Liga Pabou den final emoshonante ta gana e seri di Intermediate 3 pa 2
WILLEMSTAD- Selekshon di Liga Pabou a laga Liga Pariba den tereno riba hit i eror i asina klasifiká pa kampionato Latino Americano di Intermediate. E seri final di Intermediate a tuma lugá na Didi Deeds Field na Terra Cora. Pabou a gana Pariba 10 pa 9 den bòm di e di 9 inning den e wega number 5 di e seri final.
Den di 9 inning den tie break Pariba a bai ariba 9-7 i a saka dos out riba un hugada di double play i tabata falta un out ku base bashi pa gana e wega. Pabou a bati hit, base por bola, hit kòrtiku di Helmijr ku a bira doblete i empuhá dos kareda. Riba eror en tiru di kuadro pa segunda pa trata di saka Helmijr, e bala a pasa bai te den profundo di center i Helmijr a nota fásilmente pa terminá e wega. Liga Pabou lo representá Kòrsou den e kampionato Latino Americano di Intermediate na República Dominicana (Santo Domingo) di 23 pa 30 di yüni. Resultadonan di e weganan tabata 7-1 (Pabou), 8-7 (Pariba), 11-6 (Pabou), 10-9 (Pariba) 10-9 (Pabou).
NUMERITONAN
Djadumingu 17 di mart (wega 5)
Pabou 10, Pariba 9
Pabou a dal 14 hit i a hasi 1 eror. Nasir El Ossais tabata e picher ganadó i e mes a bati di 4-2. D’shawn Winklaar, Jerome Basilia, Juan Ramon Cleto Ferreras a bati di 3-2. Juan Ramon Cleto Ferreras a dal un homerun.
Pariba a bati 7 hit i kometé 2 eror. Jaydon Candelaria tabata e picher pèrdèdó i e mes a bati di 2-1. Ken-Jay Phelipa tambe a bati di 2-1.
Pariba 10, Pabou 9 (wega 4)
Pariba a dal 14 hit i hasi 2 eror. Quasynn Rojer tabata e picher ganadó i Giordrick Bakmeyer a bati di 4-3.
Pabou a bati 9 hit i kometé 3 eror. Jerome Basilia tabata e picher pèrdèdó. Nasir El Ossais a bati di 3-2. Helmir Helmijr a bati di 2-2.
Pabou 11, Pariba 6 (wega 3)
Pabou a bati 8 hit i kometé 1 eror. Picher ganadó tabata Juan Ramon Cleto Ferreras. Jay-Dlin Wiel i Shemar Jacobus a bati di 3-2. Helmir Helmijr a bati di 1-1. Alexander Provacia - Roach a dal un homerun.
Pariba a dal 3 hit i hasi 4 eror. Giordrick Barkmeyer tabata e picher pèrdèdó. Quasynn Rojer, Chrisyòn Sambo i Nayvan Makaya a bati di 3-1.
Nasir El Ossais ku 4 hit den 7 turno den e dos weganan final. E tabata picher ganadó den e wega finalísimo.
%20copy.jpg)
MAS INFORMASHON DI BEISBÒL I SÒFTBÒL
Fanátikonan di Deporte Kòrsou, bonochi. Pabien na Liga Pabou ku a gana e seri di Intermediate den 5 wega. Liga Pariba tabata falta un out pa gana e seri. Un out i base bashi ganá pa dos kareda, 9-7. Pero kosnan a bai otro i Pabou ta rèli despues di e dos outnan i logra nota 3 kareda. Pabou tabata gran faborito, pero Pariba a defendé su kueru karu den e seri aki. E weganan a terminá 7-1, 8-7, 11-6, 10-9 i 10-9. Remarkabel ta ku e dos weganan di djadumingu a terminá 10-9, kaminda e ekipo di kas a laga esun di bishita den tereno. Ekiponan di kas ku a gana e weganan ei tabata pèrdí formal den último inning. Esei ta beisbòl i esei ta deporte.
