Lions vs Pitufos i Marlins kontra Baranka awe den wild card Sòftbòl Liga 50
WILLEMSTAD- Djasabra, 20 di sèptèmber 2025 ta kandela tin na Van Engelen Ballpark na momentu ku play-off di Liga 50 start. Pa 12’or Lions lo topa ku Pitufos i despues pa 2’or Marlins lo hunga kontra Baranka. Ganadónan lo topa ku otro pa 2’or djadumingu 21 di sèptèmber pa asina saka e number 4 di e kampionato regular di Liga 50 Sòftbòl. Ekiponan Jaws, Ban Serio i Catpower/Raiders a klasifiká number 1, 2 i 3 respektivamente. Play-off pa e sigiente djasabra dia 27 di sèptèmber ta pa 12’or Jaws vs number 4 i pa 2’or Ban Serio vs Catpower/Raiders. Djasabra 3 di òktober no tin wega i e seri ta sigi djasabra 10 di òktober na Van Engelen Ballpark. Ta spera un públiko hopi grandi djasabra awor pa mira e weganan di wild card. Nos tin resultadonan di e weganan di siman pasá.
Catpower/Raiders ta dal Jaws 11 pa 1 i klasifiká na di 3 lugá den 50+
WILLEMSTAD- Catpower/Raiders ku bon bateo i picheo a gana di Jaws ku skor di 11 pa 1 den e último wega di Liga 50 djasabra 13 di sèptèmber na Van Engelen Ballpark. Catpower Raiders a terminá na di 3 lugá, miéntras Jaws ta empatá na promé lugá ku Ban Serio. Tabatin intenshon pa hunga un wega di deskite entre Jaws i Ban Serio, pero parse desishon a kai ku Jaws a keda na promé lugá. Di dos lugá a keda Ban Serio i Catpower/Raiders number 3. Marlins a terminá number 4, Baranka number 5, Pitufos number 6 i Lions number 7. Den kurso di siman direktiva di Liga 50 a hasi anunsio di e posishon i weganan manera ariba menshoná. Pa loke ta trata e otro weganan Pitufos a gana di Flamboyan 9-3 den oranan di mainta. Baranka Sharks a dal Lions 10-0 den e sigiente wega i Ban Serio a gana Marlins 13-8.
RESULTADONAN
Catpower/Raiders 11, Jaws 1
Catpower/Raiders a dal 11 hit i a hasi 1 eror. Gregory Martijn tabata e picher ganadó. Michelangelo Cijntje a bati di 3-3 ku un homerun. Myron Wijman tambe a dal un homerun. Jaws a konektá 4 hit i no a kometé eror. Carlos Madera tabata picher pèrdèdó. Cedric Valies, Jeffrey Thompson, Deron Clara i Sigbert Juliana a bati di 1-1.
Pitufos 9, Flamboyan 3
Pitufos a dal 13 i hasi 1 eror. Johan Cicilia tabata e picher ganadó. Robertson ‘Tom’ Josefa i Humphrey Antonia a bati di 2-2. Lindsie Maccow di 3-2. Geomaly Campagnard di 1-1. Flamboyan a konektá 10 hit i hasi 2 eror. Eithel Brunken tabata e picher pèrdèdó. Rolling Eustatius a bati di 2-2. Stanley Palm i Gerton Matrona di 3-2.
Ban Serio 13 , Marlins 8
Ban Serio a konektá 11 hit i hasi 1 eror. Picher ganadó tabata Michelangelo ‘Galbao’ Boekhoudt. Albert Pieternella i Ludwig Pietersz a bati di 2-2. Kelvin Winklaar a bati di 1-1. Kelvin Winklaar i Luigi Yanez a dal un homerun. Marlins a dal 9 hit i kometé 2 eror. Luis Alcantara tabata e picher pèrdèdó. Aldrin Visers a bati di 1-1. Roderick Postina i Richenel Candelaria a bati di 3-2.
