Kòrsou ta gana Nicaragua 6 pa 3 den Serie del Caribe
MIAMI – Kòrsou (Curacao Suns) a gana Nicaragua ku skor di 6 pa 3 i ta keda ku speransa pa klasifiká pa semi-final. E wega a tuma lugá djaluna 5 di febrüari den oranan di mèrdia. Shai Martis a tira 8 inning kompletu i Hendrik Clementina a bati homerun di 3 kareda.
Nos tin un reportahe kompletu i varios pòtrèt.
Ku un bon trabou tremendo di e picher veterano Shairon Martis, Curacao Suns a gana di Nicaragua ku skor di 6 -3 djaluna, 5 di febrüari den oranan di mèrdia.
Ku un asistensia di 5,225 fanátiko, Martis di 36 aña a tira 8 inning kompleto, permitiendo 2 kareda limpi ku 4 hit. Ela tira 98 lansamentu, 63 di nan tabata straik, ela poncha 3 batiadó i duna dos base por bola. Anthony Herrera a relevá den di 9 i saka dos out i Kevin Kelly a bin terminá e wega sakando e último out.
Ku e viktoria aki, Kòrsou su rèkòrt ta bira (2-2) i ta empatá ku República Dominicana na posishon 4-5, miéntras ku Nicaragua, ku su rèkòrt di 0-4 a keda eliminá.
Den nan próksimo kompromisonan, Kòrsou lo hunga djamars 3.30 pm kontra República Dominicana.
Hendrik Clementina tabata mihó na bate ku un homerun i 3 RBI. Juremi Profar di 4-2 i 2 RBI. Wladimir Balentien di 4-2.
Curacao Suns tabata atras 2-0 ora nan a bòltu e skor ku 3 kareda den di 4 inning. Sharlon ‘Wecho’ Schoop tabata klave den e inning ei kaminda ela hustle i kore yega primera safe den un hugada ku por a bira double play pa sera e ining ku 0 kareda. Den di 6 inning Hendrik Clementina a dal un homerun di 395 pia pa left pa empuhá 3 kareda.
Despues di e wega aki e standing ta: Panama (3-0), Puerto Rico (3-1), Venezuela (2-1),
República Dominicana i (2-2), Kòrsou (2-2) i Mexico (0-3).
Awe lo hunga tambe Venezuela i Mexico pa 3:30 di atardi i den orario di anochi, Panama lo defendé nan invikto kontra Mexico. República Dominicana ta liber awe.
%20copy.jpg)