* * * * * *
Didi Deeds Field tabata yen yen di fanátiko durante tur e 4 dianan i 5 wega. Djadumingu ta masha hopi hende a bai bini bèk pa mira e di dos wega. Hopi a bai dal un buelta na restorantnan na Banda Bou i nan a bini bèk. Un ambiente apart na Banda Bou na un parke speshal i weganan di play-off. Intenshon ta pa e wega di Beisbòl yega mas den e teritorio di Banda Bou. Henter famia Gregorius tabata tei aktivo riba i pafó di tereno durante henter e kampionato i play-off di Intermediate. Tantu Didi komo Johnny Gregorius moviendo pafo di vèlt pa sòru pa tur detaye ta OK, pa fanátiko, transmishon, umpire, skorer i hungadónan. Johannes Gregorius Sr. tambe tabata presente i mama di Gregoriusnan sra. Sheritsa Stroop.
* * * * * *
Fanátikonan animá mes mes na Didi Deeds Field, tantu di Liga Pariba komo di Liga Pabou. Liga Willemstad tambe tabatin nan fanátikonan, pero a keda kòrtiku atrobe. Por spera masha hopi fanátiko pa play-off Minor i Little ku lo tuma lugá na Frank Curiel Ballpark i Junior ku Senior ku lo bai ta na Tio Daou Ballpark. Senior ta start dia 11 di aprel na Tio Daou Ballpark. Pariba a gana Pabou den Intermediate den 2023. 2022 Pabou a gana i bai Mundial komo representante di Latino America. 2023 Pabou a gana den 4 kategoría. Minor, Little, Junior i Senior i bai Mundial den e 3 último kategoríanan. Minor naturalmente no ta bai Mundial, debí ku Wiliamsport, Little League Internashonal no ta organisá Mundial pa Minor League. Tene kuenta tambe ku algun aña pasá a stòp ku Big League ku ta e kampionato Mundial pa e hóbennan di 17 i 18 aña.
* * * * * *
Nos ta bai un ratu pa Beisbòl Veterano. Ray Soerka a firma kontrakt pa hunga den ekipo di su tio, Ibi Soerka, Azucar den 2024. Ray Soerka lo ta ku ekipo Azucar den 2024. Djabièrnè awor 22 di mart pa 7’or di anochi lo tin reunion general di Beisbòl Veterano na Landhuis Salinja Ariba den Kaya Panacea. Ta basta rumor di kambio nos a tende último simannan na momentu ku nos tabata na Van Engelen Ballpark. Na Didi Deeds Field tambe nos a dal den vários hungadó di Beisbòl Veterano. Entre otro èks hungadó di Beisbòl Veterano ku ta Sedney ‘Spin’ Lourens ku a bisa ku e no ta hunga Beisbòl Veterano mas. Nos a topa ku Joseph Everon di Jandoret Raiders ku ta hunga Sòftbòl 50+ ku ekipo Baranka.
* * * * * *
Ekipo Jaws tin Torneo 60+ den luna di aprel miéntras Jaws 50+ tambe tin un torneo. Mon Repos Sluggers ta organisá un Torneo 60+ riba Dia di Bandera ku partisipashon di ekiponan di Kòrsou, Aruba, Boneiru, Sint Maarten i probablemente Hulanda. Ta trata di e torneo ku ántes Curacao Super Stars di Rudy Brunken tabata organisá. Den dianan benidero nos lo tin mas detaye di e torneonan aki. Torneo Hope ta start djasabra 23 di mart na Van Engelen Ballpark. Tene kuenta ku lo tin mas wega anochi, debí ku tin 2 vèlt ku lus.
* * * * * *
Dia 31 di mart tin wega di Liga 70 atrobe serka Rudy Brunken na Muizenberg. Ta pidi pa tur hungadó di 70+ ku nan chèns ta hopi chiki den Liga 60, pa djòin e training. Pa mas informashon por tuma kontakto ku Rudy Brunken. Resientemente durante un reunion general ekipo Curacao Super Stars a vota pa un diektiva nobo ku Angel Ramirez na kabes. Den kurso di dianan benidero nos lo tin mas detaye. Nos ta keda te aki pa awe. Te djarason ku Poder di Dios.
