Kuríkulo di Sixto Laker na ken kampionato 2026 di Little League ta dediká
WILLEMSTAD - Dos siman pasá a start ku kampionato di Little League 2026 ku ta dediká na entre otro Sixto Laker i Nydia Daal. Manera primintí nos tin e CV di e dos baluartenan aki i awe nos tin e CV di Sixto Laker. Riba e fecha di apertura a desvelá un bòrchi na entrada di e parke ku ta hiba e nòmber di Sixto Laker, Sixto Laker Ballpark.
Sixto Laker a nase dia 6 ougùstùs 1944 na Oude Water i ku 6 aña su mayornan a muda pa Seru Grandi 31.
- Sixto a bai St. Albertus College na Pietermaai, sigui pa Mgr. Zwijsen College unda ela kaba MULO na 1963.
- Na 1963 mes ela drenta Sevisio di Gobièrnu i bai traha na GGD. Na 1965 – 1967 ela bai studia na Jamaica na unda ela gradua pa e diplomanan :
- “Public Health Inspector”
- “Inspector of Meat and Other Food” di Royal Society of Health.
- Despues ela bai ‘College’ na Michigan (USA), na unda na 1978 ela gradua komo “Bachelor in Environmental Health”.
- Sigui despues na ‘University of Miami’ unda na 1981 ela risibí su diploma “Master of Science in Public Health”.
Na GGD (GMN di awor aki) ela okupá e puesto di Direktor (Hefe) di Servicio Hygiëniko. Durante su karera ela duna diferente seminario riba e tereno di Higiëna, e.o na Venezuela, Trinidad, Brazil, Barbados, Antigua i Puerto Rico.
Ela organisá tambe diferente seminario i wòrkshòp aki na Kòrsou. p.e HACCP na 1990.
Durante di e periodo ey, Servicio Hygiëniko a logra para diferente menasa di epidemia di Dengue.
RIBA TERENO deportivo:
Na 1955 Sixto a yuda funda un ekipo di vòlibòl “Volly Sisters” damas.
1. Sixto a kuminsá hunga Beisbòl den klase A na 1958 ku “New Port Lions” fundá pa sr. Luis “Wichi” Obispo, kual ela dominá i a risibí vários rekonosementu.
2. Na 1959 e ekipo a bira “TWINS” patrosiná pa mesun doño di “CHICAGO BBC” i “ANTILLANOS BBC”. Sr. Larry Etnel.
3. 1960 Sixto a sali kampeon bate ku average .600 +.
4. Na 1961 Sixto + Wichi a funda e ekipo di Sòftbòl “TWIN-Sisters” i despues Sòftbòl Klup maskulino TWINS, ekipo kual ela dirigí durante e epoka di Gloria di Sòftbòl Maskulino. Ela hiba TWINS na hopi okashon Aruba, Venezuela, Puerto Rico, Panama i Costa Rica etc.
Ela organisá biahe pa diferente otro ekipo di Sòftbòl huntu ku TWINS pa e.o Caracas. Pues e Famoso travel team di e epoka aki.
5. Na 1962 Sixto a pasa pa klase AA den e ekipo di CHICAGO, hungando shòrtstòp, kual ela dominá i a risibí vários rekonosementu i trofeonan pa ku su prestashon.
6. Na 1964 Chicago a degradá i Sixto a pasa pa “Sta. Rosa Indians”, den kual ekipo ela hunga te 1974, interumpí varios bia pa estudio den eksterior. Den Sta. Rosa ela hunga diferente posishon, manera: segunda base, tersera base, shòrtstòp i outfield. Hasta ela pichá algun wega (pa falta di otro).
7. Despues ku algun dirigente kier a prohibí hungadónan di beisbòl hunga sòftbòl i ku nan a herá di mata beisbòl, Sixto a stòp di hunga beisbòl i sigui ku sòftbòl ku kua e tabatin hopi éksíto, tantu lokal i den eksterior ku selekshon . Ku sòftbòl Sixto a bati por lo ménos 1 homerun den tur stadion kaminda ela hunga sòftbòl, tantu na Kòrsou, komo na Aruba, Venezuela, Sto. Domingo, Puerto Rico, Costa Rica i Panama.
8. Sixto tabata e promé persona ku siendo hungadó di sòftbòl a okupá un puesto den direktiva di “Curaçaose Softball Bond “ i tambe di NASOFE.
Den e funshon aki Sixto a introdusí “KARNET pa hugadó di sòftbòl i tambe BACKSTOP i FENCE movibel.
9. Na 1981, despues ku ela regresá for di Merka e tabata “coach i manager” di Sta. Rosa Indians pa 2 aña. (huntu ku su amigu defuntu “ Chando Daou”).
10. Di 1984 te ku 1995 Sixto tabata manager di Sòftbòl Slowpitch ku un ekipo di “GGD” i despues ku “Bringamosa” ku rekòrt ganadó di mas ku 75%.
11. Na 1999 ela bai duna Juancho Josephina un man ku a tresele den Little League kaminda e tabata te ku 2025 promé ku ela bai sosegá den brasa di Dios. Ela sa di yuda hopi mucha di Montaña Abou i bisendario konosé beisbòl mas di aserka. E organisashon di Montaña Abou bou di mando di Sixto tin alrededor di 110 mucha, repartí den 6 kategoria di: Little League.: “Tee-ball”, “Pre-Infantil”, “Minor”, “ Little “, “Junior” i “Senior”.
12. Sixto mes ta mènedjer di e ekipo di Little ku kual ekipo e tin un rekòrt impreshonante di wega ganá i hasta klasifikashon den tur torneo ku ela partisipá e temporada ey.
