Kòrsou ta topa ku Hapon djasabra pa 12:30 PM den e Final Internashonal di Mundial di Little League
WILLIAMSPORT — E ora di e gran duelo a yega! Djasabra 29 di ougùstùs pa 12:30 PM, e selekshon di Little League di Kòrsou ta drenta e imponente Howard J. Lamade Stadium pa midi forsa un biaha mas kontra e potensia di Hapon den e Final Internashonal di e Little League World Series.
Esaki ta e enfrentamentu ku tur hende tabata spera. Rekordando e gran partido di diabièrnè siman pasá, Kòrsou a duna un kátedra di bèisbòl i a blankiá e haponesnan ku un skor konvinsente di 6 pa 0. Djasabra e kuadro di Asia ta bini ku sed di revancha, pero nos muchanan ta drenta tereno ku tur e konfiansa i ritmo pa ripití e dosis i buska nan pase pa e gran final mundial.
E ekipo dirigí pa manager Raylison ‘Sontje’ Gijsbertha i pitching coach Ramses Jamanika tin nan staf di picheo kla prepará i un bateo ku a sa di probechá di kada oportunidat di e rivalnan.
Kòrsou henter lo ta paralisá djasabra pa 12:30 PM pa duna e apoyo moral pa buska e paso pa e gran final di djadumingu 30 di ougùstùs 2026.
No pèrdè ningun detaye di e gran partido aki ku lo wòrdu transmití en bibu via Rock Kòrsou i mester di varios medio sosial.
Ruta di Kòrsou pa e Final Internashonal:
• Wega 1: Kòrsou 6, Hapon 0 (Diabièrnè 21 di ougùstùs)
• Wega 2: Kòrsou 1, Sür Korea 0 (Djadumingu 23 di ougùstùs)
• Wega 3 (Semifinal Internashonal): Kòrsou 12, Nicaragua 3 (Djarason 26 di ougùstùs)
Deporte Kòrsou a kombersá ku e manager Raylison ‘Sontje’ Gijsbertha djaluna último i na promé lugá el a gradisí Dios i gradisí e kuerpo tékniko ku e selekshon por a yega e semifinal internashonal aki i ta ganando. El a elogiá e coach di picheo, e otro coach di eksperensia i naturalmente e muchanan ku ta hasiendo nan best i ku ta hasi e trabou manera el a spera di nan. Gana dos grandi pa medio di blankeo no ta wega. Ta promé biaha ku Kòrsou a sali enfrentá dos país grandi Asiatiko den Little League World Series. Nos pichernan tabata hermétiko den e dos weganan i defensa tambe tremendo. Djadumingu despues di e wega e miembronan di selekshon i hopi mayor a bai wak wega di Major League entre Atlanta Braves kontra di Milwaukee Brewers, wega ku Atlanta Braves a gana ku skor di 4-2. Pa koinsidensia selekshon di Kòrsou ta bai komo Kòrsou i pa nos di bon Atlanta Braves ku Ozzie Albies a keda skohe pa Major League Baseball pa hunga e wega ei ku ta yamá Little League Classic. Pa kolmo e wega a haña un delay ku a pone ku Albies tabatin mas tempu pa papia ku e hungadónan i motivá nan pa hasi nan bèst i duna nan algun tep.
HISTORIA
Little League a keda fundá dia 6 di mei 1939 pa Carl Stotz na Williamsport, Pensilvania, huntu ku e rumanan George i Bert Gray. E promé wega a tuma lugá riba 6 di yüni 1939 na Williamsport (Lundy Lumber a derotá Lycoming Dairy 23-8). E promé World Series di Little League a tuma lugá den e verano di 1947 (23 pa 25 di ougùstùs) na Williamsport, Pensilvania. Promé kampion tabata ekipo di Maynard Midget League (di Williamsport mes) ku a bira e promé kampion mundial ora nan a derotá Lock Haven ku skor di 12-7 den e final. Ekiponan ku mas título mundial: Taiwan (Chinese Taipei): 17 título (e país ku mas kampionato den historia). Hapon, 11 título; California (USA): 8 título (e estado merikano ku mas título); Kòrsou: 1 título mundial (2004), ademas di sup kampionato na 2005, 2019, 2022, 2023.
Estados Unidos tin 39 título mundial den total. Taiwan (Chinese Taipei): 17 título. Hapon: 11 título. Koréa di Sur: 3 título. Venezuela, México i Cuba: 2 título kada un. Kòrsou tin un 1 título na 2004. Ke men ku otro palabra Kòrsou a sali gana dos di e grandinan manera nos a skibi ariba ku ta Hapon ku tin 11 título i Sur Koréa ku tin 3 título. Grandinan den región ku ta Repúblika Dominikana, Puerto Rico, Nicaragua, Panamá, Colombia no tin título. En todo kaso nos tabatin hopi informashon di Little League riba nivel mundial ku ta tuma lugá tur aña den luna di ougùstùs na Williamsport.
