana Canada 4 pa 2 i lo topa Nicaragua djarason
WILLEMSTAD- Kòrsou ku bon picheo i defensa a gana Canada ku skor di 4-2 djamars anochi na Williamsport. Ku e viktoria aki Kòrsou lo topa ku Nicaragua djarason 5’or den e semi-final internashonal. Reangelo de Caster, Qschondrickson Doran i Davey Jay Rijke a kombiná pa Kòrsou logra e viktoria. Renagelo De Caster tabata e picher ganadó. Ela picha 4 inning, Doran a picha 1 inning i Rijke a tira e último ining na momentu ku Canada a menasá. Canada a nota su dos karedanan den último inning, den kabes di e di 6 ining. Kòrsou a nota 2 kareda den promé inning i 2 den di 3 inning.
NUMERITONAN
Kòrsou a skor na 4 okashon, bati 5 hit i hunga sin eror. Reangelo De Caster a gana. Joshua Acosta, Alexander Provacia i Jaythan Cordilia a bati di 2-1. Canada a nota 2 kareda, bati 5 hit i no a kometé eror. Lucas Weisser tabata e picher pèrdèdó i e mes a bati di 3-2.
MAS INFORMASHON DI BEISBÒL I SÒFTBÒL
Fanátikonan di Deporte Korsou bondia i felis siman. Selekshon di Little League di Kòrsou ta sigi move aya na Williamsport. Djadumingu 21 di ougùstùs selekshon di Kòrsou a gana Iltalia ku ta den representashon di Europa-Afrika ku skor di 1-0. Un wega kayente, emoshonante kaminda tur kos por a pasa. Kòrsou komo ekipo di kas a nota su úniko kareda den bòm di di 3 inning riba flai di sakrifisio ku base yen di Shemar Jacobus. Managr di e ekipo di Kòrsou a gèmbel i usa 4 kuater picher i naturalmente warda nan estelar Davey Jay Rijkse pa e wega di djaluna. Kòrsou a dal 8 hit pero a nota solamente un kareda i laga 8 koredó na base. Italia tambe a menasá den algun ining i a laga 6 koredó na base. Djamars nos a gana Canada 4 pa 2 i lo hunga djarason 5’or kontra di Nicaragua.
• * * * * * *
Kòrsou a usa Reangelo De Caster, Joshua Acosta, Jathan Cordilia i Jay-Dlyn Wiel ku a sera e wega. Jay-Dlyn tabata tremendo atrobe komo picher i a tira 2 inning i tira 3 ponche. Jay-Dlyn Wiel a demonstrá bon Ingles tambe i a hasi un entrevista ku ESPN promé ku e wega di djadumingu último.Jay-Dlyn ta hasiendo bon kontakto pero no tin masha averahe ainda. Defensa ta den gran forma ku 6 asistensia den e weganan. Picher di Jaydlin Wiel a tira 4.2 inning, 0 kareda limpi permiti pa un ERA di 0.00, 7 ponche tira i un base por bola.
• * * * * *
Kòrsou ta batiendo pa un averahe kolektivo di .275. Jaydion Louisa tin averahe di .750 ku 3 hit den 4 turno. Jayliard Emperador .500 ku 2 hit den 4 turno. Kyshore Hinkel ku 3 hit den 7 turno ku averahe di.429. Shemar Jacobus tin .400 i D’Shawn Winklaar ta bati .333. Picheo kolektivo di Kòrsou tin un ERA di 1.77. Defensa ta bon ku 2 eror den 3 wega. 64 out saká den 66 oportunidat. Despues falta dos wega mas pa yega final internashonal. Mester wak masha bon mes kon bo ta usa bo picheran pa por yega final internashonal i final Mundial. En todo kaso Davey Jay Rijke djamars kontra di Mèksiko/Canada.
• * * * * *
Sorpresa grandi a kai den Liga 50 di Sòftbòl aya na Van Engelen Balpark djasabra. Jaws a dal Baranka i Kenny Hellement duru ku skor di 21 pa 6 pa kibra invikto di Baranka den 50+. Baranka ta kampion i ekipo to beat den Liga 50 Sòftbòl. Den oranan di mainta ekipo Flamboyan/Tigers a gana di Marlins ku skor di 11-9. Jaws ku e viktoria riba Baranka a pone nan rekòrt di na 6 ganá i 1 pèrdí, number 1 den Liga 50 e temporada aki. Falta basta wega pa terminá buelta number 1 i kos lo bai pega formal i terminá den luna di dèsember. Den di dos buelta lo repartí e ekiponan den 2 pul.
• * * * * *
Den Beisbòl Veterano Santa Rosa a nòkout Veterano Otrabanda ganando 16-1, despues tabata Isla Crackers ku a gana Vosama 6 pa 2. Isla a bai ariba 1-0 den promé inning, despues Vosama a kontestá ku dos kareda den bom di promé inning. Isla a nota 5 kareda den kabes di di 2 inning i mantené e ventaha aki te na final. Quincy Kook i Stanford Landburg, dos picher slengu a kombiná pa e viktoria pa Isla Crackers. Isla Crackers ta manehá pa Junny Obispo. Den e último wega di djasabra den Beisbol Veterano 40+, Jandoret Raiders ku bon picheo di Clifton Ijziek a dal Azucar ku skor di 11-1. Clifton Ijziek tabata e picher ganadó i Sherdon Rombley a bati di 3-2.
• * * * * *
Wikènt pasa tabatin weganan di Liga Amstel i Liga van Engelen na Van Engelen Ballpark. Liga di Nos Tur tabata den gran forma na Frank Curiel Ballpark. Den Liga 50 Vosama a gana Otrabanda Veterano ku skor di 10 pa 5.Xaviero Avastia a tuma e bala pa Vosama 50 dal Otrabanda. Den e wega di 1or djadumingu The Brothers a gana Quality 11-10. Den dianan benidero nos tin mas resultado di tur wega di 40+ i 50+ di Beisbòl Veterano. Nos ta keda te aki pa awe.
