Kòrsou ta gana Panama djasabra i lo hunga kontra Colombia djadumingu 1’or
CARACAS – Ekipo Kòrsou tabata tremendísimo atrobe djasabra den Serie del Caribe kontra selekshon Panama. Djasabra, 4 di febrüari 2023, Kòrsou a gana di Panama ku skor di 1-0 i pone nos rèkòrt na 2 ganá i 1 pèrdí. E wega a tuma lugá den Stadion La Rinconada na Caracas. Djadumingu 5 di febrüari pa 1’or Kòrsou lo enfrentá ekipo Colombia den Estadio Forum na La Guaira. Pa loke ta trata e wega di djasabra Kòrsou a skor na 1 okashon, bati 6 hit i kometé 3 eror. Picher ganadó tabata Temesh Lourens. Mihó batiado Sharlon Schoop ku a bati di 3-2. Roger Bernadina a bati di 4-2. Juremi Profar di 4-1 i Dudley Leonora di 3-1. E úniko kareda di Kòrsou a keda anotá den di 7 inning na momentu ku Ray-Patrick Didder a risibí base por bola ku base yen. Panama a dal 5 hit i kometé 1 eror. Picher pèrdèdó pa Panama tabata e relevista Padron Artiles i e shorstop Valdes a bati di 3-2. Pichernan pa Kòrsou tabata Jair Jurrjens (3.2 inning), Temesh Lourens (3.1 inning), Kevin Kelly 1.0 i Franklin van Gurp 1.0 ining. Franklin van Gurp a haña e wega salba.
SKEDJEL
Awe, djadumingu 5 di febrüari, pa 1’or pm ta kontra di Colombia. Djaluna 3’or ta enfrentá Puerto Rico, djamars pa 7.30’or kontra di Venezuela. E último wega di Kòrsou pa loke ta trata e buelta regular lo ta djarason 2’or pm kontra di República Dominicana. Por mira e weganan via Nos Pais Television kanal 104 (Flow) i 4 via antène normal.
AVERAHENAN
Nos tin average di esnan mas haltu den bateo pa Kòrsou. Sharlon Schoop (.556), Roger Bernadina (.417), Andrelton Simmons (.375), Darren Seferina (.300) Ray-Patrick Didder (.273), Dudley Leonora (.250), Edmond Americaan (.250).
