WILLEMSTAD- Kampionato Intermediate a start djasabra 14 di mei na Sabana Ballpark ku partisipashon di ekipo di Liga Pabou, Liga Pariba i Liga Willemstad. Despues di e promé 6 weganan Liga Pabou i Liga Pariba tin rekòrt di 3 ganá i 1 pèrdí, miéntras Liga Willemstad tin 0 ganá i 4 pèrdí. Djasabra despues di e promé wega tabatin apertura ofishal kaminda representante di RBC Royal Bank, spònser number 1 di Little League, sr. Sharier Dorand a hiba palabra. Tambe a dirigí palabra District Administrator Urny Floran i direktor tékniko di e kampionato Norval Faneyte. Weganan lo sigi durante 3 wikènt i tur ekipo lo mester yega 12 wega hungá. Deporte Kòrsou tin numérito di 6 weganan ku a tuma lugá wikènt pasá na Sabana Ballpark.
Djasabra 14 di mei
Pabou 7, Pariba 2
Oabou a dal 5 hit i kometé 2 eror. Derickson Doran a gana. Gilventon Josephina a bai di 1-1. Pariba tabatin 6 hit i nan a hunga sin eror. Ayden Calmes a pèrdè. Lodymar Cathalina a bai di 1-1 ku 1 homerun.
Pariba 15, Willemstad 0
Pariba tabatin 16 hit i nan a hunga sin eror. Ayden Calmes a gana. Tiziano Maximiliana a bai di 3-3. Pa Willemstad 1 hit ku 2 eror. Rowem Garnette a pèrdè. Tazir Leito a bai di 3-1.
Pabou 11, Willemstad 3
Pabou a dal 6 hit i nan a kometé 3 eror. Shackleyson Margarita tabata ganadó. Jay-diar Kopra di 1-1. Willemstad tabatin 2 hit ku 4 eror. Gersviene Hansen a resultá pèrdèdó. Tazir Lleito a bai di 2-1.
Djadumingu 15 di mei
Pabou 25, Willemstad 5
Pabou a konektá 23 hit i nan a kometé 1 eror. Qion Usla a gana. Sherrintley Da Costa Gomez a bati di 3-3. D-Shawn Martina Casimiri a konektá 1 homerun. Willemstad no a konektá hit i nan a hasi 6 eror.
Pariba 17, Willemstad 1
Pariba tabatin 13 hit ku 2 eror. Kyle Haseth a bai ku e viktoria. Tiziano Maximiliana a bai di 4-3. Willemstad a bati 2 hit i nan a hasi 4 eror. Owen Harms a karga ku e derota. Jayvan Libiana a bai di 1-1.
Pariba 6, Pabou 0
Pariba tabatin 2 hit i nan a hunga sin eror. Zidanne Attaf a gana. Frannjan Haseth a bai di 3-2 ku 1 homerun konektá. Pabou a dal 2 hit i hasi 6 eror. Isaac Acosta a pèrdè. Zazil Schoop a bai di 3-1.
INFORMASHON DI BEISBÒL I SÒFTBÒL
Fanátikonan di Deporte Kòrsou, bon dia. Awe nos tin resultado i mas informashon di kampionato di Intermediate di Beisbòl. Tantu Pabou komo Pariba tin rekòrt di 3 ganá i 1 pèrdí. Pabou a gana di Pariba den wega number 1 di e kampionato ku skor di 7 pa 2 djasabra. Den e wega di djadumingu Pariba a bini duru bèk i gana Pabou ku skor di 6 -0 ku tremendo picheo di Zidanne Attaf. Willemstad no a logra gana wega i nan tin rekòrt di 0 ganá i 4 pèrdí. Kampionato Latino Americano di Intermediate ta na Kòrsou di 26 di yüni pa 3 di yüli. Dos selekshon lo representá Kòrsou den e kampionato Latino menshoná ku lo tuma lugá den Stadion Post 6.