Baranka 10, Lions 0
Baranka a bati 12 hit i hasi 1 eror. Anthony Pieter tabata e picher ganadó. Grensly La Croes a bati di 2-2. Edmar Cornelia a bati di 3-2 i Robert Ramazan a bati di 1-1. Edmar Cornelia a dal 2 homerun i Ramiro Balentina a konektá un homerun. Lions a dal 5 hit i a kometé 2 eror. Geralton Martha tabata e picher pèrdèdó. Eran Neuman a bati di 1-1.
Fanátikonan di Extra Inning, bon dia i bon siman. Wikènt pasá kargá ku moveshon den Sòftbòl i Beisbòl. Sòftbòl Femenino Fastpitch riba nivel Dòbel A i Klase A a start na Sam Bunting Ballpark. E torneo ta dediká na Diana Daal, un dje grandinan di Sòftbòl Fastpitch Femenino. Diana Daal ta kasá di Sixto Laker ku a fayesé dos siman pasá i ku djamars siman pasá tabatin su entiero. Djabièrnè despues di e apertura ofishal tabatin e promé wega ku a bai entre Souax i Santa Rosa. E ekipo Souax ku ta kampion di Dòbel A di 2024 a sali i blankiá Santa Rosa ku skor di 5-0. Ta e dos ekiponan aki a enfrentá otro den final di 2024 i Souax a sali riba bon pia atrobe. Den e wega di djasabra ekipo Fenix a gana di Pichingolo ku skor di 8-7.
* * * * *
Liga 50 di Sòftbòl a terminá ku buelta regular djasabra 13 di sèptèmber na Van Engelen Ballpark. E situashon a terminá interesante kaminda a surgi vários empate den e standing. Desishon ofishal no a kai ainda kiko ta bai pasa, manera entre otro ku lo mester hunga deskite. E standing a base di game changer tabata Ban Serio 11-2, Jaws 11-2, Catpower Raiders 9-4, Baranka Sharks 8-5, Pitufos 8-5, Marlins 7-6, Lions 5-8, Flamboyan Gamers 4-9, Sluggers 2-11, Artemisia 0-13. Game Changer ta pone e posishon ora ta trata di empate a base di kareda kontra. Regla di Liga ta papia di seri partikular entre e ekiponan promé i despues kareda kontra ets.
* * * * *
Mester apuntá ku play-off semi-final lo hunga riba djasabra so kontrali na añanan anterior. Dia 4 di òktober no tin wega debí ku sierto ekiponan a pidi liber parse i tin kompromiso den eksterior. Interesante pa sa kiko lo bai pasa pa loke ta trata e posishon number 1 i 2. Den Beisbòl Veterano ekiponan Santa Maria i Yesterday a pasa fásil riba nan kontrinkantenan. Ekipo Santa Maria a gana Otrabanda ku skor di 9 pa 3. Pichernan Rylan Capella, Raynis Faries i Willy Linderberg a picha pa Otrabanda. Pa Santa Maria Gerald Gregorius, Eldred Estanista, Amador Nita i Anthony Cijntje a picha. Den e sigiente wega djasabra Yesterday a dal Marlins duru ku skor di 10-0. Segun informashon Johnny Balentina i Deron Clara a debutá ku ekipo Yesterday den e wega aki.
* * * * *
Pa loke ta trata Liga di Nos Tur ekipo Sin Stres a gana Join Me fásil ku skor di 15-2. Djasabra tabata ekipo Shining Stars ku a gana di Join Me 5 pa 2. Standing den Liga di Nos Tur ta Shining Stars 4-0, Sin Stres 3-1, Un Kara 1-2 i Join Me 0-5. Liga 60 a sigi djadumingu na Frank Curiel Ballpark. Miéntras ekiponan di 60+ ta preparando pa hunga Dutch Caribbean ku lo tuma luga na Aruba di 3 pa 5 di òktober. E ekipo di Hulanda tambe a konfirma nan partisipashon i lo ta presente. Segun nos di Kòrsou lo bai Nos Tambe Por, Lions, Sluggers i Los Amigos. Nos ta keda te aki pa awe i te djarason ku Poder di Dios.
