Kòrsou vs Panama 1’or pm den Little i Kòrsou kontra Republica Cheka den Junior 7or pm
WILLEMSTAD- Awe, djabièrnè, 19 di ougùstùs selekshon di Kòrsou di Little League den representashon di Karibe lo topa ku Panama den Little League World Series na Williamsport. Ganadó di e wega aki lo hunga djaluna 1’or mientras pèrdèdó lo hunga djadumingu 9’or am. Den Junior Kòrsou na Taylor (Michiagan) lo hunga kontra Republica Cheka 7’or pm den Juniro League Wolrd Series. Ganadó di e wega aki lo topa ku Chinese Taipei atrobe i e pèrdèdó ta keda eliminá.
MAS INFORMASHON DI BEISBÒL LITTLE LEAGUE I SÒFTBÒL
Fanátikonan di Deporte, bondia. Awe ta e gran dia kaminda Kòrsou kompletu lo ta tras di televishon
pa mira weganan di nos selekshonnan na USA. Naturalmente tin masha hopi Yu di Kòrsou aya na USA,
speshalmente na Williamsport kaminda ta un show kompletu tin. Selekshon di Kòrsou Little League den
representashon di Karibe lo topa ku e selekshon di Panama ku ta representá Latino America. E wega
aki lo ta 1’or di mèrdia i por mira e wega aki via ESPN.
* * * * *
Esnan ku tin e kanalnan di deporte normal via Flow òf otro providernan por mira e wega aki. Pa loke ta
trata Junior nos selekshon lo topa Republica Cheka pa 7’or pm. Akinan esnan ku tin hopi
kanal di ESPN por wak e òf via linknan ku ta skeiru riba app ku ta dolor di kabes grandi pa haña e señal.
Hopi pasenshi mester tin pa por haña e wega mira na momentu ku bo klik pa risibí e señal. En todo kaso
dos kandela awe.
* * * * *
Kòrsou Little League lo manda nan estelar ku ta Reangelo de Caster kontra di Panama. Manera ta konosí nos a gana wega number 1 ku skor di 2-0 kontra Nicaragua. Ta hunga e sistema di eliminashon dòbel i no tin espasio pa pèrdè niun wega pa trata na bini bèk. Masha hopi fanátiko mesna Williamsport, entre otro Richard ‘Chado’ Obispo ku ta abuelo di Jaydlin Wiel. Chado púbikamente tayama danki na dos spònser ku a koperá pa e bai Williamsport. Ta trata aki di Car Sensors and More i Bo Frei ku su produktonan pa Quaker Oats. E yu di Chado ku ta Raynard Doran a hunga varios selekshon pero no a yega Mundial. Raynard Doran ta tata di Jaydlin Wiel. E otro yu Curtje Doran ta hunga den Santa Maria Pirates di Beisbòl Dòbel A despues di algun aña ku Royal Scorpions. Curtje Doran, tio di Jaydlin Wiel a bai Williamsport na 2004 i bira kampion Mundial huntu ku Jurickson Profar, Jonathan
Schoop, Sorick Liberia i otronan.
* * * * *
Alexander Provacia Sr. i Jr segun nos ta e promé kombinashon tata i yu ku a hunga den un kampionato
Mundial na Williamsport. Fuera di esei abuelo Luis Provacia tabata coach durante e kampionato Mundial
di 2004 ku nos a bira kampion. En todo kaso tin mas ku 40 fanátiko di Kòrsou na Williamsport.
Práktikamente tur mayor a bai kombiná ku ruman, opa, tanta i tio ets. Djadumingu i djaluna último
mayoria fanátiko a move pa USA. Nos tin kontakto ku varios mayor aya na Williamsport i dimes nos lo
waknan durante e weganan via ESPN. Djamars tabatin e parada i nos a mira nos delegashon ta
bria riba trailer.
* * * * *
Awe tin e promé wega di final di Beisbòl Hubenil entre Marchena Braves i Wild Cats.
Nos a tira un bista den esnan ku a destaká durante kampionato regular. Entre otro Girvin Finch di
Marchena Braves tabatin un averahe di .476 sigí pa Gregsson Juliana (Wild Cats) .442, Clyron Franklin
(Marchena Braves) .436, Najearion Reinilia (Groot Kwartier) .434 i Keordon Leito (Wild Cats) .417.
* * * * *
Mas sifra di Beisbòl Hubenil. Girvin Finch ku a kima liga tabata lider den kareda empuhá ku 31, sigí pa
Clyron Franklin ku 24, Guillendry Doran (Marchena) 24, Tha-Vish Doran (Marchena) 22 i Najearion
Reinilia ku 21. Clevert Martina di Wild Cats ku ya a move bèk na USA tin ERA di 3.00, Rodston Inecia
(Santa Rosa) 3.11. Rodston a sali MVP di All Star Game komo kècher i batiendo homerun. Cleavon Lasten
(Wild Cats) ku lo ta den akshon den final tin un ERA di 3.98, Nathan Isenia (Wild Cats) 4.28 i Shurik
Mouricia (Santa Rosa ) 4.46. Pa loke ta trata ponche tirá: Cleavon Lasten ta lider ku 60, Jayverson Rellum
(Royal Scorpions) tin 48, Nyzar Martins Pereira (Santa Rosa) 42, Tristan Calmes (Groot Kwartier Stars) 41
i Quishanic Martis (Marchena Braves) 40.
* * * * *
Ban pa Slowptich. Liga Di Nos Tur ta sigi djabièrnè awor na Frank Curiel Ballpark. Ekipo Sin Stress tin
barwacht i nan a pone un espektakulo pa fanátikonan. Djasabra weganan ta sigi i naturalmente entrada
ta gratis i lo tin DJ ku músika. Nos ta pendiente pa skèdjel di e weganan. Nos ta keda te aki pa awe.