* * * * *
Selekshonnan Minor, Junior i Senior lo bai Puerto Rico i selekshonnan Little League lo ta na Punta Cana. Biahenan basta karu na momentu ku mester bai Puerto Rico, debí ku mester bai Miami promé, drenta otro avion rumbo pa Puerto Rico. Paketenan pa bai Punta Cana ya ta riba merkado i manera nos a splika kaba, fanátikonan ku ke mira wega na Punta Cana, mester keda na e komplehonan di hotelnan menshoná den e paketenan. Paketenan di hende grandi ta varia entre nafl. 2190,- pa nafl 2292,-. Tin paketenan ku ta entre nafl. 2546,- pa nafl. 3062. E pakete mas karu ta biahe dirèkt pa Punta Cana ku Jet Air, transporte pa parkenan i entrada pa e parkenan menshoná. E biahe ku Jet Air ta pareu ku e delegashonnan di Little League segun e flyer. Ora un di nos selekshonnan bira kampion i klasifiká pa Williamsport mester wak kon ta hasi pa yega Williamsport kaminda e paketenan ta bira dòbel preis.
* * * * *
Ban pa Torneo Hope ku ta bayendo su último fin di siman, wikènt final. Djabièrnè i djasabra tin un kantidat di wega riba Vèlt A mas tantu i Vèlt B ta reservá pa weganan di konsolashon. Djabièrnè i djasabra ta e weganan semi-final i djadumingu tin weganan final tras di otro. Lo tin final den 6 kategoría. 40+, final di e buelta pèrdèdó, COED, Challenger, Soshal Femenino i Soshal Maskulino lo ta e último wega pa 7’or di anochi. Djadumingu e banda popular Gentz lo animá den oranan di anochi. Den dianan benidero nos lo tin mas detaye i skèdjel.
* * * * *
Den Liga 60 e ekipo superkampion, Nos Tambe Por a bolbe bira kampion di Torneo 60+. E torneo tabata organisá pa ekipo Lions. Den e torneo organisá pa Jaws dediká na Kid Boca Chica ekipo Pitufos a bira kampion den luna di aprel. Nos Tambe Por a gana di Jaws den final ku skor di 9 pa 2. Den e buelta regular tabata Jaws ku a blankia Nos Tambe Por ku skor di 7-0. Nos tambe Por a bini fuerte bèk den final ku picheo di Wim Felicia ku a tira práktikamente tur wega pa su ekipo. E kampionato 60+ ta start djadumingu 22 di mei ku ekipo Pitufos komo debutante.
* * * * *
Djasabra awor tin kandela den Beisbòl Veterano na momentu ku Quality Stars topa ku Santa Maria Pirates i despues ekipo Marchena Stars topa ku Jandoret. E di 3 wega di djasabra awor lo ta entre Santa Rosa Memories i The Brothers. 3 wega kandela sigí i ta spera hopi fanátiko na Vi Jansen Ballpark. Ekiponan Isla, Santa Maria i Quality Stars ainda ta invikto ku rekòrt di 4 ganá i 0 pèrdí. Un invikto lo kai den e wega di Santa Maria Pirates kontra Quality Stars. Pa loke ta trata sifranan individual di Beisbòl Veterano, Kevin Boekhoudt di Isla ta lider den bateo ku un average di .700 sigí pa Rydel Isabella di Quality Stars ku tin .667.
* * * * *
Kevin Boekhoudt ta lider den kareda empuhá tambe ku 7 kareda RBI den 4 wega. Kevin Boekhoudt tin un homerun konektá. Number 2 den RBI ta Dayron Puriel di ekipo Quality Stars ku 6 sigí pa Senny Petronella (Quality Stars) ku 5. Den picheo varios picher tin un ERA di 0.00. Marlon Balentina di Isla, Earl Virginia i Clifton Ijziek di Jandoret tin 0.00. Emilio Velarde di Marchena 0.00 i David Kirindongo di Santa Maria. Raymond Soerka di Azucar ta lider den ponche tirá ku 11, sigí pa Xaviero Avastia ku tin 10 ponche tirá. Nos ta keda te aki pa awe.
