Liga 60 a start ku apertura ofishal dediká na 3 baluarte den Frank Curiel Ballpark
WILLEMSTAD- Djadumingu 18 di mei den oranan di mèrdia tabatin apertura di kampionato Liga 60 na Frank Curiel Ballpark. E kampionato di 2025 ta dediká na 3 baluarte riba 70 aña ku ainda ta aktivo den Liga 60+. Ta trata aki di Siegfried Lopez di Nos Tambe Por, Higor Kirchner di ekipo i Raymond Faries di ekipo Pitufos.
E apertura ofishal a start ku un desfile kaminda e tres baluartenan i nan famia a kana dilanti di representante di ekiponan pa drenta tereno di wega na Frank Curiel Ballpark. Despues di a duna honor i rèspèt na Himno di Kòrsou, a sigi palabra di presidente Urvin Martina. Hungadó di Jaws, Rudsel Schmidt a hasi orashon sigí pa homenahe na kada un di e baluartenan ariba menshoná apart, kaminda maestro di seremonia a lesa e karera di e baluartenan. E baluartenan a risibí plakat i un gift certificate di Green House.
Kada un di e baluartenan a dirigí palabra, pa despues huntu tira bala pa ofishalmente start e kampionato di Liga 60 di 2025. Despues di e apertura tabatin wega entre Jaws i Curacao Super Stars, wega ku Jaws a gana ku skor di 4-1. E wega promé ku apertura tabata entre Los Amigos i Sluggers. Los Amigos a gana ku skor di 17-2. Nos Tambe Por kampion di temporada 2024 a gana Pitufos 8-3 den e último wega di e fecha inougural.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia i felis wikènt. Kampionato Liga 50 a start djadumingu na Frank Curiel Ballpark dilanti un bon públiko. Ekiponan a desfilá i drenta e tereno di wega pa despues sigi ku e apertura ofishal. Presidente di Liga 50 Urvin Martina a hiba palabra i a sigi homenahe na e 3 pichernan na ken e kampionato ta dediká. Nos tin un artikulo di e apertura. Den Beisbòl Veterano ekipo Quality Stars a gana e promé wega ku un viktoria di 7-0 djasabra. Dos hungado klave di Santa Maria Pirates a keda ekspulsá djasabra i ta bai bira difísil pa Santa Maria bini bèk den wgea number dos kontra di Quality Stars. Nos a traha e kolumna aki promé ku e wega number 2 di e seri final mihó di 3 ku ta e seri final di Beisbòl Veterano di 2024. Nos tin resultadonan di Liga 50 ku a tuma lugá djasabra na Van Engelen Ballpark i tabatin bon públiko atrobe.
Den e promé wega pa loke ta trata Liga 50 djasabra na Van Engelen Ballpark, ekipo Lions a laga Artemisia den tereno riba hit di Nelly Jakoba. Artemisia tabata ganá habriendo e último inning, pero Lions a nota dos kareda pa laga Artemisia den tereno. Tabata e promé viktoria di Lions i di dos derota di Artemisia. Den e siguiente wega e klèsh di dia entre e kombinashon di Catpower/Jandoret Raiders i e kampionnan di 2024 Baranka, Raiders a gana ku skor di 8 -4. Baranka tabata dilanti 4-1 te den kabes di e di 3 inning, pero Jandoret ta nota 7 kareda den bòm di e di 3 inning pa bòltu e skor i despues no a bini mas anotashon den wega. Chervin Maduro a bati di 2-2 ku homerun i doblete pa 3 kareda empuhá.
Gregory Martijn i Gino Valeriaan a kombiná pa ekipo Jandoret Raiders bai ku e viktoria, miéntras Anthony Pieter i Kenny Hellement a picha pa Baranka. Anthony Pieter tabata e picher pèrdèdó.
Den wega number 3 Ban Serio a gana di Sluggers 6 pa 1. Ban Serio a sali dilanti 3-0 for di den promé inning i no a pèrdè e ventaha mas. Ramon Cabrera a picha 6 inning pa Ban serio i Galbao Boekhoudt un inning. Claifson Domacasse a tira 3.2 inning pa Sluggers i tuma solamente un hit di Ban Serio.
Domacasse a tira den relevo pa ekipo Sluggers. Den e último wega di djasabra último ekipo Marlins a pasa fásil riba Flamboyan/Gamers ganando ku skor di 9 pa 1. Den kurso di siman nos tin numeritonan di e weganan di Liga 50. Djasabra awor tin algun wega kandela, entre otro Ban Serio vs Marlins, Pitufos – Catpower/Raiders i Baranka vs Jaws.
Dia 30 di mei lo no tin wega debí ku ekiponan Marlins i Ban Serio lo move pa Sint Maarten partisipá den ABC&S 50+.
Wikènt pasá tabatin weganan di Beisbòl tantu riba nivel Hubenil komo Klase A. Den Hubenil ku ta U-21 ekipo Santa Maria Pirates a gana Groot Kwartier 11-8, Royal Scorpions a gana Groot Kwartier Stars 5-0, Santa Rosa Indians a derotá Groot kwartier 3-2. Den Klase A ekipo Santa Rosa Indians a gana di Santa Maria Pirates 6-2, Royal Scorpions a gana Groot Kwartier Stars 11-0. Nos ta pendiente di e resultadonan di djadumingu den Beisbòl Klase A.
Djadumingu den oranan di mèrdia nos a risibí e tristu notisia ku e èks gran picher di Sòftbòl Slowpitch, Errol ‘Joy’ Delanoi a bai sosegá. Errol tabata picher estelar di ekipo Forti, Douane, Jaws tempu di su tempu. Forti dirigí pa Joy tabata un ekipo hopi temibel den añanan 80 i 90. Kondolensia i forsa na famia i amigunan di Errol ‘Joy’ Delanoi. Awe djasabra 24 di mei lo ta entiero di 1pm pa 3.15pm ta risibí kondolensia na Misa di Coromoto. Quality Stars a bira kampion di Beisbòl Veterano 40+ ganando ekipo Santa Maria dos biaha den wikènt. Djadumingu Santa Maria Pirates tabata ganá te den último inning. Quality Stars ta nota 6 kareda riba hit, base por bola i eror den kabes di e di 7 inning, pa finalmente gana ku skor di 9 pa 5. Pabien na hungadó, dirigente i fanátikonan di Quality Stars. Direktiva di BEVEKO lo entregá premio di ekipo i individual na apertura di kampionato 2025 den luna di yüni. Nos ta keda te aki pa awe i te mayan ku Poder di Dios.
