Kòrsou ta gana Sint Vincent 5-0
WILLEMSTAD – Selekshon di futbòl di Kòrsou rumbo pa Qatar 2022 a sali riba bon pia djaweps 25 di mart ku un viktoria fásil ku skor di 5-0 riba Sint Vincent & Grenadines. Kòrsou a dominá e wega kompletu i Sint Vicent a lusi desordená riba tereno for di komienso. Kòrsou a nota 4 gol den promé mitar i unu den e di dos mitar. E direktor tékniko nobo di selekshon di Kòrsou e famoso Guus Hiddink a hasi 4 kambio pa mira kiko e tin pa e próksimo kompromisonan. E sigiente wega ta djadumingu awor kontra di Cuba.
Den e promé minüt (apenas 29 sekonde) di wega ya Juninho Bacuna a skor riba fayo garafal di defensa di Sint Vincent. Despues Kòrsou a dominá e wega kompleto. Anthony van den Hurk ku a debutá ku selekshon, a pone e skor na 2-0 na di diesshete minüt. Bacuna atrobe a skor pa hasi e wega 3-0 pa despues Jarchinio Antonia hinka e gol den e promé parti pa hasi e wega 4-0. Jarchinio Antonia a hunga un tremendo partido i praktikamente tur atake eksitoso a kuminsá riba e banda drechi kaminda Antonia tabata move komo delantero. Den di dos mitar DT Guus Hiddink a disidí pa hasi vários kambio i entre otro Sontje Hooi, ku e skor na di 87 minüt pa hasi e wega 5-0.
Aliniashon Kòrsou: Eloy Room, Cuco Martina, Jurien Gaari, Suently Alberto, Jeremy de Nooijer, Juninho Bacuna, Vurnon Anita, Leandro Bacuna, Gevaro Nepomuceno, Anthony van den Hurk, Jarchinio Antonia.
Demas resultado CONCACAF:
Haiti 2, Belize 0
Trinidad and Tobago 3, Guyana 0
Canada 5, Bermuda 1
Panama 1, Barbados 0
