Lions ta kibra invikto di Ban Serio den Liga 50 ku viktoria di 10 pa 6
WILLEMSTAD- Lions ku bon picheo di Geralton Martha i bon bateo di Nelly Jacoba, Eddie Thielman i Gilbert Bernadina, ta gana Ban Serio ku skor di 10 pa 6 i kibra nan invikto. Ban Serio tabata úniko ekipo invikto ainda den buelta number 1 di kampionato Liga 50 di 2025. Vários wega a keda suspendé e último lunanan pa motibu di awaseru i mal estado di tereno. Den e otro weganan ekipo Baranka a dal Artemisia fásil ku skor di 11-3, Jaws a nòkout Flamboyan 12-0 i Pitufos a blankia Sluggers 7-0 ku tremendo picheo di Janchi Cicilia ku ta back in town.
Jaws 12, Flamboyan 0
Jaws a bati 19 hit i hasi 1 eror. Fernando ‘Paiza’ Rosario tabata e picher ganadó i Antony Leonora a bati di 3-3 i Jeffrey Thompson di 1-1. Flamboyan a bati 4 hit i kometé 4 eror. Gilbert Keller tabata e picher pèrdèdó. Ralph Hermans a bati di 1-1.
Baranka 11, Artemisia 3
Baranka a bati 15 hit i hasi 2 eror Kenny Hellement tabata e picher ganadó. Edmar Cornelia a bati di 3-3. 4 batiadó a bati di 3-2. Artemisia a konektá 9 hit i kometé 2 eror. Farley Lard tabata e picher pèrdèdó . Ericson Windster, Ingemar Soerka i Aldrin Rosinda a bati di 3-2.
Lions 10, Ban Serio 6
Lions a dal 12 hit i hasi 1 eror. Geralton Martha a gana e wega. EddieThielman a bati di 2-2 Nelly Jacoba, Gilbert Bernadina i Sendy Marcelia a bati di 3-2. Ban Serio a bat 8 hit i nan a kometé 1 eror. Miro Daal tabata e picher pèrdèdó. Yanez, Estanista i Daal a bati di 2-1. Byron Kook i Hubert Sakoetoe a bati di 1-1.
Pitufos 7, Sluggers 0
Pitufos a dal 10 hit i hasi 3 eror, Johan Cicilia tabata e picher ganadó. Jurwin ‘Lèbè Lèbè’ Duggan
Signith Janga a bai di 2-2. Quincy Kook di 1-1.
Sluggers a bati 5 hit i hasi 3 eror. Edred Bakker tabata e picher pèrdèdó. 5 batiadó di Sluggers a bati di 2-1
Teksto pa pòtrèt:
Ban Serio a kasi vensí ku skor di 10 pa 6 kontra di Lions i pèrdè invikto.
Lions a gana Ban Serio konvinsente djasabra mèrdia.
Juan Trinidad ta selebrá miéntras i Ramon Cabrera ta hari deportivamente.
Herbert Lucas manager di Lions papiando ku picher ganadó Geralton Martha.
Winston Kirindongo tabata e último out di e wega ku liña pa senter.
Fanátikonan di Deporte Kòrsòu, bon dia i felis siman. Pabien na e selekshon di Aruba ku a bira kampion di Beisbòl di Karibe di Little League. Nan a gana e ekipo di República Dominicana den extra inning, den di 7 inning ku skor di 9-7. Ekipo Aruba tabata e ekipo di bishita den e wega final i a bai ariba 9-6 den kabes di di 7 inning pa finalmente gana 9-7. E último out tabata pa medio di ponche di e batiadó di República Dominicana den bòm di e di 7 inning pa Aruba selebrá riba tereno. Jeter Felicia ku a drenta den relevo den bòm di e di 6 inning i tira un inning i un tersio di inning pa bira picher ganadó. Aruba a usa 3 picher den e wega final.
