Liga 60 ta start djadumingu awor na Frank Curiel Ballpark
WILLEMSTAD- Djadumingu 24 di mei lo start ku temporada 2026 di Liga 60 na Frank Curiel Ballpark. E liga ta konta ku partisipashon di 9 ekipo. Ekiponan ku ta partisipá ta Lions, Baranka, Nos Tambe Por, Sluggers, Nos Power, Los Amigos, Pitufos, Jaws i Curaçao Super Stars. Nos Tambe Por ta kampion di temporada 2025 i nan tabata kampion di 2024 tambe. Lions tabata supkampion di temporada 2025. Djarason 20 di mei tabatin reunion di Liga 60 na Esperanza Snack. Kuerpo di umpire ta na enkargo di Marlon Paz i skorer ta Svenska Bazoer i su crew. Weganan di djadumingu awor ta 11’or Lions – Baranka, 13.00 Nos Tambe Por – Mon Repos Sluggers, 15.00 Nos Power – Los Amigos. Pitufos ta enkargá ku barwacht, Jaws i Curacao Super Stars ta liber. Ekiponan lo hunga 12 partido durante e temporada regular, despues ta sigi playoff system page entre e mihó 4 ekiponan di Liga. E kampionato ta dediká na vários baluerte i djabièrnè nos lo tin mas detaye despues di e reunion ku a tumá lugá djarason 19 di mei.
Treasure ta swip Nos Goso i pasa pa final Diamond Stars League
Treasure a gana wega number 1 den final ku skor di 8-2
WILLEMSTAD- Ekipo Treasure a gana Nos Goso dos biaha den wikènt i pasa pa final di Diamond Stars League 2026. E weganan a tuma lugá djabièrnè i djasabra dilanti un bon públiko na Sam Bunting Ballpark. Treasure a gana wega number 1 di e seri semifinal ku skor di 10 pa 3 djabièrnè i djasabra nan a bolbe gana fásil ku skor di 18-7. Ekipo Rising Phoenix ta den final for di dos siman pasá pendiente e ganadó di Treasure i Nos Goso. Rising Phoenix ta kampion di temporada 2024 i 2025 i ta rumbo pa dinastia. Djabièrnè, 22 di mei e promé wega di e seri final mihó di 3 ku lo ta 8’or di anochi i wega number 2 lo ta djasabra 8’or. Nos tin e numeritonan di e serie semifinal.
Wega 1
Djabièrnè 15 di mei
Treasure 10, Nos Goso 3
Treasure a dal 11 hit i hasi 2 eror. Anoushka Delando tabata e picher ganadó. Sharon Rose Delanooi i Doran Javier Valero a bati di 2-2. Jenny Kinburn a konektá un homerun. Nos Goso a konektá 6 hit i hasi 5 eror. Carlientje Cleopa tabata e picher pèrdèdó. Fayna de Mei a bati di 3-2.
Wega 2
Djasabra 16 di mei
Treasure 18, Nos Goso 7
Treasure a konektá 22 hit i hasi 2 eror. Solange Soliana a bati di 4-4. Janitza Betrian di 4-3. Doran Javier Valero a bati un homerun. Nos Goso a dal 11 hit i kometé 2 eror. Emily Jonis tabata e picher pèrdèdó. Maria Bentura a bati di 2-2.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia. Despues di un fin di siman pisá ku weganan na Van Engelen Ballpark nos tei atrobe kargá ku informashon di Sòftbòl Slowpitch i Beisbòl. Ekiponan Ban Serio i Swift a bira kampion di ABC&S respektivamente di Liga 50 i di e hóbennan. Tur dos evento a resultá un éksito rotundo ku esepshon di e were were na Aruba entre Swift i ekipo Redskins. Tur kos a sigi normal na Aruba i tabatin moveshon pa loke ta trata Golden Athlete Caribbean Championship. Einan ekiponan di Aruba a gana tantu di Liga 60 komo den Liga 50. Den Liga 60 ekipo Surprise a gana i pa loke ta Liga 50 tabata ekipo Aruba Junior ku a bira kampion. Surprise a gana di Sluggers 10-9 den e final i Aruba Junior a gana República Dominicana 11-10 den e gran final di 50.
