Kòrsou ta gana Virgin Island 3-2 i bira kampion kampionato ECASC
SINT JOHN – Kòrsou ku tremendo picheo di J’dah Girigorie i homerun di Jandely Ricardo i Julise Koffy a gana Virgin Islands ku skor di 3-2 i bira kampion di e kampionato, ECASC (English Caribbean Amateur Softball Confederation) djadumingu atardi na Sint John, Virgin Islands. Selekshon ta yega djaluna 9.30 pm.
E selekshon di US Virgin Islands a pika dilanti den e promé inning notando dos kareda riba un flai den infield difísil banda liña di primera, ku nos picher estelar J'Dah Girigorie a hasi máksimo esfuerso, pero e bala a dal den su wante i bai den teritorio foul. E koredónan di Virgin Islands ku tabata na segunda i tersera a logra nota. Ķòrsou ta nota un kareda den di 4 inning riba base por bola ku base yen di Thaima Maximiliana pa hasi e wega 2-1. Ku 0 out, base yen pèrdí 2-1 e sigiente batiadónan no ta logra konektá e bala manera mester ta i nos ta keda kòrtiku. Mirando ku e ekipo di Kòrsou a yega final fásil fásil, naturalmente e nervionan a kuminsá dominá ku Kòrsou atras 2-1 te den di 5 inning komo ekipo di kas.
Den di 5 inning ku dos out e batidó Jandely Ricardo ta konektá un bataso grandi ku e centerfielder koriendo pa bai buska e bala pega ku fèns, ta kue e bala, pero e centerfielder di Virgin Islands ta dal den fèns i e bala ta kai di homerun. E sigiente batiadó Julise Koffy, kuarto bate di nos selekshon ta hisa un lansamentu di e picher, manda center ku ta bula e fens, rachando ku wante di e centefielder. Ariba 3-2 ku J’Dah Girigorie pichando tabatin tur indikashon ku Kòrsou lo bira kampion. J’Dah picher estelarisimo di nos selekshon ku a hala masha atenshon mes aya Virgin Islands a pèrtá brasa i dominá e ekipo di Virgin Islands fásil ku vários ponche den último 2 inningnan pa bira e picher ganadó.
J’Dah Girigorie a saka 16 di e 21 outnan pa medio di ponche. Un aktuashon espektakular pa un picher ku aña pasá ainda tabata den Little League (divishon Senior) i a representá nos den Mundial di Sòftbòl Senior. Un talento èkstra ordinario den picheo ku Kòrsou a konosé e último añanan. E último out tabata pa medio di ponche, pa despues nos selekshon selebrá formalmente bailando i gosando e tumba ganadó ‘Huma’ aya na Sint John ku a keda toká pa e organisadónan pa nos muchanan por duna show.
Segidamente tabatin entrega di premio. Selekshon di Aruba a sali number 3, selekshon di US Virgin Islands number 2 i nos selekshon naturalmente kampion klasifikando pa weganan Centro Americano y del Caribe ku lo tuma lugá na Salvador.