13. Na aña 2002 Sixto a tuma e inisiativa pa konstruí un parke na Montaña Abou, ku nòmber di “MONTAB”. E parke ta bai den bon direkshon i tur atardi tin aktividat riba tereno pa muchanan di Montaña Abou i bisindario.
14. Manera tabata defuntu Sixto Laker su soño, na sèptèmber 2011 Montab a sende LUS, lokual tabata satisfakshon grandi pa Sixto.
15. Sixto tabatin mas ku 10 aña ta papia di yerba artifisial na MONTAB. Nos ta spera nos por hasi esaki realidat ku asistensia di nos Gobièrnu di Kòrsou.
16. Durante di e periodo aki, Sixto a mira un gran kantidat di talento desaroyá i aktualmente tin vários ku a firma profeshonal en buska di un karera eksitoso i pronto e tabata spera di mira algun di nan den Big League.
Sixto ta spera di a kontribuí na pone un fundeshi fuerte pa yuda e hóbennan den nan desaroyo deportivo.
Sixto Laker a bai sosegá den brasa di Señor, djamars 2 di Sèptèmber 2025.
Sixto Laker, MPH (Master of Public Health).
Fanátikonan di Deporte Kòrsou bon día. Nos ta den un fin di siman kandela kaminda lo tin wega semi-final entre ekiponan Los Amigos i Lions. Ganadó di e seri aki lo hunga final kontra ekipo Nos Tambe Por. Dimés ta spera hopi fanátiko atrobe djadumingu awor na Frank Curiel Ballpark. E siman aki nos a kombersá ku un persona ku tin hopi aña ligá ku Sòftbòl Slowpitch i liganan di Sòftbòl di e hóbennan. Manera ta konosí no tabatin Liga Van Engelen, tampoko Liga Amstel den 2025. Liga Amstel a drei te ku 2024 i Liga Van Engelen te ku 2023. E liganan aki tin derechi di eksistensia segun e dirigente aki. Liganan di Latino a drei den 2025 ku kampionatonan kòrtiku ku a bira un éksito. Mesun hungadónan ku a drei den e Liganan Latino aki a move ántes den Liga Amstel i Liga van Engelen. Huntu ku e Liga 50 di djasabra tin espasio pa drei un liga di hóbennan djasabra manera Liga Amstel tabata tuma lugá. Ya…. ta dirigentenan mester bini huntu pa kombersá. Pa loke ta trata Liga 40 mester bini huntu pa wak kiko ta bai pasa.
* * * * *
Mester tene kuenta ku tin Beisbòl Veterano ku ta netamente pa esnan ku a yega 40+ i algun di 50+ ku ta hunga Beisbòl djasabra i djadumingu. Poko poko pero sigur e 50+ nan ta halando atras for di e 40+ di Beisbòl, kontrali na añanan anterior, komienso di 2010 bin ariba i 2020 ku ainda tabatin hopi 50+ aktivo den Liga 40 Beisbòl. Aworaki hopi fanátiko ta bai wak Liga 50 djasabra na Van Engelen Ballpark i Liga 60 na Frank Curiel Ballpark. Liga 60 ta den full swing djadumingu awor ku wega di semi-final. Hopi espektativa den Liga 60 pa próksimo añanan. Tene kuenta ku for di kampionatonan 2024 e hungadó mester a kumpli 60 aña pa por hunga den e liga. 58 i 59 aña por hunga solamente den algun torneo.
* * * * *
Vários hungadó di nòmber rumbo pa 60 den 2026, entre otro Stanley Palm, Sedeney Lourens, Cai Leonora, Sharlon Hanst, ets. Ekiponan lo bai tira bara di hak riba e hungadónan menshoná. Skibiendo di Liga 60, intenshon ta pa hunga Dutch Caribbean 60+ di 2026 na Hulanda, pero den mesun rosea tin moveshonnan pa e tim di Hulanda organisá Dutch Caribbean na Kòrsou. Si Dutch Caribbean tuma lugá na Hulanda mester wak kon ta hasi para e kampionato lokal pa 2 òf 3 djadumingu. Niun hungadó i dirigente no ta bai Hulanda pa un wikènt so. E punto hopi importante ta e gastu di pasashi i por ta estadía ku e biahe aki ta trese kuné. Nos lo keda update nos gran fanátikonan di Sòftbòl Liga 60 ku tur djadumingu ta move pa Frank Curiel Ballpark pa mira e penshonádonan den akshon. Saludo pa Siegfried Wal, Henry Wal i sr. Ogenia ku tei tur djadumingu mèrdia bai kue atardi na Frank Curiel Ballpark.
* * * * *
Sòftbòl ta sigi move pa islanan ABC ku regularidat. Beisbòl 40+ si a manera wanta un ratu. Añanan 2015 bin ariba na momentu ku ekipo Curacao Legends di Hulanda a keda fundá, tabatin hopi moveshon entre Aruba, Kòrsou i Hulanda. Pero mester apuntá ku nunka e ekipo nan di Kòrsou i Aruba no a bai Hulanda, esei ta un lástima. Ekipo Curacao Legends práktikamente a wanta un ratu i no a move den 2025. Ekiponan di Kòrsou tampoko no a move pa Aruba. Jandoret Raiders a bai Aruba na 2016, 2017, 2018 i 2019. Despues di Covid ekiponan di Beisbòl no a move mas pa Aruba. Resientemente un delegashon di Aruba a move pa Arizona pa partisipá na e World Series di Beisbòl Veterano. Ban spera ku lo sigi ku moveshon entre Islanan ABC den Beisbòl tambe manera ta e kaso den Sòftbòl ku ta hopi aktivo den 40+, 50+ i 60+. Nos ta keda te aki pa awe i te mayan ku Poder di Dios.
