Kòrsou ta kai den grupo E huntu ku Alemania, Kosta di Marfil i Ecuador den Mundial FIFA 2026
WILLEMSTAD- Selekshon di Kòrsou a kai den un grupo fuerte ku ta Alemania, Ecuador i Kosta di Marfil. Ta trata aki den Grupo E di e total di 12 gruponan ku lo lucha den e promé buelta di e Mundial ku ta start dia 11 di yüni i terminá dia 27 di yüni. Lo sigi buelta di 32, 16, 8, semi final i final. Final lo ta dia 19 di yüli. Fechanan ya ta konosí dia 14 di yuni kontra Alemania na Philadelphia òf na Houston, 20 di yuni kontra Ecuador i 25 di yüni kontra di Kosta di Marfil. Wega number 2 i 3 no ta konosí na kua suidat e wega lo tuma lugá.
SORTEO
E sorteo pa FIFA Mundial 2026, un di e evento deportivonan mas sigi na mundu, a tuma lugá den un gala espektakular den Merka (Washington DC) djabièrnè 5 di desember 2025. E Seremonia tabata presentá pa un trio internashonal di grandi nòmber: supermodel i personalidat di televishon Heidi Klum, komediante i aktor famoso Kevin Hart, i aktor di Hollywood Danny Ramirez, kende tur a duna un glamour i entretenimento na un evento ku normalmente ta puramente deportivo.
E sorteo a dividí tur 48 selekshon partisipante den e gruponan ofishal. Esaki ta marka un momentu históriko, pasobra Mundial 2026 lo ta e promé bes ku kompetensia ta konta ku 48 pais, na lugá di e formato habitual di 32. E torneo lo tuma lugá den Merka, Kanada i Méksiko, i ta e promé Mundial organisá simultáneamente den tres pais host.
Durante e gala, aparte di e presentadónan prinsipal, tabatin presensia di hopi figura famoso di deporte i entretenimentu. Eks atletenan i atletanan ya legendario tabata yuda ku e proseso di saka e bala (lòt) ofishal. E ambiente tabata tremendo i a duna klaridat na tur ekiponan i fanátikonan riba kiko por warda den 2026.
KÒRSOU
Manera ariba menshoná Kòrsou a kai den grupo E ku ta un grupo fuerte. Interes i emoshon na nos isla lo sigi subi. Fanátikonan di Kòrsou a kuminsa mobilisá mirando ku ya ta konosí ku e promé wega lo ta na Philadelphia/Houston. Philadelphia ku ta relativamente fásil pa nos yega via Miami i un buelo di konekshon pa Philadelphia.
MUNDIAL
Ku e gruponan awor konosí, selekshonnan por kuminsá planiá viahe, entrenamentu, amistoso i logístika. Fanátikonan global, inkluso akinan na Kòrsou, por kuminsá sigui su selekshon preferí i prepará pa un fiesta di futbòl.
Organisashon di FIFA mes ta spera un rèkert den kantidat di televidente i fanátiko na e stadion pasobra e torneo lo tuma lugá den estadionnan moderno i grandi na Merka.