* * * * *
E selekshon di Aruba a klasifiká pa nèt un kareda ménos tumá pa e ekipo di Kòrsou Pariba pa asina klasifiká komo number 2 den pul B ku ta nèt 11 kareda kontra 12 di Kòrsou. Selekshon di República Dominicana ku tabata number 1 den e pul menshoná, tabatin 3 kareda kontra i Kòrsou Pariba 12 kareda kontra. Kòrsou Pariba a hunga mas tantu inning ku tur ekipo di e buelta regular, naturalmente ku e wega di 12 inning kontra di Cuba. En todo kaso bo mester tin e suerte i pa einan bo ekipo sigi kana i yega e final. Unabes Aruba a logra klasifiká, nan a bati 5 hit kontra 0 di Pabou den e semi-final pa gana 2-1. I den final nan a bati 12 hit i kontra 7 di República Dominicana pa bira kampion. Aruba lo representá Karibe pa di dos biaha sigí den e Mundial di Little League na Williamsport. E Mundial lo ta di 13 di ougùstùs pa 24 di ougùstùs.
` * * * * *
Ban pa Slowpitch. Ekipo Lions a sorprendé e ekipo Ban Serio ganando ku skor di 10-6 i asina kibra e invikto di Ban Serio. Promé ku e wega menshoná Ban Serio tabatin rèkòrt di 7 ganá i 0 pèrdí. Lions tabatin 3 ganá i 2 pèrdí i awor nan a bai 4-2. Geralton Martha tabata den gran forma pichando pa e ekipo Lions durante 5 inning i 2 tersio i a tuma 6 kareda. Giovanni Maduro a relevá i tira un batiadó i dominá esaki ku flai pa sénter pa terminá e partido. Den e otro weganan Jaws a dal Flamboyan/ Gamers duru ku skor di 12-0, Baranka Sharks a derotá Artemisia 11-3 i Pitufos a dal Sluggers pa blankeo, 7-0. Standing di Liga 50 despues di e weganan di djasabra último ta Ban Serio 7-1, Jaws 5-1, Catpower/Raiders, Marlins 5-2, Lions 4-2, Baranka/Sharks 3-2, Pitufos 2-4, Flamboyan 2-6, Sluggers 0-6, Artemisia 0-7.
* * * * *
Nos a tira un bista riba e standing di Beisbòl Dòbel A. Ekipo Wiid Cats bou di direkshon di Johnny Balentina ta na kabes ku rèkòrt di 7 ganá i 2 pèrdí. Ta sigi Marchena Braves ku ta sorprendé den e promé 9 weganan ku rèkòrt di 5 ganá i 4 pèrdí. Santa Rosa Indians ta empatá ku Marchena (5-4).Ta sigi Santa Maria Pirates ku tin 5-5 i otro sorpresa ta ekipo Royal Scorpions ku tin solamente 3 ganá i 5 pèrdí, Groot Kwartier 3-8 den sotano. Royal Scorpions a hunga final di kampionato 2024 kontra di Santa Maria i a pèrdè den e final. Algun detaye individual ta ku e rumannan (ohochi) Rainer i Ryson Polonius di Marchena Braves ta e lidernan di bateo. Rainer tin averahe di .444 i Ryson .440. Lider den homerun ta Urlich Snijders di Royal Scorpions ku 4. Lider den kareda empuhá ta Raysheandall Michel ku 10 RBI. Den picheo ta Qui-Jaeir Martina di Groot Kwartier tin 3 wega ganá. Hershelon Julia di Santa Rosa ku 3 wega salbá. Marlison Brunken ta lider den ERA ku 0.00. Jason Kleinmoedig di Groot Kwartier Stars ta lider den ponche ku 18 ponche.
* * * * *
Den Beisbòl Veterano djasabra ekipo Quality Stars a gana Yesterday 7 pa 4 i Marlins a derotá Azucar 10 pa 7. Beisbòl Veterano ta pendiente pa start ku Liga 50. Ekipo Broncos a subi Archie Jansen ku a bai huntu ku su ruman Verney. Broncos ta invikto i nan lo bai buska algun hungadó pa forma un ekipo fuerte rumbo pa e promé 4-nan den Beisbòl Veterano. Broncos ta topa solamente un ekipo fuerte ku ta Santa Rosa. Nan a gana di Santa Rosa, Marlins i Otrabanda. Breaking News, direktiva di BEVEKO enkabesá pa Gibi Denisia a baha djaweps 17 di yüli . Keda pendiente pa mas informashon. Kenley Jansen ta saka 1,2,3 djabierne kontra di Phillies i logra su di 464 wega salba, na di 4 lugá di tur tempu tras di Lee Smith ku tin 478. Nos ta keda te aki pa awe i te mayan ku Poder di Dios.
