Los Amigos kontra Lions djadumingu 2'or den semi-final 60+
WILLEMSTAD – Sóftbòl 60+ ta sigi ku semi-final djadumingu awor 2’or na Frank Curiel Ballpark. Los Amigos ku a terminá buelta number 3 lo topa ku Lions ku a terminá buelta regular number 1. Los Amigos a eliminá Jaws ganando fásil ku skor di 8 pa 1, miéntras Lions a pèrdè kontra Nos Tambe Por 3 pa 1 den e promé weganan di play-off. Nos Tambe Por ya ta den final i ta pendiente di e wega semi-final di djadumingu awor. Den e kampionato regular Lions a gana Los Amigos na dos okashon. Nos tin e numeritonan di e dos weganan di play-off di djadumingu último.
Los Amigos 8, Jaws 1
Los Amigos a dal 10 hit i hasi 3 eror. Donald Balentina tabata e picher ganadó, ela tira henter e wega. Mayron Clara a bati di 3-2, Howard Rojer i Patrick Elisa a bai di 1-1. Jaws a konektá 4 hit i a kometé 4 eror. Riley Toppenberg tabata e picher pèrdèdó. Maichiel De Roon, Gilbert Juliet i Remick Bernadina a bati di 2-1.
Nos Tambe Por Por 3, Lions 1
Nos Tambe Por a bati 7 hit i a kometé 1 eror. Michelangelo ‘Galbou’ Boekhoudt tabata e picher ganadó. Nelson Jakoba a bati di 3-2, Jurgen Lichtenberg di 2-1. Lions a konektá 7 hit i hasi 1 eror. Picher pèrdèdó tabata Gregory Martijn. Ernesto Priest, Edmond Martina I Robert Trinidad a bati di 2-1.
MAS INFOMASHON DI SÒFTBÒL I BEISBÒL
Fanátikonan di Deporte Kòrsou bon dia. Nos ta sigi kargá ku informashon di Sòftbòl i Beisbòl rumbo pa medio novèmber i aktividatnan di Sòftbòl i Beisbòl ta yegando na final. Naturalmente Beisbòl Little League si ta moviendo den gran forma riba vários tereno rònt Kòrsou. Dos siman pasá a start ku e kampionato dediká na dos grandi di Little League. Sixto Laker (QEPD) di Beisbòl i Beisbòl Little League. Nydia Daal di Sòftbòl i Sòftbòl Little League. Nydia Daal ainda ta aktivo den Sòftbòl Little League i Sòftbòl T-Ball. Nydia Daal ta un dje grandinan ku a hasi hopi deporte. Nos ta pendiente pa publiká e CV tantu di Sixto Laker komo di Nydia Daal ku a hasi hopi mes pa deporte aki na Kòrsou.
* * * * *
District Administrator a tene un reunion djarason siman pasá ku e liganan di Little League i a bai hopi den detaye di kiko mester pasa e temporada aki den Beisbòl Little League. Pa 2026 Kòrsou lo ta sede di e kampionato di Karibe di Senior League. Pa di dos aña sigí lo tin un kampionato di Karibe di Senior aki na Kòrsou. Nos tabatin dos selekshon faborito grandi pa bira kampion e aña aki, pero di un manera inkreíbel, ineksplikabel e selekshon di Puerto Rico aki a gana di Pariba pa klasifiká pa final i despues gana di Pabou den final pa bira kampion. Mesun selekshon ei, esta Puerto Rico a bira kampion di Mundu den Senior League. Un selekshon ku a sali pèrdè promé wega pa medio di nòkout, no hit no run kontra di e selekshon di Pariba.
* * * * *
Ei nos ta bolbe apuntá ku kada un wega ta un wega. Por ehèmpel e manera ku ekipo Toronto Blue Jays a gana Dodgers konvinsente den 3 wega i último dosnan na stadion di Dodgers, nan a gana fásil ku skornan 6-1 i 6 pa 2. Despues bira pèrdè dos wega sigi den nan stadion i pèrdè e World Series di un forma straño. Deporte riba nivel haltu òf riba nivel medio ta un asuntu hopi serio ku no por drumi niun ratu, debí ku kos ta pasa ku bo. Den deporte tin hopi aspekto ku hopi biaha no ta bai den ‘highlightnan ‘pero ta kosnan ku ta konta, por ehèmpel defensa, korementu di base, avansamentu di koredó, wega chiki ets.. E kosnan aki ta pisa hopi den e wega enbes di simplemente homerun, hinkamentu di gol, ets. No balotá e otro partinan importante di e wega.
* * * * *
Bèk pa deporte lokal.Beisbòl Veterano Kòrsou, BEVEKO ta pendiente un reunion kaminda lo anunsiá esnan ku a solisità pa drenta e direktiva nobo. E direktiva enkabesá pa Ruisandro Cijntje a tuma retiro. Nan a hasi un bon trabou pa kaba e kampionato despues ku Gibi Denisia práktikamente su so a logra tene kabes riba awa, terminá kampionato 2024 i start 2025. Beisbòl Veterano un tempu tabatin 13 tim, ku Wimbert Hato nan aki na kabes i a stòp di tuma ekipo. Aworaki Beisbòl Veterano ke pa mas ekipo bini i no ta mira un kresementu na kaminda. Liga 40 di Sòftbòl tambe no a hunga den 2025 i nos no ta mira ku elo sigi den 2026 tampoko. Liga Amstel tambe ta parse di a muri un morto natural. Di Liga Van Engelen i otro liga di e hóbennan no ta kos di papia mes.
* * * * *
Liganan Komersial ta sigi krese i mester bisa ku Kopanan ABC tantu riba nviel di e hóbennan komo 40, 50 i 60 si ta ON. Nos rumannan di Aruba, Boneiru, Kòrsou, Sint Maarten i hasta Sint Eustatius ke sigi interkambiá, kompetí i diberti riba nivel di Sòftbòl entre e islanan. Futbòl tambe ta move hopi bon pa loke ta trata ABC. ABC di e hóbennan lo tuma lugá na Aruba i parse ku 40 tambe lo ta na Aruba atrobe. ABC 50+ organisá pa ekipo Marlins lo ta na Kòrsou wikènt di Ascension. Hopi interes di ekiponan di Kòrsou, Aruba, Boneiru i tambe Sint Maarten. Tabata pendiente pa organisá un konferensia di prensa òf saka un komunikado for di e aña aki ku detayenan di Liga 50 di 2026 ku lo tuma lugá na Van Engelen Ballpark. Nos ta keda te aki pa awe i te mayan ku Poder di Dios.
