Kuerpo di Umpire The Greatest a parti unifòrm nobo pa miembronan
WILEMSTAD- E kuerpo di umpire i skorer The Greatest, spesialisá den manehá weganan di Sòftbòl, a parti unifòrm nobo djaweps 28 di mart na kas di Gino Valeriaan na Blue Bay. E unifòrmnan ta di spònser pa Intelligent Woodworks. E lider di e grupo Marlon Paz a dirigí palabra pa despues bai na entrega di unifòrm na e umpire i skorenan ku tabata presente.
Na e momentunan aki e grupo ta dirigiendo weganan di Torneo Hope i ta keda rekonosé komo spesialista pa loke ta trata weganan komersial ku último tempu a bira hopi kompetitivo i mester ta bon dirigí tantu riba tereno komo den skoring.
Santa Rosa Isla i Yesterday a la karga den Beisbòl Veterano
WILLEMSTAD- Ekiponan Santa Rosa, Isla Crackers i Yesterday a hasi vários moveshon despues di temporada 2023 i lo presentá ku un ekipo fuerte den 2024 pa kampionato di Beisbòl Veterano. Ekipo Santa Rosa lo tin sosten di Verney Jansen i famia pa yega na un ekipo mas kompetitivo pa yega final atrobe den 2024.
Santa Rosa a haña hungadónan manera Dwight Alexander i Signald Paz di Santa Maria. Hungadónan klave di 2023 manera e picher Ramses Jamanika i Djonny Joubert lo tei atrobe. Santa Rosa lo tei fásil den e promé 4-nan atrobe ku hopi chèns di hunga final. Isla Crackers ku tabatin un ekipo fuerte ku por poko a yega final den 2023 tin hungadónan nobo manera Dave Kirindongo, Riëncy Imperator i Ringemar Raap.
Dave Kirindongo lo ta un utility ku por kècha i tira algun inning pa ekipo Isla. Yesterday bou di mando di Andley Simmons tin entre otro Myson Cathalina ku a dominá den play-off final Dòbel A den 2023 ku ekipo di Royal Scorpions i nan a keda ku Gideon Sambo i tin mas hóben na kaminda pa ekipo Yesterday.
REUNION BEVEKO
E reunion di BEVEKO ku mester a tuma lugá awe djabièrnè 5 di aprel pa 7’or na Landhuis Saliña Ariba, a keda kanselá. E reunion lo sigi djaweps 11 di aprel a mesun ora. Traspaso lo bira 25 di aprel enbes di 12 di aprel. Tin vershon persistente ku BEVEKO lo hunga vários wega den stadion Johnny Vrutaal den 2024. BEVEKO lo hunga e weganan eiden pa nan por haña bar i gana algun sèn pa kubri gastunan.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt. Torneo Hope ta sigi djabièrnè Van Engelen Ballpark. Weganan lo sigi djasabra i djadumingu na mesun parke. Tene kuenta for di awor ku djadumingu dia 14 di aprel no tin wega di Torneo Hope debí na Marcha di Seú di Banda Bou. Torneo Kid Boca Chica organisá pa Jaws ta start djasabra 6 di aprel na Frank Curiel Ballpark. Ayera nos tabatin e komunikado i e skema di e promé wikènt. E sigiente wikènt lo tin kulminashon di e torneo. E torneo lo terminá djadumingu 14 di aprel ku ta e dia di Marcha di Seú. Ekipo organisadó Jaws a anunsiá ku nan no por para e weganan di e último fecha di e torneo, debí ku no tin fecha mas disponibel na Frank Curiel Ballpark pa terminá e torneo.
* * * * *
Skema di e wikènt aki di Torneo Kid Boca Chica ta lo sigiente. Djasabra 6 di aprel 11.00 Jaws – Sluggers, 13.00 Los Amigos – Nos Power, 15.00 Nos Tambe Por – Lions. Djadumingu 7 di aprel 11.00 Lions – Jaws,13.00 Selekshon A70+ Selekshon B 70+, 15.00 Sluggers – Nos Tambe Por. Pitufos a bira kampion di Torneo Kid Boca Chica na 2022. Tabata Pitufos su promé moveshon di Liga 60. Nan a terminá na di 3 lugá e aña ei den e kampionato i na 2023 nan a bira supkampion di e kampionato. Ekipo Los Amigos tabata kampion di Torneo Kid Bica Chica na 2023.
* * * * *
Organisadónan di Torneo Hope a manda e skema di siman 3 pa ekiponan i manda e skema di e wikèntnan te ku final. Ta pidi pa tene kuenta ku lo sigiente. 14 di aprel (SEU di Bandabou) no lo tin wega, a opta e ora ei pa schedule djaweps 11 di aprel pa por hunga e weganan ku no por a tuma lugá dia 14 di aprel. Si wak bon tambe, entrante siman 3 kasi tur djabièrnè lo tin wega. Dia di Obrero (1 mei) si lo tin wega. Tur final lo ser hungá 5 di mei. Pa loke ta trata situashon na vèlt B, ta spera i a traha duru pa hasi esaki realidat pa por hunga anochi riba vèlt B. A enkontra vários kontra tiempo i al final esaki lo no ta posibel mas pa e torneo aki. Pesei tambe e desishon pa inkluí e diabièrnè i otro dia liber pa por kaba.
* * * * *
Pa loke ta e asuntu di lista di hungadó tambe organisadónan di Torneo Hope tin mas detaye. Tur dia di nobo ta risibiendo hopi petishon den mail pa baha i subi hungadó nobo. Torneo HOPE 2024 ta drentando su di 3 siman i a kuminsá 23 di mart. Torneo HOPE no konosé subi ku baha hungadó durante e torneo manera kisas otro nan si. Reglanan i deadlinenan tabata stipulá for di komienso pa un i tur por kumpli kuné. Deadline di entrega di lista di hungadó (30 max) ofisial tabata 18 di mart.
%20copy.jpg)
* * * * *
No por aprobá pa un tim si i otro no, esaki simplemente no ta bai. Bisando esei komishon di Hope no por honra ningun di e petishonnan aki despues ku a start kaba i sigur no despues di bo promé wega. Den un kaso sumamente ekstremo, kual mester splika e situashon, komishon di Hope por konsiderá esaki e ora ei. Spera di a splika debidamente. Manera semper Torneo Hope tin komo meta pa dibertí i sosialisá, pero ya.. e asuntu a bira pa gana i ela bira un torneo hopi serio i tur wikènt e ta kargá ku fanátiko.
* * * * *
Pa loke ta trata Liga 60, ekipo Baranka lo keda insistí den e aña benidero pa djòin e liga. E kos a dal Baranka duru kaminda vários organisashon a vota kontra pa Baranka drenta. Manera semper nos ta bisa no tin motibu pa vota kontra i stroba algun hende grandi serio pa dibertí. Baranka lo bini ku hopi moveshon, hopi fanátiko i hopi ambiente pa e liga. Den e promé añanan lo no ta un ekipo ganadó, pero despues di mas o ménos 3 aña lo mester tene kuenta ku nan lo ta den e proménan di Liga 60.
Nos ta keda te aki pa awe i te djaluna ku Poder di Dios.