* * * * *
Miéntras tantu durante e ABC&S nan, Diamond Stars League a sigi normal na Kòrsou na Sam Bunting Ballpark riba djasabra i djadumingu. Ekipo Treasure a sweep Nos Goso i pasa pa final di e liga. E gran final ta start djabièrnè awor na Sam Bunting Ballpark entre Treasure i ekipo Rising Phoenix. E ekipo Rising Phoenix tin dos aña sigí kampion i na 2025 Rising Phoenix a gana netamente e ekipo Treasure pa bira kampion. Treasure a gana fásil 10-3 djabièrnè siman pasa i djasabra ekipo Treasure a bolbe dal Nos Goso fásil ku skor grandi 18-7. E wega a terminá pa nòkout den di 6 inning. Treasure tin hungadónan resio manera Sharon Rose Delanooi, Jenny Kinburn, Tanusi Delando, Chola Soliana, Chaunice Maduro, Suzy Virginia , Susmaline Rifaela, Lyan Sophia i otronan.
* * * * *
Rising Phoenix a dal Treasure dos biaha kaba den playoff den e seri entre 1 i 2 i Treasure a bai bini bèk. Rising Rhoenix a gana Treasure 4-1 i 6-2. Final ta bira kandela wikènt awor na Sam Bunting Ballpark. Den Rising Phoenix e aktual kampion tin hungadónan manera Sue Ellen Mauricio, Sovienca Calmera, Daynalisa Koeks, , Curilma Carolina, Ashanti Giterson, Marlies Janga, Jaqueline Sophia, Rutshsanny Calmera, Marin Windster, Monica Noor ets. Treasure a bisa ku nan lo bini bèk fuerte i nan sa kiko nan mester hasi pa gana e gran final aki. Ta spera un públiko grandísimo na e parke ariba meshoná e wikènt aki.
* * * * *
Liga 50 ta sigi e wikènt benidero na van Engelen Ballpark ku 4 wega. Pa 10’or di mainta tin kandela na momentu ku Baranka topa ku Ban Serio. 12’or ta sigi Artemisia vs Marlins, despues, 2’or Jandoret Raiders kontra Flamboyan i 4’or pm Lions kontra di Sluggers. Ekipo Jaws tin barwacht i Pitufos ta liber. Liga 50 a la karga ku direktiva nobo bou di direkshon di Rensley Martis. Lo tin hopi moveshon den e direktiva, entre otro nan lo bini ku un pagina di face book. Tur wega tin un ‘Player of the Game’. Djasabra 9 di mei e promé weganan di Liga 50 pa loke ta kampionato 2026 a saka e player of the game ku tabata Rylan ‘Tutu’ Capella di Jandoret, Gilbert Keller di Flamboyan, Hubert Sakoetoe di Ban Serio i Axel Gomez di Marlins. Nan a risibí un bale di 25 florin pa nan gasta na bar.
* * * * *
Nos a skibi di Liga 60 djaluna, e liga ta bai start djadumingu awor na Frank Curiel Ballpark. E aña aki 9 ekipo lo partisipá. E aña aki tambe e ekipo di Hulanda, Koala Bears lo organisá e Dutch Caribbean aki na Kòrsou. Atá, algun ekipo i algun isla a kuminsá reklamá ku ta Hulanda nan kier a bai. Mester bisa ku algun dirigiente di Koala Bears tabata den Curacao Legends aya na Hulanda. Nan a bin i Kòrsou i Aruba na 5 pa 6 okashon i nunka ekiponan di Kòrsou di beisbòl veterano no por a yega Hulanda. Koala Bears ta pensa ku lo bai pasa meskos ku Sòftbòl 60+ i ku ora ekiponan di Kòrsou i Aruba mester yega Hulanda tur biaha nan ta kanselá den pitu. Ta bon pa den futuro evaluá ku ta manda selekshon di Aruba, Kòrsou i Boneiru i probablemente Sint Maarten pa Hulanda. Esnan ku por paga ta sera un grupo pa bai Hulanda. Nos ta keda te aki awe. Te djabièrnè ku Poder di Dios.
