KU KEVIN FELIDA, KÒRSOU TIN SU PROPIO N’GOLO KANTÉ
Skibi pa Pepi Sulvaran
WILLEMSTAD.- Manera nos a anunsiá for di Desèmber 2020, e bolante defensivo Kevin Felida a mustra interes pa forma parti di nos selekshon nashonal di futbòl. Fin di siman ku a pasa Kevin a anunsiá públikamente ku e la bira parti di ‘Pantera Negra’ i ku e lo ta presente pa e weganan den yüni kontra Islanan Bírgen Britániko i Guatemala. Sin mas esaki ta un bon notisia. Felida ku te ainda ta forma parti di FC Den Bosch den di dos divishon ulandes, ta wòrdu konsiderá un di e talentonan grandi na Ulanda.
Kevin Felida a sali entre e 11 mihó hungadónan di Keukendivisie i ta gosa di interes di diferente ekipo pa e temporada benidero. Entre otro FC Groningen di Eredivisie, Toulouse di Fransia i Cincinnati di MLS. Indudablemente lo e dal e paso pa un nivel mas haltu. No ta ekskluí tampoko ku Feyenoord, ekipo di su siudat natal, lo mete su mes den e lucha pa su servisionan, awor ku e yu di Kòrsou Leroy Fer, tambe un bolante kontroladó, ta yegando veterania.
Kevin su kalidatnan ta ku e ta gana hopi bala, ta kore hopi, tin bon velosidat i un bon pase den su pia. Apesar ku e no tin e nivel di N’Golo Kanté, por lo ménos no ainda, su wega ta komparabel ku e gran astro franses. Kevin ta duna Kòrsou hopi mas posibilidat i fleksibilidat pa harma un bon onsena i ta amplia nos posibilidatnan pa e weganan ku ta bini. Kevin ku su posishon habitual ta bolante sentral, por hunga tambe tur kaminda den bolante i den defensa.
Ku Kevin Felida i Anita (RKC) awor nos selekshon tin dos bolante defensivo di nivel haltu. E mihó sistema lo ta un 4-2-3-1. Nos por mehorá i perfekshoná e sistema aki ku e hungadónan ya a kustumbrá kuné bou di Bicentini i ku a trese nos éksito kaba. E ta lógiko tambe. Anita ku Felida kibrando hugadanan dilanti un defensa ku tin su interogatorionan. Realidat ta ku e integrantenan di nos defensa òf no tin ekipo òf no ta estelar den nan ekipo. Esaki ta ku eksepshon di Lachman (Perth Glory/Oustralia), ku sa tin su momentunan di falta di konsentrashon. Cuco Martina tin un aña sin hunga futbòl organisá, pero ku su eksperensia den Liga Premier i Eredivisie ku ekiponan grandi manera entre otro Everton, Southampton, Feyenoord i FC Twente, pa e próksimo dos weganan mirando e kontrinkantenan, no ta un problema grandi.
Gaari (RKC) i Maria (NAC), e dos defensanan lateral, niun di dos no ta estelar den nan ekipo. Suently Alberto a hunga su lastu wega den un klup organisá 26 luna pasa. esta dia 26 di aprel 2019 pa Sparta den di dos divishon ulandes. Pa e motibu aki ta manera un regalo fo’i shelu ku awor nos tin dos ‘stofzuiger’ manera Anita i Felida ku ta kibra hopi hugada dilanti defensa. Loke sobra e defensa ta bai haña. Ku nan dos den un bolante di 5, nos por pone un línea medio di tres dilanti ku Juninho Bacuna (Huddersfield) partiendo e wega mei mei di tereno, flankiá pa Leandro Bacuna (Cardiff) i Brandley Kuwas (Al Jazira/Al Nasr). E punta di lansa por ta òf Janga (NEC) òf Benschop kende su kontrakt ku Apollon Limassol ta kabando. Tur dos ta mes un tipo di hungadó i no tin masha diferensia. Fuerte, bon estatura, bon ku kabes, tambe den prologashon di hugada i ta traha duru.
Ku e ekipo aki riba tereno nos sigur tin chèns pa yega e lastu ocho ekiponan. Un otro opshon pa fortifiká e defensa ta pa hala Leandro den sentral ku Lachman i pone Cuco linksbèk. Esaki ta un posishon ku el a hunga den Liga Premier ku Everton kaba. Por pone e ora ei Antonia (Cambuur) òf Gorré (Nacional) den bolante na lugá di Leandro. Felida ku ya ta bal un mion, sigur ta un balor agregá pa nos i ta amplia nos opshonnan pa por hunga diferente sistema. Malu malu pa su velosidat i kapasidat pa interseptá, e por okupá un puesto den defensa tambe si tin mester.
Ta bon pa Kluivert no trese muchu kambio den e sistema di wega ku nos selekshon a kosechá tantu éksito kuné, hasta den ‘Kopa di Oro’. Tempu p’e ta kòrtiku. Kevin Felida ku su fleksibilidat por resultá di ta bal su peso na oro pa nos selekshon. Meskos ku Anita tabata su soño pa hunga pa nos, paso e ta sinti afinidat ku nos baranka, kaminda e ku su grandinan ta bin vakashon tur aña. El a bisa ku e sa ku su rais ta aki. Mirando su edat di 21 aña i su posibilidat pa sigui krese den futbòl, e ‘panter’ nobo aki ku ta lucha pa lastu un meter, lo por bai hasi su mayornan i fanatikada di Kòrsou orguyoso pa hopi tempu komo piesa klave di nos selekshon.
Kevin Felida, un kaluroso bon biní na nòmber di pueblo di Kòrsou en general i e number ‘12’ en partikular. Ban guera awó komo sòldá di e famia Blou.
