Kòrsou ta gana Sint Lucia 4-0 i klasifiká pa e sigiente buelta rumbo pa Kopa Mundial
WILLEMSTAD- Selekshon di futbòl di Kòrsou ku un viktoria di 4-0 riba Sint Lucia ta klasifiká pa e buelta final rumbo pa Mundial di futból 2026. Dilanti un públiko grandi djabièrnè 6 di yüni 2025 den Stadion Ergilio Hato nos selekshon a demonstrá klase i lo bira peligroso na momentu ku nos bai den e último 12-nan rumbo pa Mundial 2026. Gervane Kastaneer tabata den gran forma ku 3 gol. Na di 37 minut riba un kruse kaminda Livano Comencia probablemente a bai tira riba gol i e bala a resultá serka Kastaneer ku a depositá e bala den gol. Di dos gol di Kastaneer tabata un tremendo kruse di Sherrel Floranus.
Di tres gol di Kasteneer atrobe tabata riba un kòrner ku Kòrsou enbes di kobra a hasi un hugada i Gervane Kasteneer atrobe ta kòp manda e bala aden. Di kuater gol tabata di Juninho Bacuna riba un pase di Kenji Gore na rant di area, Juninho ku su pia drechi ta depositá e bala fuera di alkanse di e kiper Barcklett di Sint Lucia.E públiko presente a gosa un bòl di e wega. Kòrsou lo topa Haiti djamars awor na Aruba i a base di e puntonan, tur dos selekshon tantu Kòrsou komo Haiti a klasifiká pa e sigiente buelta.
Kòrsou tabatin e sigiente alineashon. Eloy Room, Jurien Gaari, Roshon Van Eijma, Sherrel Floranus, Joshua Brenet, Livano Comenencia, Leandro Bacuna, Jearl Margaritha, Juninho Bacuna, Kenji Gorré i Gervane Kastaneer. Den di dos mitar a drenta Godfried Roemeratoe, Jeremy Antonisse, Joshua Zimmerman, Brandley Kuwas. Nan drenta na lugá di Gaari, Gorré, Margaritha i Kastaneer.
